Balde Keita

Pesë blerjet më të dështuara të sezonit, kryesojnë klubet angleze

Sport Ekspres — Mon, 22 Apr 2019 17:14:56 +0000

Kampionatet elitare në Europë po shkojnë drejt fundit. Milionat e shpenzuara në merkaton e verës tani mund të vihen në peshore për të parë se cilët lojtarë e kanë kaluar provën dhe cilët kanë dështuar.

“Blofet” më të mëdha të merkatos së këtij sezoni vijnë nga Anglia, pikërisht vendi ku ka më shumë para se në çdo vend tjetër.

Havier Pastore (Roma, 25 milionë euro)

Roma pagoi 25 milionë euro për të rikthyer në Itali, Havier Pastoren. Argjentinasi ka rezultuar një zhgënjim tepër i madh. Pastore i Palermos është zhdukur. 29-vjeçari është aktivizuar vetëm 450 minuta gjatë këtij sezoni të Serie A.

Zhan-Mikel Seri (Fulhem, 30 milionë euro)

Në verën e 2017-ës, mesfushori i Nicës Zhan-Mikel Seri ishte shumë pranë transferimit te Barcelona, por marrëveshja u prish më momentet e fundit. Një vit më vonë lojtari nga Bregu i Fildishtë u ble nga londinezët e Fulhem për 30 milionë euro. Përshtatja në kampionatin anglez nuk qenë aspak e lehtë dhe sezoni i tij dhe skuadrës në përgjithësi rezultoi një katastrofë e vërtetë.

Keita Balde (Inter, 36 milionë euro)

Keita Balde ka shënuar 4 gola me skuadrën e Interit gjatë këtij sezoni. Shumë lojtarë do të ishin të kënaqur me këtë kontribut, por senegalezi ishte blerja rekord e Interit në merkaton e verës që lamë pas me plot 36 milionë euro të shpenzuara për të. Konkurrenca e Mateo Politanos dhe Ivan Perishiç rezultoi tepër e fortë për 24-vjeçarin.

Fred (Mançester Junajtid, 60 milionë euro)

Blerja rekord e Mançester Junajtid gjatë verës së 2018-ës, ishte mesfushori brazilian Fred. Futbollisti vinte nga kampionati ukrainas, por kishte bindur Zhoze Murinjon me paraqitjet në Champions League. Muajt e parë te Junajtid rezultuan një katastrofë e vërtetë, pasi braziliani shikohej rrallë në stol e jo më në fushë. Me ardhjen e Solskjaer situata është përmirësuar, por për një lojtar me kosto 60 milionë euro duhet shumë më shumë.

Mahrez (Mançester Siti, 70 milionë euro)

Pep Guardiola ishte i bindur se Rijad Mahrez do të ishte përforcimi ideal për skuadrën e tij, megjithatë në praktikë nuk rezultoi kështu. Algjeriani i kushtoi Sitit 70 milionë euro, por gjatë gjithë sezonit nuk ka qenë më shumë se një lojtar stoli, për shkak të konkurrencës nga lojtarë si Rahem Stërling dhe Bernardo Silva.

Balde “del huq” tek Interi, vjen oferta angleze

Sport Ekspres — Wed, 21 Nov 2018 18:50:01 +0000

Keita Balde ishte një ndër blerjet e shumta të Interit gjatë merkatos së verës. Kinezetë e “Suning” që kanë në pronësi klubin zikaltër pranuan të derdhnin 30 milionë Euro në arkat e Monakos për të rikthyer senegalezin në Serie A.

Tani më pesë muaj nga transferimi, jo gjithçka ka shkuar ashtu siç e shpresonte lojtari dhe drejtuesit e Interit. Në 12 javë kampionat, senegalezi është aktivizuar vetëm 352 minuta dhe ende nuk ka gjetur golin e parë “zikaltër”.

Sipas sajtit të njohur italian “tuttomercatoweb.com”, kjo paraqitje e dobët e lojtarit ka bërë që Interi të mendojë huazimin e tij gjatë merkatos së janarit. Një ndër klubet që ka shfaqur interes konkret për ish-lojtarin e Lacios është Ulverhemptoni në Angli. Në shkrimin e “tuttomercatoweb”, përmendej se njëri prej Kandrevas ose Baldes do të largohet medoemos gjatë merkatos së janarit.

Video mallëngjyese: 13 vite më parë Keita Balde merrte leksione nga Eto

Sport Ekspres — Fri, 17 Aug 2018 12:14:15 +0000

Keita Balde, blerja më e re e Interit është një produkt i akemisë së famshme të Barcelonës, “La Masia”. Sulmuesi 23-vjeçar ka jetuar që në fëmijëri në Katalonjë ku ka qenë një ndër talentët më premtues, por syri dinak i Igli Tares, si dhe mungesave e prespektivës në klubin ku u formua, bënë që Keita t’i thoshte lamtumirë kampionëve spanjollë.

Së fundmi në internet po qarkullon një video shumë e bukur, ku një Keita 10-vjeçar merr leksione, xhonglimi, driblimi dhe gjuajtjeje nga vetë sulmuesi me famë botore Samuel Eto, i cili asokohe luante me Barcelonën dhe më vonë do të shkruante historinë me skuadrën e Interit me fitimin e tripletës në vitin 2010. Në video Eto impresionohet nga aftësitë e Keitas, i cili në atë kohë cilësohej si lojtari më i mirë i asaj grupmoshe në akademinë e Barcelonës.

https://www.facebook.com/iloveim1908/videos/223913064940427/?hc_ref=ARTrb15y1e75VbIHmqc7gq5ggX7FeSy_-hXVR_ZT5tM30LI890rxJaKZIvRE3hbl4Qc

Keita zikaltër, menaxheri i tij befason me fjalët për Taren

Sport Ekspres — Wed, 08 Aug 2018 18:25:23 +0000

Balde Keita është një nga objektivat e Interit. Sulmuesi nga Senegali, por i lindur në Spanjë, preferohet shumë nga tekniku Spaleti, i cili u ka kërkuar drejtuesve të mbyllin marrëveshjen me të. 23-vjeçari u transferua vitin e kaluar nga Lacio tek Monako dhe tashmë është gati të rikthehet në Serinë A.

Në një citim për “Gazzetta dello Sport”, agjenti i cili solli Keitan tek Lacio në vitin 2011, Nuncio Markione, flet për të ardhmen e ish-lacialit dhe komplimenton Igli Taren.

“Keita shënonte shumë, por dua ti jap meritat që i takojnë Igli Tares që besoi tek lojtari, sepse djaloshi nuk ishte gati për nivelin e Lacios. Kostoja nuk ishte e lartë, por ekzistonin probleme me pasaportën e lojtarit, i cili vitin e parë e kaloi duke u stërvitur dhe vetëm kaq. Ai u regjistrua vetëm sezonin e ardhshëm. Akoma i duhet të hedhë hapin për t’u bërë vërtetë një lojtar i madh. Keita duhet të jetë në gjendje të përfitojë nga durimi, sepse në një ekip të madh, herët apo vonë të vjen momenti dhe ti duhet të jesh gati.”