Shkumbini në grupin A, Isaj nuk e bën dramë: I shërben garës

Sport Ekspres — Sat, 06 Jul 2019 09:50:18 +0000

Komiteti Ekzekutiv i FSHF-së, në mbledhjen e ditës së premte vendosi të bënte edhe disa ndryshime në grupet e skuadrave të Kategorisë së Parë. Kështu, Iliria dhe Shënkolli, bazuar në kriteret e licensimit, janë kaluar në Grupin B.

Kjo ndodh për shkak se Iliria financohet nga Bashkia Krujë, që financon njëkohësisht edhe Kastriotin. E njëjta situatë edhe me Shënkollin, që financohet nga Bashkia Lezhë. Kjo bashki financon njëkohësisht dhe Besëlidhjen. Edhe para dy sezonesh këto ekipe kanë garuar në grupin B.

Kjo ishte arsyeja që Shkumbini do të luajë në Grupin A të Kategorisë së Parë në sezonin 2019-2020 dhe sekretari i klubit peqinas Astrit Isaj nuk e sheh si ndonjë problem diçka të tillë. “Për ne nuk ka ndonjë problem ky kalim, rëndësi ka që serioziteti i garës rritet në të tilla raste. Duke ju referuar sezoneve të kaluara, gara zbehej kur kishte përballje të skuadrave që administroheshin nga e njëjta bashki”, deklaron Isaji për SportEkspres.com.

Ndërkohë, në lidhje me fillimin e përgatitjeve të Shkumbinit, ai shtoi: “Duke qenë skuadër që administrohemi nga bashkia e Peqinit, zgjedhjet e 30 qershorit e sollën edhe këtë vonesë për nisjen e përgatitjeve për sezonin e ri. Besoj se është punë ditësh, ndoshta në fundjavën tjetër skuadra e Shkumbinit do zbresë në fushë”.

AGRON KAJA

Infrastruktura, merkato dhe Bano: Isaji zbulon planet e Shkumbinit

Sport Ekspres — Thu, 20 Jun 2019 09:20:42 +0000

Në këto ditë të nxehta të qershorit, te Shkumbini vetëm futbollistët e stafi teknik janë me pushime. Gjithë punonjësit e klubit janë në punë për zbatimin e detyrave që ka lënë FSHF-ja për sezonin e ri. Edhe pse stadiumi i Peqinit është i licencuar, sekretari i klubit, Astrit Isaj, deklaron për Sportekspres.com se paralelisht me këto detyra, është punuar edhe për merkaton.

“Kemi për të mbyllur disa detyra nga FSHF-ja dhe me punonjësit e klubit ato do t’i përfundojmë pa nisur sezoni. Gjatë kësaj periudhe lojtarët e stafi teknik janë me pushime deri në 10 korrik, datë në të cilën mendojmë të nisim përgatitjet sezonin e ri.

Gjatë këtij muaji kemi kontaktuar me disa futbollistë këtu në Shqipëri dhe me dy të tjerë të huaj, sepse mendojmë që në Kategorinë e Parë skuadrës sonë i duhen edhe 5-6 përforcime”, deklaroi fillimisht Isaji.

Më tej ai tregon se do të rikonfirmohet edhe trajneri Artan Bano dhe do të mblidhen në klub për të përcaktuar axhendën e punës së përgatitjeve të sezonit. “Deri në fund të muajit qershor do të bëhet rikonfirmimi i trajnerit Bano dhe në dhjetë ditëshin e parë të muajit korrik do të nisim përgatitjet për sezonin e ri.

Kjo nisje me vonesë kushtëzohet edhe nga fakti se Shkumbini është skuadër që administrohet nga Bashkia dhe zgjedhjet e 30 qershorit na kanë imponuar këtë datë. Gjithsesi, këtë sezon Shkumbini do jetë dinjitoz në të Parën”, përfundoi zyrtari i klubip peqinas.

AGRON KAJA