Artan Sakaj

Oriku, Sakaj i gëzohet rinovimeve: Gati të firmosin të gjithë!

Sport Ekspres — Sat, 06 Jul 2019 08:51:25 +0000

Te skuadra e Orikut, lajmi i vetëm gjatë kësaj merkatoje është largimi i Aldo Mitraj, sepse deri tani nuk ka asnjë lëvizje tjetër. Pas përfundimit të sezonit të kaluar më 18 maj, skuadra vetëm ka pushuar, ndërkohë që trajneri Artan Sakaj dhe drejtuesit e klubit kanë hedhur në letër platformën e sezonit të ri.

Duke qenë se janë klub me administrim bashkiak, zgjedhjet e 30 qershorit ishin stacioni i fundit i pushimeve, për të nisur përgatitjet e sezonit të ri. “Për ne rëndësi ka që pjesa më e madhe e futbollistëve me të cilët mbyllëm sezonin e kaluar, janë të gatshëm që të rinovojnë edhe për sezonin e ri.

Deri tani kemi e patur të detyruar pushimin gjatë kësaj kohe dhe kemi vetëm një largim, Aldo Mitrajn. Më 15 korrik është menduar nisja e përgatitjeve, të gjithë futbollistët e tjerë do jenë në Orikum atë ditë”, deklaroi trajneri Artan Sakaj për SportEkspres.com.

AGRON KAJA

Sakaj: Skuadra e konsoliduar, merkato me pikatore

Sport Ekspres — Wed, 19 Jun 2019 09:20:19 +0000

Oriku bëri një sezon të suksesshëm vjet, duke e mbyllur kampionatin në vendin e tretë. Tashmë të gjithë janë me pushime, por ato do të përfundojnë shpejt. Kështu shprehet trajneri Artan Sakaj, i cili po përgatitet të nisë nga puna në ditët e para të muajit korrik.

“Skuadra vazhdon pushimet dhe së shpejti drejtuesit e klubit do mblidhen për të përcaktuar gjithçka në nisje të sezonit të ri. Besoj se në ditët e para të muajit korrik skuadra e Orikut do të nisë përgatitjet për sezonin e ri”, u shpreh Sakaj fillimisht për SportEkspres.com.

Sa i takon merakos, ish-mbrojtësi i Flamurtarit deklaron: “Merkato është domosdoshmëri në çdo periudhë, por ne e kemi të konsoliduar skuadrën. Nuk kemi nevojë për shumë ndërhyrje. Maksimumi do të shohim për ndonjë sulmues, por edhe për këtë pasi të flasim me drejtuesit e klubit për piketat e merkatos”.

AGRON KAJA

Oriku, Sakaj mesazh të rinjve: Tregoni se sa vleni!

Sport Ekspres — Fri, 12 Apr 2019 11:54:44 +0000

Oriku po bën një fazë të tretë të qetë, pasi qëndrimin në Kategorinë e Parë e siguroi që në mbyllje të fazës së dytë të kampionatit. Ai ishte objektivi dhe tanimë mendojnë për ndeshjen e radhës me Egnatian në Berat. Gjatë këtyre ndeshjeve ka pasur hapësira për të rinjtë. Për këta të fundit ka edhe një mesazh nga ana e trajnerit Artan Sakaj.

Për SportEkspres.com, ish-mbrojtësi i Flamurtarit deklaron: “Nuk e kemi nënvlerësuar garën në fazën e tretë, edhe pse synimi ynë për këtë sezon u realizua. Në çdo ndeshje u kemi dhënë hapësira të rinjve, kështu do të ndodhë edhe në ndeshjen e radhës. Por edhe të rinjtë ta tregojnë veten sa vlejnë, të mos e ndjejnë veten thjesht për numër në organikën e skuadrës”.

Ndërkohë, për ndeshjen me Egnatian Sakaj shprehet: “Asnjë ndeshje nuk nënvlerësohet nga ana jonë. Gara është serioze dhe duhet respektuar nga java e parë e deri tek e fundit. Kështu, sfida e radhës me Egnatian mendoj se do të jetë e hapur për çdo rezultat. Ne do të luftojmë që të mos dalim pa pikë”.

AGRON KAJA

Sakaj nuk i trembet transfertës: Me Apoloninë “skanojmë” renditjen

Sport Ekspres — Fri, 15 Feb 2019 12:26:22 +0000

Oriku është njera nga skuadrat e Kategorisë së Parë, që në debutimin e saj në këtë kategori synon renditjen në pesë të parat e Grupit B. Në 16 javët e luajtura kjo skuadër ka arritur 6 fitore, 6 barazime dhe 4 humbje dhe kështu numëron 24 pikë të grumbulluara.

