Ikën pa i mbaruar huazimi, Kastrioti humb një titullar

Sport Ekspres — Wed, 29 May 2019 10:21:16 +0000

Kastrioti në janar bëri disa përforcime dhe një prej lojtarëve të marrë në momentet e fundit ishte shkodrani Arlind Kalaja. Mesfushori me tipare ofensive u mor nga Kukësi në formë huazimi dhe sezonin e ardhshëm mbetet për t’u parë se ku do të aktivohet.

Me Kastriotin e ka mbyllur bashkëpunimin. Në tre ndeshjet e fundit nuk ka qenë i grumbulluar dhe në fakt pritej largimi i tij dhe për shkak të marrëveshjes 6-mujore. Kalaja do të duhet të rikthehet te Kukësi, që duhet të vendosë se çfarë do të bëjë me të sezonin e ardhshëm.

Me Kastriotin Kalaja arriti të luante në 12 ndeshje dhe vetëm njërën prej tyre e nisi nga stoli. Shkodrani nuk ia doli dot të shënonte gol, por hapësirat i pati për të treguar vlerat e tij. Te Kukësi, në 12 ndeshje që luajti në total në pjesën e parë të sezonit, vetëm një e kishte nisur si titullar.

Kalaja sinjale pozitive, një mungesë e sigurt për Cungun

Sport Ekspres — Fri, 20 Jul 2018 17:11:55 +0000

Kukësi po përgatitet për ndeshjen e parë me Karabakun dhe për trajnerin Armando Cungu grupi është thuajse i plotë. I vetmi lojtar me probleme është mesfushori i avancuar Arlind Kalaja. Shkodrani ka nisur sot përgatitjet, por nuk ia ka dalë dot të ndjekë hapin e shokëve të skuadrës.

Anësori i afruar këtë verë nuk është përfshirë në listën e Kukësit për ndeshjet e Europës, pasi pati një dëmtim që do ta lërë edhe për pak kohë jashtë fushave të blerta. Pjesën e dytë të seancës së sotme ai e realizoi i diferencuar.

Ndërkohë sa i takon Rustem Hoxhës, mbrojtësi ka punuar normalisht me grupin dhe duket se e ka kaluar problemin në gju, që e la jashtë në dy ndeshjet me maltezët e Valetas. Me grupin po punon edhe i riu Toni Selimi, i cili ka zhvilluar me Kukësin fazën përgatitore në Slloveni. Mungesë e sigurt me Karabakun është Vangjel Zguro, i ndëshkuar me karton të kuq.