Tryeza “Siguri-Reformim-Modernizim” ka 102 ditë që është mbledhur. Nga atëherë ka pasur edhe takime të FSHF-së me Ministrinë e Financave dhe Ekonomisë. Vetë kreu i federatës, Armand Duka, e ka thënë edhe më parë që kërkesat e tyre nuk do të plotësohen nga qeveria. Takimet e bëra e kanë bindur atë.

FSHF hartoi edhe një draft, duke u konsultuar edhe me klubet. Kërkesat ishin këto: “Formalizimi i klubeve profesioniste, duke bërë 0 tatimin mbi të ardhurat dhe sigurimet shoqërore të tyre për sa paku 5 vite. Tvsh 0 për investimet në sport dhe materialet sportive, terrenet sportive t’u kalojnë klubeve pa shpërblim, për çdo investim në infrastrukturë nga klubet qeveria të kontribuojë me 50 %, disa ndryshime në Ligjin për Sportin, disa ndryshime në Kodin Penal për të mbrojtur atmosferën sportive, hartimin e Ligjit të Sponsorizimit në Sport, ku kompanive 30% e taksave u zbriten për investime në sport”.

ÇFARË DEKLARONTE RAMA – Më 11 mars, përpara mediave dhe përfaqësuesve të botës së sportit, Rama deklaronte: “Duhet t’i japim fund teatrit që bëjnë klubet shqiptare në aspektin e deklarimit të pagave të lojtarëve. Boll më me lojtarë që deklarohen paguhen sikur punojnë në fasoneri. Kjo nuk mund të vazhdojë. Jemi të gatshëm ta zerojmë tatimin nga fitimi për lojtarët për disa vite me kushtin që të deklarohen të ardhurat e futbollistëve.

Dhe kohën ta përcaktojmë, 5, 7 apo 10 vjet. Duhet te heqim taksat mbi ndërtimet sportive, njësoj siç kemi bërë për Hotelet me 5 yje, për Agro-Turizmin, s’kemi pse mos ta bëjmë për ndërtimet sportive, si dhe uljen në 6% të TVSH. Nuk është se ne jemi duke ndërtuar stadiume në të katër anët e vendit dhe po na goditet buxheti. Është një fazë që kemi nevojë për t’i dhënë një shtytje përpara futbollit, dhe për ta kthyer futbollin nga një aktivitet të organizuar me pasion dhe tifozllëk në një industri të mirëfilltë”.

SITUATA AKTUALE – Asgjë nuk ka ndodhur. Sot pritej të kalonte ligji që dënon dhunuesit në stadiume, por edhe ai nuk kaloi. Për paketën e re fiskale apo propozimet që FSHF ka bërë në emër të klubeve, ende qeveria nuk është gati të krijojë lehtësira dhe t’i japë “oksigjenin” e nevojshëm sportit dhe futbollit në veçanti. Ardjan Takaj e dinte se do ndodhte kështu, gjithashtu edhe shumë të tjerë e kanë menduar. Fundja nuk është se nga politika ka ardhur ndonjë e mirë për sportin, veç ndonjë stadiumi që detyrimisht duhet të jetë multifunksional. Për të parë të bëhet një fushë stërvitore, ndoshta duhet pritur viti 2354…

VLADIMIR PRENGA

“Lojtarët që janë te kombëtarja bashkohen sot me ne. Ka qenë motivim dhe kënaqësi për ne. Grupi bëhet më i fortë me ta. Jemi stërvitur normalisht, si në fillim të kampionatit. Jemi profesionistë dhe të gjithë paguhemi të stërvitemi dhe të tregojmë vlerat, sikurse kemi bërë gjithë vitin”.