Aktualisht ndodhet në grupin e katër skuadrave që kërkojnë pesëshen e parë, së bashku me Egnatian, Lushnjen, Apoloninë e Pogradecin. Në ndeshjen e parafundit të fazës së dytë, Oriku luan në transfertë në Fier me Apoloninë, sfidë kjo me një nga rivalët direkt për pesëshen e parë.

Për SportEkspres.com, trajneri i Orikut, Artan Sakaj, deklaron se kjo është një ndeshje shumë e vështirë, por që nuk e ndalon skuadrën e tij të kërkojë maksimumin. “Kampionati është i vështirë, nga fillimi e deri në fundin e tij. Kështu që ndeshja në Fier është vështirësia e radhës për Orikumin. Ne do të luajmë për të marrë maksimumin nga kjo sfidë, sepse është vendimtare për renditjen në pesë skuadrat e para të Grupit B”.

AGRON KAJA

Sakaj para sfidës me Egnatian: Duhet kujdes, përgjysmimi i pikëve i rrezikshëm!

Sport Ekspres — Sun, 03 Feb 2019 08:51:42 +0000

Java e 15-të e Kategorisë së Parë, në Grupin B ofron një përballje interesante, ku të dyja skuadrat do të luajnë në transfertë. Kjo është ndeshja Egnatia-Orikumi, e cila sot luhet në stadiumin e Peqinit, një transfertë e dyfishtë që trajneri i Orikumit, Artan Sakaj e quan një rrethanë lehtësuese për skuadrën e tij, por sfidë të vështirë. Ndërsa përgjysmimin e pikëve në fazën e tretë Sakaj e quan të rrezikshëm për të gjitha skuadrat në Kategorinë e Parë.

Për SportEkspres.com, vlonjati deklaron se çdo kundërshtar është i fortë, pavarësisht ku luhet ndeshja dhe renditjes që kanë në tabelë. “Transferta jonë në Peqin ndaj Egnatias mund të quhet e dyfishtë për të dyja skuadrat, e kështu mund të duket edhe një rrethanë lehtësuese për ne. Pavarësisht fushës ku luhen ndeshjet, apo edhe renditjes që kanë skuadrat, të gjitha përballjet janë të barabarta për nga rëndësia e synimi”, kështu deklaron trajneri Sakaj një ditë para sfidës me Egnatian.

Përgjysmimi i pikëve në fazën e 3-të për Sakajn duket i rrezikshëm për çdo skuadër, ndërkohë që sot në fushë për Orikumin do të jetë edhe afrimi i merkatos së janarit, Aldo Mitraj. “Faza e tretë i përgjysmon pikët, dhe kjo duket e rrezikshme në kuptimin sportiv për çdo skuadër. Gjithsesi, ne do bëjmë maksimumin tonë që të ngjitemi në pesë skuadrat e para të Grupit B. Ndaj Egnatias në fushë do të kemi edhe lojtarin me përvojë Aldo Mitraj”.

AGRON KAJA

Sakaj gjen “fajtorët”: Na kanë penalizuar terrenet dhe dëmtimet

Sport Ekspres — Sat, 29 Dec 2018 09:24:23 +0000

Në 14 javët e luajtura në Kategorinë e Parë, skuadra e Orikut si debutuese u rendit në vendin e 6-të me 18 pikë, duke lënë pas skuadra si Apolonia, Tomori dhe Elbasani. Por trajneri Artan sakaj, deklaroi për SportEkspres.com se nuk është i kënaqur me këtë renditje.

“Me punën që kemi bërë, skuadra e Orikumit duhet të ishte në pozicione më lart në renditje, pse jo në pesë skuadrat e para të Grupit B. Ndoshta këtu ka vend edhe për punë më të detajuar nga ana ime si trajner”, kështu theksoi trajneri i Orikut, Artan Sakaj, i cili për këtë situatë ka gjetur edhe “fajtorë” të tjerë.

“Ne jemi munduar që t’i eliminojmë ndeshje pas ndeshje mangësitë që kemi konstatuar, por terrenet sportive dhe dëmtimet që kemi patur në këto 14 javë kanë qenë realisht pengesat kryesore që skuadra nuk arriti renditje më të mirë. Për pjesën tjetër të sezonit do të kërkoja më shumë ego në fushë nga skuadra”.

Për këtë periudhë pa aktivitet zyrtar, Sakaj deklaron se Oriku rinis përgatitjet më 7 janar 2019, ku veç përgatitjeve është menduar edhe për merkato. “Deri në fillimin e pjesës së dytë të këtij sezoni, kemi menduar që krahas përgatitjeve që do të nisin në datën 7 janar, të jemi prezentë në merkato vetëm me futbollistë që të bëjnë diferencën nga këta që kemi aktualisht. Oriku do të synojë renditjen në pesë skuadrat e para të Grupit B”.