Arjan Sheta

Plori nis të ndërtojë Besëlidhjen, akord me Shetën e Kolecin

Sport Ekspres — Thu, 04 Jul 2019 14:55:53 +0000

Vendosja e Elvis Plorit në pankinën e Besëlidhjes i hapi rrugën merkatos te skuadra lezhjane, njëherësh edhe organizimit për fillimin e përgatitjeve për sezonin e ri. Më 15 korrik nisin përgatitjet, ndërkohë që në gjysmën e dytë të këtij muaji është deklaruar se do të ketë testime lojtarësh dhe afrime.

Në muajin gusht do të zhvillohet një fazë e mirëfilltë përgatitore, me një ekip të konsoliduar. Normalisht do të zhvillohen edhe ndeshje miqësore. Sa i takon merkatos, mësohet se te skuadra lezhjane ka patur zhvillime së fundmi. Arian Sheta pritet të firmosë, sikurse edhe mesfushori Aristotel Koleci.

“Po, kam rënë dakord me drejtuesit e skuadrës së Besëlidhjes. Tashmë vetëm zyrtarizimi mungon për kalimin tim në këtë skuadër”, deklaroi Arian Sheta për Sportekspres.com, menjëherë pas mbylljes së bisedimeve me drejtuesit e skuadrës lezhjane.

Drejtuesit e Besëlidhjes kanë zhvilluar bisedime edhe me mesfushorin Aristotel Koleci, i cili në sezonin e kaluar ka qenë pjesë e Tomorit në Kategorinë e Parë. Me këta dy futbollistë shkon në tre numri i lojtarëve të afruar gjatë kësaj merkatoje te Besëlidhja, ndërkohë që trajneri Plori nuk mendon të ndalet. “Do kemi emra të tjerë shumë shpejt”, deklaron trajneri i Besëlidhjes.

AGRON KAJA

Sheta: Rinovimet nisin shpejt, do synohen emra për Superioren

Sport Ekspres — Mon, 17 Jun 2019 08:34:56 +0000

E gjithë skuadra e Dinamos që mbylli sezonin e kaluar në Kategorinë e Parë, në këtë periudhë janë me pushime. Gjithsesi lajmet e merkatos nuk e kanë shmangur edhe këtë skuadër, që së pari do duhet ta nisë me rinovimet e titullarëve, si Arjan Sheta, Ervis Kaja, Jetmir Sefa, Ilir Allmuça, Erxhan Muça, Marlind Nuriu dhe Rei Nuriu.

Kapiteni 38-vjeçar, Arian Sheta, deklaron se ai është i pari që do të kontaktojë me drejtuesit e skuadrës. Për SportEkspres.com, qendërmbrojtësi pranoi se nuk ka rinovuar ende me dinamovitët. “Skuadra është e gjitha me pushime dhe rinovimet besoj se do vijnë shumë shpejt, pse jo këtë muaj. Unë jam kapiteni i skuadrës e do jem i pari që do bisedoj me drejtuesit e sponsorët për startin e sezonit të ri”, u shpreh Sheta.

Për emrat që Dinamo do të kërkojë në merkato, Sheta deklaron se do jenë shumë cilësore: “Dinamo këtë sezon do synojë ngjitjen në Kategorinë Superiore dhe futbollistët që do të merren gjatë kësaj merkatoje do jenë cilësorë. Dinamo këtë e tregoi edhe në sezonin e kaluar, ndërsa për këtë sezon që do të nisim, do jetë më e fortë dhe më e bindur te objektivi për Superioren”.

AGRON KAJA

Sheta: Dinamo e ka bazën, do e shikoni vitin tjetër!

Sport Ekspres — Fri, 19 Apr 2019 08:01:57 +0000

Mund të jetë futbollisti me moshë më të madhe në Kategorinë e Parë, por 38-vjeçari Arian Sheta nuk ndjehet inferior te skuadra e Dinamos. Edhe pse ka shumë futbollistë të rinj, mbrojtësi me përvojën e tij dhe gjendjen që ka, ka marrë edhe shiritin e kapitenit te blutë.

Me një mbështetje të fuqishme financiare, te kjo skuadër janë afruar disa futbollistë të rinj dhe premtues për të ardhmen. Për situatën te skuadra blu, Sheta tregon për SportEkspres.com se ky sezon quhet i mbyllur, por grupi do ruhet për sezonin tjetër.

“Synimi ynë final nuk u arrit për të qenë në krye të Grupit A. Gjithsesi, ne e kemi vazhduar garën me seriozitet, edhe pse në përbërjen tonë ka një grup me futbollistë të rinj premtues. Ata do të jenë baza për skuadrën në sezonin tjetër. Te Dinamo ka një ambient shumë profesionist dhe kjo na jep më shumë motiv për një sezon të ri drejt Superiores”, u shpreh Sheta.

Mes të rinjsh mbrojtësi ndihet mirë, teksa deklaron: “Unë nuk ndjehem inferior, mosha ime është e padukshme në pjesën tjetër të skuadrës. Me këtë përbërje, unë e them me bindje se ky grup i ka bashkuar të gjitha të mirat që i duhen një skuadre. Në sezonin tjetër do shikoni një Dinamo që do rikthehet në emrin e madh të saj”.

AGRON KAJA