Arsid Kruja

Ekskluzive | Kruja nuk duron më, vë në vështirësi Flamurtarin e Disiplinën

Sport Ekspres — Thu, 07 Feb 2019 20:26:49 +0000

Ende asnjë zgjidhje nuk ka për Arsid Krujën, i cili kërkon që Flamurtari të ekzekutojë vendimin e marrë nga Dhoma Kombëtare e Zgjidhjes së Konflikteve në nëntor të vitit 2016. Klubi vlonjat i detyrohet mesfushorit shkodran 16 mijë euro, plus shpenzimet gjyqësore që janë paguar prej vetë futbollistit.

Kërkesa e bërë nga Kruja në gusht të vitit 2018

Kruja në muajin gusht iu drejtua klubit vlonjat për ta shlyer dhe për këtë vuri në dijeni edhe Federatën Shqiptare të Futbollit. Sërish asnjë qindarkë për mesfushorin, i cili ka qenë pjesë e Flamurtarit në pjesën e dytë të sezonit 2014-2015. Nisur nga situata e krijuar, shkodrani ka ndërmarrë hapin tjetër.

Këtë herë ai i është drejtuar Komisionit të Disiplinës, duke kërkuar ekzekutimin e vendimit në harkun kohor të 7 ditëve, ndryshe do ta ndjekë çështjen në instanca të tjera. Sikurse shihet në shkresën e siguruar nga “SportEkspres.com”, kërkesa është bërë më 31 janar.

Komisioni i Disiplinës, i mbledhur më 5 shkurt, as që e ka vënë në ujin në zjarr ta shqyrtojë kërkesën e bërë nga mesfushori. Në fund të muajit janar, konkretisht me datë 30, Disiplina për të tretën herë dha ultimatum për Tiranën që të shlyejë Gjergji Muzakën. Gjithashtu edhe Luftëtari për 30 ditë duhet të shlyejë futbollistin Kejdi Balla.

Çështja e Arsid Krujës mbetet pezull, por ka edhe më keq. Që prej majit të vitit 2018 ka kërkuar edhe Yll Hoxha të ekzekutohet vendimi i Dhomës Kombëtare të Zgjidhjes së Konflikteve. Gjithsesi Disiplina nuk e ka marrë në konsideratë kërkesën e futbollistit të Feronikelit, që kërkon nga klubi i Flamurtarit 11 mijë eurot që DHKZK ia ka njohur në përballjen mes palëve në gjyq.

VLADIMIR PRENGA

Ekskluzive | Kruja do milionat, Flamurtari e Disiplina “heshtin”

Sport Ekspres — Sun, 20 Jan 2019 20:18:08 +0000

Arsid Kruja kërkon atë çka i takon nga Flamurtari. Mesfushori shkodran ka qenë pjesë e vlonjatëve në pjesën e dytë të sezonit 2014-2015 dhe pretendimet e tij për pagat e padhëna i janë njohur edhe nga Dhoma Kombëtare e Zgjidhjes së Konflikteve. Në nëntor të vitit 2016 u vendos që Flamurtari të shlyente detyrimet e gjyqit dhe 16 mijë euro të tjera për pagat që Kruja duhet të kish marrë gjatë eksperiencës së tij me kuqezinjtë.

https://www.facebook.com/F.C.Flamurtari.al/photos/a.752279004843364/808440282560569/?type=3&theater

Ende asnjë qindarkë nuk ka kaluar në llogarinë e mesfushorit 25-vjeçar. Kruja ka pritur që Flamurtari ta zgjidhë këtë problematikë, por asnjë sinjal. Për këtë arsye shkodrani në fund të muajit gusht ju drejtua klubit vlonjat me një shkresë ku kërkohej zbatimi i vendimit që kishte dhënë Dhoma Kombëtare e Zgjidhjes së Konflikteve.

SportEkspres.com ju sjell dokumentin e dorëzuar dhe protokolluar në FSHF, ndërkohë që mësojmë se Kruja ka gati edhe hapin tjetër që do të ndërmarrë. Ai pritet t’i drejtohet Komisionit të Disiplinës që ta zbatojë vendimin. Kështu, nga momenti që kjo çështje do shqyrtohet, Flamurtari do ketë 30 ditë kohë për ta shlyer futbollistin aktual të Vllaznisë.

