Balla: Partizani klub i madh, ja ku duhet të përforcohen për Europën

Sport Ekspres — Tue, 14 May 2019 21:18:04 +0000

Ish-mbrojtësi i Partizanit, Sabri Balla, ka folur për “RTSH Sport” sot, ku është ndalur më shumë te fitimi i titullit kampion nga “Demat e Kuq”, puna e shkëlqyer që ka bërë stafi i klubit dhe përforcimet që ai mendon se i duhen kampionëve të rinj të Shqipërisë për ndeshjet e Europës:

“Këto janë emocione shumë të mëdha. Unë kam qenë pjesëtar i ekipit të Partizanit në vitin 1984-‘85, kam luajtur me një brez të madh lojtarësh. Dua të falënderoj drejtorin sportiv, Olsi Rama, që bëri një punë të shkëlqyer, së bashku me stafin teknik. Partizani është ekip i madh, ka pasur superprodhim lojtarësh, ushtarë: si Sokol Kushta, shkolla sportive.

Ishte nder për mua që në atë kohë të luaja për Partizanin. Partizani ka qenë ekip kombëtar i dytë, pasi të gjithë lojtarët luanin për kombëtaren, duke filluar nga moshat, deri te ekipi A.

Shpresojmë që Partizani të eci përpara dhe në Europë. Unë mendoj se duhet një mesfushor lider në mesfushë dhe një sulmues i fortë qendre. Portierin e kemi shumë mirë, Alban Hoxhën”, u shpreh Balla.

Ekipi i Partizanit 1984-’85

Vazhdon telenovela Muzaka-Tirana, ultimatum dhe për Luftëtarin

Sport Ekspres — Wed, 30 Jan 2019 13:06:42 +0000

Mund të konsiderohet në plot kuptimin e fjalës një telenovelë çështja e Gjergji Muzakës sa i përket detyrimit që skuadra e Tiranës i ka lojtarit të Skënderbeut. Në vendimet e sotëm të Komisionit të Disiplinës, pika 16 lidhet sërish me ultimatumin që organi më i lartë sportiv në vend i vendos skuadrës bardheblu për shlyerjen e detyrimeve ndaj mesfushorit anësor.

Është hera e tretë që Disiplina paralajmëron skuadrën 24 herë kampione, pasi edhe më parë situata ka shkuar deri aty sa lojtari ka vënë në presion Federatën për të marrë pagat që i takojnë. Kujtojmë që ky është kësti i tretë dhe i fundit për Muzakën.

Për të mos harruar, kjo çështje është e janarit të vitit 2017, pra dy vite më parë që për të njëjtën çështje. Tirana ka kohë 30 ditë për të shlyer një herë e mirë lojtarin në fjalë dhe për të shmangur sanksionet e parashikuara në rregullore. Me shumë mundësi kjo është seria e fundit e kësaj telenovele që zgjatur pa FUND!

Pranimin e kërkesës së lojtarit Gjergji Muzaka. Detyrohet KF “Tirana” të ekzekutojë pjesën e mbetur të detyrimeve financiare ndaj kërkuesit Gjergji Muzaka sipas vendimit Nr.1 datë 23.01.2017 të DHKZK brenda një afati 30 ditor, duke nisur nga data e shpalljes së këtij vendimi. Paralajmërohet “K.F Tirana”, se me kalimin e afatit 30 ditor, do të merren masat përkatëse në bazë të Kodit të Disiplinës Sportive.

Po ashtu edhe skuadra e Luftëtarit ka marrë ultimatum nga FSHF për të shlyer detyrimet që ka karshi lojtarit Kejdi Balla. Edhe bluzinjtë kanë një afat prej 30 ditësh për të likuiduar lojtarin në fjalë nëse nuk duan të kenë penalitete.

Pranimin e kërkesës së lojtarit Kejdi Balla. Detyrohet KF “Luftëtari” të ekzekutojë detyrimet financiare ndaj kërkuesit Kejdi Balla sipas vendimit Nr.6 datë 17.07.2018 të DHKZK brenda një afati 30 ditor, duke nisur nga data e shpalljes së këtij vendimi. Paralajmërohet KF “Luftëtari”, se me kalimin e afatit 30 ditor, do të merren masat përkatëse në bazë të Kodit të Disiplinës Sportive.