Ausilio

Tifozët nuk e duan, por Interi bën gati rinovimin për drejtorin sportiv

Sport Ekspres — Thu, 21 Mar 2019 11:40:05 +0000

Interi i këtij sezoni ka zhgënjyer në shumë drejtime, por fitorja në derbi ka ringjallur entuziazmin dhe paqja me Ikardin po ashtu.

Klubi zikaltër po mendon që tani për të ardhmen dhe duket se pronarët kinezë janë të kënaqur nga puna e drejtuesve aktualë, aq sa po bëjnë gati rinovimin me drejtorin sportiv Piero Auzilio, raporton gazetari italian Alfredo Pedulla.

Auzilio ka kontratë deri në 2022, por mund të rinovojë për një ose dy vite. Në fakt, Auzilio nuk është se gëzon simpatinë e tifozerisë zikaltër, sepse shumica e tifozëve fajëson pikërisht drejtorin sportiv për mungesën e përforcimeve serioze, por nga ana tjetër nuk duhet harruar se Interi i viteve të fundit ka pasur kufizime të mëdha në merkato.

Për shkak të Fair-Play financiar Interi duhej të arkëtonte shifra të frikshme qershorin e shkuar dhe Auzilio ia doli mbanë, me disa transferime të çuditshme dhe “dredhi” financiare.

Përveç kësaj, Auzilio ka marrë këtë vit pa shpenzuar asgjë lojtarë si Stefan de Vrij nga Lacio apo Kuaduo Azamoah nga Juventusi.

Galjardini out, Interi gjen regjisorin e mesfushës

Sport Ekspres — Wed, 23 Jan 2019 12:48:07 +0000

Merkato e janarit po vjen drejt fundit dhe ekipët kanë nisur të lëvizin akoma më shumë. Tek Interi, Bepe Marota dhe Auzilio, duket se kanë nisur të luajnë kartat e tyre dhe janë pranë transferimit të Adrien Silvës, mesfushorit të Leister Sitit.

Portugezi, kaloi nga Sportingu i Lisbonës drejt Leisterit, për plot 24.5 milionë euro, por këtë sezon ka vetëm dy paraqitje në Premier Ligë, në total 88 minuta. Largimi duket i pashmangshëm për 29-vjeçarin dhe Interi duket në “pole” për ta marrë në radhët e tyre.

Sipas raportimeve nga mediat italiane, Marota dhe Auzilio kanë hyrë në bisedime me drejtuesit anglez për kalimin e Adrien Silvës në “San Siro”. Ndërkohë, Roberto Galjardini duket se do të jetë i sakrifikuari, i cili me shumë mundësi pritet të kalojë te Fiorentina në huazim, pasi mund të ketë më shumë hapësira me ekipin vjollcë.

Auzilio i kthehet Uandas: Negociatat nuk zhvillohen nga televizioni

Sport Ekspres — Tue, 18 Dec 2018 18:32:50 +0000

Rinovimi i Ikardit është kthyer në një çështje serioze tek Interi. Drejtuesit e klubit zikaltër i druhen klauzolës prej 110 milionë eurosh në kontratën aktuale të argjentinasit. Drejtori sportiv Piero Auzilio, ka hedhur dritë për këtë çështje, ndërsa nuk ka harruar të ngacmojë gruan dhe agjentin e lojtarit, Uanda Nara, që pak ditë më parë deklaroi se rinovimi është ende shumë larg.

“Nga ana e klubit kemi mbajtur të njëjtin qëndrim gjatë të gjithë muajve të fundit. Mjafton të shikoni deklarata e mija dhe të trajnerit. Jemi shumë të gëzuar me sjelljen e lojtarit dhe me çfarë ai po jep në fushë. Ikardi është një kapiten që di të marrë përgjegjësitë, ai nuk ka frikë nga asgjë”.

SITUATA E NEGOCIATAVE – “Dy vite pas rinovimit të kaluar, po tentojmë të arrijmë në një marrëveshje të re. Kemi dërguar prej dy muajsh një propozim, por për momentin nuk është pranuar, por kjo nuk do të thotë se nuk mund të bëjmë më e shumë. E përsëris, nga ana jonë kemi vullnetin e plotë që të vazhdojmë negociatat për të arritur në një marrëveshje përfundimtare. Por, unë dhe klubi i Interit diskutojmë vetëm në zyrat e klubit dhe jo nëpërmjet televizioneve dhe rrjeteve sociale “, tha zyrtari i klubit zikaltër.