Nëse nuk e bën diçka të tillë, atëherë i hiqen 3 pikë dhe deri në shlyerjen e borxhit ndaj futbollistit masa përshkallëzohen. Gjithsesi mbetet për t’u parë se çfarë do të ndodhë në Disiplinë, aty ku është dërguar prej majit 2018 edhe kërkesa për ekzekutimin e vendimit të gjyqit nga Yll Hoxha, që ende nuk është shqyrtuar.

VLADIMIR PRENGA

Buzëqesh Lika, Vllaznia përforcon krahët e sulmit

Sport Ekspres — Mon, 14 Jan 2019 11:07:38 +0000

Rikthimi në Superiore është objektivi i vetëm i Vllaznisë dhe drejtuesit e ekipit shkodran po bëjnë maksimumin për të përforcuar kontingjentin e lojtarëve të Hasan Likës. Diçka e tillë ka ndodhur dhe Vllaznia ka rikthyer në ekip Arsid Krujën, siç lajmëron klubi verior në rrjetet sociale.

25-vjeçari, i cili aktivizohet në rolin e mesfushorit të krahut, ishte pjesë e Teutës në pjesën e parë të sezonit, aty ku e nisi mirë, por më pas minutat e lojës munguan. Suad Lici, administratori i deleguar i kuqebluve, ka arritur akordin me lojtarin, i cili nuk është hera e parë që rikthehet në Shkodër.

Kruja ka firmosur për 1 vit e gjysmë me Vllazninë, pjesë e së cilës do të jetë deri në verën e vitit 2020. Lojtari nuk ka humbur kohë dhe ka dalë ditën e sotme në stërvitje me ekipin, ndërsa klubi i Vllaznisë i uron mirëseardhjen në ekip.

Sërish lëvizje te Teuta, zyrtarizohet largimi i dytë

Sport Ekspres — Fri, 28 Dec 2018 20:50:03 +0000

Klubi i Teutës ka njoftuar me anë të një postimi në llogarinë zyrtare në “Facebook”, ndërprerjen e bashkëpunimit me futbollistin shkodran Arsid Kruja. Sulmuesi anësor largohet nga skuadra durrsake një vit mbasi u transferua në këtë ekip nga Vllaznia e Shkodrës.

Kruja e filloi mbarë sezonin, duke qenë titullar në tre takimet e para të Teutës në Superiore, por më pas sulmuesi i krahut nuk u përzgjodh më kurrë si titullar dhe gjatë tre muajve të ardhshëm, u aktivizua vetëm pesë herë si zëvendësues.

NJOFTIMI I TEUTËS NË “FACEBOOK”

Ky është largimi i dytë nga skuadra e Teutës gjatë merkatos së dimrit, pasi më skuadra durrsake u largua mbrojtësi maqedonas Bojan Gjorgievski.

Frashëri afrimi i vetëm, Teuta gati “divorcin” me dy lojtarë

Sport Ekspres — Fri, 28 Dec 2018 13:53:07 +0000

Bojan Gjorgievski ishte i pari që u largua nga Teuta, ndërkohë që do të ketë edhe të tjerë lojtarë që pritet ta mbyllin bashkëpunimin me durrsakët. Njëri prej tyre është Arsid Kruja, shkodrani që u duk se gjeti formën e tij në sezonin e shkuar dhe në fillim të këtij kampionati po luante titullar.

Gjithsesi, me rikuperimin e Sherif Kallakut nisi të ketë më pak hapësira për të dhe largimi tashmë është zgjidhja më e mirë për shkodranin dhe klubin e Teutës. Alternativat për Shkëmbin nuk mungojnë, ndërkohë që do të ketë edhe afrime të tjera.

BICAJ – Lezhjani i mbrojtjes nuk është aktivizuar në takimet e fundit te Teuta. Kjo për shkak të një dëmtimi që shtatlarti pësoi dhe e la për disa kohë jashtë fushave të blerta. Por, sipas asaj që raportohet në “Supersport”, palët janë drejt “divorcit”.

Për të ardhur te largimi duhet gjetur një marrëveshje dhe deri më tani një e tillë nuk është gjetur. Gjithsesi nuk besohet se do të vonojë gjetja e gjuhës së përbashkët për ndërprerjen e kontratës në mënyrë konsensuale.