“Jemi të kënaqur dhe të lumtur, djersa e tyre është shpërblyer. Është pozitive që e ka bërë këtë zbor trajneri i kombëtares. E rëndësishme është që këto të katër kanë marrë frytet e punës së tyre. Ne jemi të kënaqur, ashtu si edhe shokët e tyre. Zgjedhjet i takojnë Rejës, por me rëndësi është që sheh kampionatin dhe duket se do t;i japë hakun secilit. Shpresoj që nga kampionati ynë të marrin shanse. Është detyra e tij të zgjedhë. Ai mundohet të bëjë përzgjedhjen më të mirë, ku është vështirë të futet kushdo. “Asani? Nuk ka ndikuar tek ai. Çdo lojtar që ka pasaportë shqiptare ka të drejtën morale të dëshirojë të bashkohet, sidomos kur ka shënuar gola. Është zgjedhja e Rejës”.

BATUTA E GJUNJËVE – “Gjoka dhe Gjici janë përgjegjës për çfarë ndodh te Kukësi dhe si janë gjunjët e Kukësit. Kjo ishte thjesht një batutë e një presidenti që ka vite në Superiore dhe ka sjellë disa risi ndër vite. Unë e kam thënë me parë që koha do të tregonte si i kishim gjunjët”.

TAKIMI ME TAKAJN – “Presidenti Takaj është shoku im prej 30 vitesh, kam luajtur futboll moshash me të. Isha me familjen e takova rastësisht. Me një celular Samsung mund të besh filma këto ditë. Unë jam pjesë e Partizanit dhe nuk mund të ndryshoj”.

Gjithsesi është presidenti Ardjan Takaj ai që lëshon një mesazh për rivalët. E bën diçka të tillë përmes rrjeteve sociale. Në llogarinë e tij në “Facebook” ai ka postuar logon e Skënderbeut, ndërkohë që mesazhi është i qartë: “Në jemi Skënderbeu, këtë mos e harroni”.

SITUATA TE SKËNDERBEU – “Nuk po ndodh ndonjë gjë, është normale në futboll. Ka ulje dhe ngritje. Dihej që do kishim probleme, pasi ikën 10 lojtarë që u zëvendësuan me të rinj. Ata janë të mirë, por duan kohën e vet të ambientohen. E nisëm mirë, por në katër ndeshjet e  fundit nuk morëm rezultatet e duhura. Janë shumë katër ndeshje pa fitore. Duhet të shohim përpara, çdo gjë e kemi në dorë deri në fund të kampionatit”.

TITULLI – “Nuk heqim dorë, nuk është Skënderbeu nga ata që tërhiqen. Do jetë gabim i madh kush e mendon diçka të tillë. Shtatë pikë nuk janë shumë, janë gjashtë ekipe që luftojnë për kreun. Edhe ekipet e tjera luftojnë për mbijetesën, ndaj do jetë garë e fortë. Për katër javë mund të ndryshojë gjithçka. Do jetë një kampionat i vështirë”.

LOJTARËT – “Nuk kam zhgënjime, e nisëm mirë dhe krijuan besim te trajneri dhe te ne. Faza e parë ishte shumë e mirë. Një pjesë e tyre nuk e mbajtën ritmin. Nuk i di arsyet, ndoshta mosha e re, eksperienca. Pak nga të gjitha do kenë ndikuar. Edhe disa mungesa kanë ndikuar, nuk kemi pasur atë stolin solid të viteve të fundit”.

PRITSHMËRITË – “E rëndësishme të jemi seriozë dhe ta nisim si në fazën e parë. Nëse japim maksimumin, ne jemi të rrezikshëm për këdo. Skënderbeu nëse ul ritmin, atëherë është problem. Them për këtë ekip, pasi vjet fitonin edhe duke e ulur ritmin. Ky ekip nuk e ka atë eksperiencë dhe ato cilësi. Nëse japin maksimumin, janë ekipi më i mirë”.

MERKATO – “Janë 2-3 lojtarë me të cilët po punojmë. Mos prisni shumë. Merkato e janarit është një zhurmë e madhe. Kemi shpenzuar shumë dhe kanë qenë pa rezultat. Siç është kampionati ynë, janë edhe të tjerët. Asnjë nuk i lëshon lojtarët e mirë. Duhet të blesh lojtarë vetëm, lojtarë të lirë nuk gjen. Ne do shpenzojmë brenda limiteve. Është gabim të shpenzosh shumë, e kemi vuajtur dhe kemi mësuar nga gabimet e së shkuarës”.

