Ballsh

Merr fund bashkëpunimi, Bylis ndahet me mesfushorin

Sport Ekspres — Mon, 08 Jul 2019 21:40:19 +0000

Bylis ka bërë të ditur mbylljen e bashkëpunimit me mesfushorin Alfred Zefi. Në njoftimin e bërë nga klubi mallakastriot në rrjetet socialë është bërë e ditur se pas mbarimit të kontratës së lojtarit të dyja palët kanë rënë dakord që rrugët e tyre të ndahen.

Futbollisti kurbinas iu bashkua skuadrës së Bylisit një vit më parë. 27-vjeçari ishte një ndër lojtarë me të aktivizuar të ballshiotëve me 22 aktivizime, ku pjesa dërrmuese e të cilave ishin si pjesë e formacionit titullar.

NJOFTIMI I KLUBIT

Faleminderit Alfred Zefi!

Nga sot klubi dhe mesfushori mjaft punëtor dhe profesionist Alfred Zefi nuk do të bashkëpunojnë më. Përfundimi i kontratës së Zefit, sigurisht që ka gjetur konsensusine klubit për ta mbyllur bashkëpunimin!

Klubi e falenderon për kontributin maksimal dhe do të mbahet mend si një lojtar fjalë pak e punë shumë!

Suksese të mëtejshme Alfred Zefi!

Largimi i dytë në Mallakastër, Bylis ndahet me mesfushorin

Sport Ekspres — Sat, 15 Jun 2019 22:13:03 +0000

Bylis ka zyrtarizuar largimin e mesfushorit Ildi Shyti. Futbollisti pogradecar iu bashkua skuadrës mallakastriote në fillim të sezonit që lamë pas. 26-vjeçari u aktivizua 14 herë nga trajneri Veljko Dovedan.

Shyti është lojtari i dytë që largohet nga skuadra mallakastriote. Pak ditë më parë klubi njoftoi ndërprerjen e bashkëpunimit me sulmuesin togolez Doseh Kofi. Përsa i përket afrimeve, në Ballsh duhet të presin edhe akoma.

Magani: Marr përgjegjësi për lojën e dobët, por arbitri na dëmtoi me dashje

Sport Ekspres — Sat, 13 Apr 2019 15:16:47 +0000

Takimi midis Besës së Kavajës dhe Bylisit të Ballshit u ndal në minutën e 80-të kur rezultati ishte 1 – 0 për ekipin mik. Shkak për ndërprerjen e parakohshme të ndeshjes u bë goditja e arbitrit anësor nga një send i fortë.

Trajneri i ekipit kavajas, Gugash Magani, ka folur për “RTSH SPORT” në përfundim të takimit. Tekniku peqinas mori përgjegjësitë për lojën e dobët të skuadrës së tij, por nuk ngurroi të sulmonte arbitrin Klajdi Kola, të cilin e akuzon për njëanshmëri.

Në fakt, dua ta filloj nga pjesa teknike e lojës. Mund të them që kemi zhvilluar një ndeshje të dobët. Kanë ndikuar dy faktorë: Presioni, që na duhej patjetër, por mund të luhej edhe për barazim. E dyta është që kur kanë ardhur arbitrat, kanë qenë të paragjykuar dhe pasi pashë lojën, jam dakord për paragjykimin.

Gjithsesi, unë mendoj që goli i Bylisit ka qenë faull para se topi të shkonte atje. Kemi dyshime për një penallti që na u mohua. Kartoni i kuq i vuri vule gjithçkaje. Lojtari godet topin, ai i nxjerr karton të kuq lojtarit tim. Për dy rastet e para, nuk mund të jap një mendim të saktë, por te kartoni i kuq ka qenë diçka e papranueshme.

Mendonim që do të vinte një gjyqtar i FIFA-s. Gjithsesi, loja fitohet në fushë dhe me drejtësi. Sot, nuk kishte drejtësi. I njëjti arbitër më ka ndëshkuar edhe në Durrës. Nuk mund ta them se pse mund ta paragjykoj arbitrin. Përderisa ai gjykon në Superiore, nuk është i paaftë. Ai na ka ndëshkuar me dashje. Trajnerët në Shqipëri nuk thonë gjithmonë të vërtetën, por unë po e them. Marr përsipër lojën e dobët të skuadrës dhe fjalët që thashë për arbitrin” përfundoi Magani.

Zyrtare | Jo vetëm Jaupaj, Bylis firmos me një tjetër “ish” të Partizanit

Sport Ekspres — Tue, 22 Jan 2019 18:16:05 +0000

Skuadra e Bylisit ka qenë ndër ekipet më aktivet në merkaton dimërore. Afrimi më i fundit i klubit mallakastriot është sulmuesi kamerunas Mustafa Xhixhua. Ky është përforcimi i tretë në repartin kryesuesit e Grupit B, që më parë siguruan shërbimet e Eri Lamçes dhe Ardit Jaupajt.

Xhixhua në të shkuarën ka qenë pjese e skuadrës së Partinazit, ku nuk gjeti shumë hapësira dhe më pas u transferua te Erzeni, ku 14 ndeshje gjeti 8 herë rrugën e rrjetës. Në gjysmën e parë të këtij sezoni, kamerunasi ishte pjesë e Burrelit, ku në nëntë ndeshje shënoi tre gola.

Besa likuidon Bylisin dhe kap kreun e tabelës

Sport Ekspres — Sun, 30 Sep 2018 17:08:04 +0000

Besa e Kavajës ka mposhtur Bylisin me rezultatin 2-0. Golat për vendasit i shënuan Mëllugja në minutën e 56-të dhe Thaçi në minutën e 84-ët. Humbja ndaj Besës rëndon situatën në kampin mallakastriot, pasi në katër ndeshjet e parë skuadra nga Ballshi ka grumbulluar katër pikë.

Me fitoren e sotme Besa shkon në shtatë pikë dhe kap kreun e renditjes. Në Grupin B, vihet re një ngjeshje e madhe ekipeve në kreun e tabelës, pasi katër skuadra: Besa, Oriku, Apolonia dhe Egantia ndajnë vendin e parë me nga shtatë pikë, ndërsa Tomori dhe Lushnja kanë nga gjashtë.

Besa Kavajë 2 – 0 Bylis
Shënues: Mëllugja 56′, Thaçi 84′

Në Ballsh gjejnë zgjidhje për sulmin, i besojnë “Ish”-it të Partizanit

Sport Ekspres — Sat, 18 Aug 2018 08:48:07 +0000

Skuadra e Bylis po përgatitet për sezonin e ri në kategorinë e parë. Rikthimi në Superiore është objektiv i panegociueshëm për ekipin mallakastriot. Së fundmi Bylis ka prezantuar dhe ish-sulmuesin e Partizanit Ardit Jaupaj, i cili është marrë në formë huazimi nga skuadra e Luftëtari.

Jaupaj është një sulmues 22-vjeç, i prodhuar në akademinë e “Demave të Kuq”. Në klubin ku u formua, ai nuk gjeti shumë hapësira edhe pse një ndër talentet më premtues të nxjerrë nga akademie e kuqe. Sezonin e kaluar Jaupaj u aktivizua në kampionatin kosovar me skuadrat e Flamurtarit të Prishtinës dhe Ferronikelit. Tani Bylis i duhet të zgjidhë dhe çështjen e trajnerit të ri, pasi starti i sezonit po afron.