Basrak: Superiorja, si Seria B italiane

Sport Ekspres — Sun, 22 Oct 2017 14:41:59 +0000

Sulmuesi i Partizanit Milan Basrak shënoi sot në Shkodër golin vendimtar të ndeshjes, duke treguar se është në alternativë e mirë në sulm, edhe nëse nuk janë Çani e Sukaj. Pas ndeshjes, në Supersport ai foli për golin, fitoren dhe nivelin e Superiores.

“Jam shumë i kënaqur për këtë gol, është meritë e gjithë skuadrës, që luajti një ndeshje mjaft të mirë dhe që më ndihmoi të shënoja.

“Çani e Sukaj, sa hapësira pret kur të kthehen? Është normale që ata të jenë titullarët, janë lojtarë shumë të rëndësishëm e cilësorë, por mendoj se kam vend për të tre ne.

“A pati faull te momenti i golit? Po, pësova unë faull.

“Me çfarë shënova? Me kokë, me të pasmen e saj.

“Lindur në Zvicër, formuar në Itali, si është futbolli shqiptar? I fortë, i ashpër, ka lojtarë cilësorë. Unë kam luajtur në Serinë C italiane, por këtu futbolli është superior, do ta krahasoja me Serinë B italiane”.

Goditja e parë e Moxhit vjen nga Lega Pro në Itali

Sport Ekspres — Tue, 04 Jul 2017 10:19:22 +0000

Katër gola në 24 ndeshje me Katanzaron, por vetëm 7 herë titullar sezonin e fundit. Milan Basrak duket se është sulmuesi i ri i Partizanit, raporton tuttomercatoëeb.com, një operacion i mbyllur nga Luçiano Moxhi, i cili duket se më në fund ka nisur punën për sezonin e ardhshëm, duke parë se për Europa League nuk u bë asnjë operacion jashtë Shqipërie.

Basrak është një sulmues 22-vjeçar nga Serbia, por lindur në Zvicër.

Me një eksperiencë edhe te të rinjtë e Crvena Zvezdës, Basrak ka provuar, pa sukses, të luajë në Serbi e Bosnje-Hercegovinë, duke shënuar vetëm një gol në karrierë, para transferimit në Itali verën e shkuar.

E mori Katanzaro, por deri në nëntor nuk luajti asnjë ndeshje në formacion. Më pas, shumë minuta dhe 4 gola, edhe pse në vitin 2017 ka shënuar vetëm një herë, më 28 maj ndaj Vibonezes.

Pak rëndësi ka, edhe Kaleb Ekuban shënoi 4 gola në 31 ndeshje (24 si titullar) te Renate para se të transferohej te Partizani e tani te Lidsi në Angli. Basrak duhet parë në fushë, para se të gjykohet nga shifrat.