GAVAZAJ DHE ALITI – “Gavazaj është lojtar i Skënderbeut. Nuk e di si do shkojnë punët atje. Nuk kemi gjë në dorë, nuk e di se si do të shkojë puna. Ne e kemi huazuar për një vit. Normalisht e ka derën e hapur. Aliti është në merkato, jemi në bisedime me disa ekipe. Gjithçka varet nga blerësi, jo nga shitësi”.

GJYQI NË CAS – “Dënimi është fantazim, nuk ekziston në botën e futbollit të dënohesh pa asnjë provë. Edhe UEFA e di situatën dhe se kush na ka dënuar. Koha do t’i nxjerrë të gjitha. Nuk shkojmë për ulje dënimi, por për të fituar”.

Nisur nga situata e krijuar në kampin bardhekuq, por edhe për faktin se Skënderbeu i ka sytë nga CAS për dënimin që i ka dhënë UEFA, shumëkush mendon se skuadra e Orges Shehit nuk do të mund të rivalizojë për titullin kampion.

Gjithsesi përgjigja ka ardhur nga presidenti Ardjan Takaj, që përmes një postimi në llogarinë e tij në “Facebook” tregon se objektivi mbetet titulli kampion. Madje jo vetëm ai, pasi synohet edhe Kupa dhe Superkupa e Shqipërisë. Në vitin 2018 korçarët i fituan të tre trofetë dhe Takaj shkruan: “Vit i ri, objektiva të njëjta”.

Ligji i ri i Sportit, që largon Policinë e Shtetit nga impiantet sportive, ndoshta duhet të ishte diskutuar disi më tepër dhe kjo prej faktit që stadiumet tona nuk kanë nivelin e duhur të sigurisë. Presidenti i Kukësit, Safet Gjici, një ditë më parë bëri thirrje për të bojkotuar kampionatin nëse nuk rikthehen forcat e rendit.

Në të njëjtën linjë me të është edhe Ardjan Takaj, presidenti i Skënderbeut. Provoi “t’i plaste bumja në dorë”, por nuk është krejt pa faj, pasi në një ndeshje ku numri i tifozëve ishte mjaft i lartë, nuk mund të garantohej rendit me vetëm 30 stjuartë. Plus që edhe në të shkuarën kishte pasur incidente kur luhej Skënderbeu-Partizani.

Takaj kërkon bojkot nga të gjithë, në rast se Policia e Shtetit nuk rikthehet të marrë përsipër mbarëvajtjen e takimeve dhe për këtë rendit dy arsye. Sipas tij, kostoja e policisë private është shumë e lartë dhe gati-gati e papërballueshme nga presidentët e klubeve të Superiores, që janë edhe organizatorët e takimeve të kampionatit.

Së dyti, presidenti korçar thekson se përtej kostove, policia private nuk ka mundësi të rregullojë mbarëvajtjen e takimeve të mëdha, mes skuadrash që pretendojnë për objektiva madhorë dhe mes tifozërish të zjarrta.

Gjithsesi ai i ka idetë e qarta. Pasi fitoi Superkupën e Shqipërisë, Takaj foli në media për shumë çështje, ndërkohë që në ikje, në tentativën e radhës për një prononcim, presidenti i Skënderbeut duke qeshur thotë: “I kam thënë të gjitha, çfarë të them më?!”.

Sigurisht duhet edhe një koment për fjalët e shumta që e lidhin me Vllazninë. Për “Sport Ekspres” Takaj flet qartazi: “Këto janë nga ato muhabetet e kafeneve. I nxjerrin këta kundërshtarët tanë (qesh)”. Në Shkodër mund të kenë ëndërruar, tani duhet të zgjohen dhe t’i zgjidhin vetë hallet e tyre. Takaj ka mjaftueshëm të tijat me Skënderbeun.

VLADIMIR PRENGA