Arijanet Muriqi

Muriç huazohet në Championship, Siti i jep një dorë me kontratën

Sport Ekspres — Tue, 09 Jul 2019 10:11:40 +0000

Arijanet Muriç nuk do të jetë pjesë e Mançester Sitit sezonin e ardhshëm. Portieri i kombëtares kosovare do të jetë pjesë e klubit të Notingem Forest në Championship. Lajmin e ka bërë të ditur vetë klubi i ri i talentit shqiptar. Në deklaratë shkruhet se Muriç do të jetë pjesë e Forest për një vit me formulën e huazimit.
Ndërkohë, mësohet se Siti është kujdesur shumë që të sigurojë shumë minuta për 20-vjeçarin. Sipas medieve angleze, “Qytetarët” në kontratë kanë vendosur një klauzolë të veçantë. Portieri duhet të luajë të paktën 20 ndeshje gjatë sezonit të ardhshëm. Në rast të kundërt Forest duhet të bëhet gati të paguajë një “gjobë” ndaj klubit nga Mançesteri.

Siti kishte dyshime nëse duhej apo jo që ta largonte Muriç dhe në fund kanë marrë këtë vendim. Gardiani ka treguar një nivel shumë të mirë sa herë e ka thirrur detyra. Për momentin portieri Ederson qëndron i qetë mes katërkëndëshit të skuadrës së Guardiolës, por një talent si Muriç shumë shpejt mund ta rrezikojë.

?? He’s a keeper!#NFFC are delighted to announce the arrival of goalkeeper Arijanet Muric on a season-long loan from @ManCity. pic.twitter.com/1W1Pj1QaCO

— Nottingham Forest FC (@NFFC) July 9, 2019

Muriç drejt huazimit, klubi anglez shfaq interes

Sport Ekspres — Fri, 17 May 2019 15:26:27 +0000

“Gardiani” i përfaqësueses së Kosovës, Arijanet Muriç, ka kaluar një sezon me pak aktivizime te Mançester Siti. Pep Guardiola ia ka besuar çelësat e portës në vetëm pesë raste, kryesisht në ndeshjet e kompeticioneve dytësore si ‘FA Cup’ dhe ‘Carabao Cup’.

Pavarësisht aktivizimeve të pakta, Muriç ka filluar të tërheqë interesin e klubeve të ndryshme në Angli. Portali pranë skuadrës së Preston North End, “deepdaledigest.com”, raporton se drejtuesit e ekipit që militon në Championship kanë shfaqur interes për të huazuar 20-vjeçarin për sezonin e ardhshëm.

Klubi i Preston bashkëpunon prej vitesh me Mançester Sitit. Përgjatë viteve të fundit shumë talente premtues të akademisë së kampionëve të Anglisë janë huazuar te skuadra modeste.

Një tjetër fakt që largon portierin e Kosovës nga Mançester Siti është riaftësimi i kilianit Klaudio Bravo, kontrata e të cilit me Sitin zgjat edhe për një sezon.

Muriç gjithmonë e më larg Sitit, Guardiola gjen portier në SHBA

Sport Ekspres — Tue, 27 Nov 2018 18:27:07 +0000

Portieri i Kosovës, Arijanet Muriç, nuk bënte pjesë në planet e Mançester Sitit në fillim të sezonit, por dëmtimi i papritur i Kladio Bravos, detyroi drejtuesit e klubit kampion të Anglisë të anulonin huazimin e 20-vjeçarit te skuadra holandeze e NAC Bredës.

Që prej rikthimit të shpejtë te “qytetarët”, Muriç është aktivizuar tri herë në “FA Cup” dhe “Carabao Cup”. Por, mesa duket aventura e 20-vjeçarit te kampionët e Anglisë do të ndërpritet përkohësisht në muajin janar.

Zak Stefen – Portieri i Kolombus Kru dhe kombëtares amerikane

Sipas raportimeve nga mediet amerikane, Mançester Siti ka mbyllur me sukses negociata mbi transfertën e portierit të Kolombus Kru, Zak Stefen, për kartonin e të cilit qytetarët kanë paguar diku te 10 milionë dollarë. “Gardiani” amerikan do t’i bashkohet skuadrës së Pep Guardiolës më datë 1 janar. Ardhja e Stefen në skuadër do t’i mundësojë Muriçit të huazohet sërish në një ekip ku minutat për të jenë të bollshme.

FIFA gëzon Kosovën, Muriqi merr “OK”-in

Sport Ekspres — Wed, 14 Nov 2018 19:47:41 +0000

Kosova kërkon të ruajë vendin e parë në grupin e saj në Nations League, ndërkohë që trajneri Bernard Shaland do të ketë në dispozicion disa prurje të reja për ndeshjen me Maltën dhe Azerbajxhanin.

Fillimisht FIFA dha “OK”-in që të luajnë me dardanët sulmuesi Shkëlqim Demhasaj dhe mbrojtësi Mirlind Kryeziu, kurse sot aprovimi është dhënë edhe për portierin Arijanet Muriqi. Ky i fundit në të shkuarën është aktivizuar me Malin e Zi U21.

Muriqi, i cili është pjesë e Mançester Sitit në Angli, u ftua për herë të parë nga Shaland dhe është një lojtar me perspektivë. Ai mund të ketë shanse edhe të debutojë me Kosovën që tani, duke parë se Samir Ujkani nuk po aktivizohet te Rizespori në Turqi.

Gjithsesi mbetet për t’u parë, pasi portieri me eksperiencë mban shiritin e kapitenit te përfaqësuesja e Kosovës. Visaj Bekaj është portieri tjetër i ftuar nga Shaland për ndeshjet me Maltën dhe Azerbajxhanin.

Lajm i mirë për Kosovën, portieri i Sitit aplikon për pasaportë

Sport Ekspres — Fri, 12 Oct 2018 18:10:57 +0000

Përfaqësueses së Kosovës do t’i afrohet së shpejti një përforcim mëse i nevojshëm. Bëhet fjalor për Aarijanet Muriqin, portieri 19-vjeçari i Mançester Sitit, i cili ka vendosur gjatë javëve të fundit të ndërrojë përfaqësuese, pasi në të kaluarën është aktivizuar me moshat e Malit të Zi.

Muriqi është i lindur në Zvicër dhe me origjinë nga një familje shqiptare e Malit të Zi. Portieri është formuar në akademinë e Zyrihut dhe para dy vitesh kaloi te ekipet e moshave të Sitit. Në fillim të këtij sezoni Muriqi u huazua në Holandë te NAC Breda, por dëmtimi i rëndë i Klaudio Bravos, bëri që Guardiola të thërriste në skuadër si portierin rezervë të kampionëve të Anglisë për këtë sezon.

Ditën e sotme, 19-vjeçari është paraqitur në konsullatën e Kosovës në Zyrih të Zvicrës, ku ka kryer procedurat e nevojshme për marrjen e pasaportës. Muriqi është 198 centimetra i gjatë, një gjatësi kjo që konsiderohet tepër e rrallë edhe në nivel portierësh.