Sirena qipriote për Sherrin, një klauzolë e largon nga Vllaznia

Sport Ekspres — Mon, 17 Jun 2019 14:10:18 +0000

Alen Sherri mund ta vijojë karrierën jashtë vendit dhe për të ka interesim konkret. A2 CNN raporton se për portierin e Vllaznisë ka shfaqur interes Apolloni i Limasolit në Qipro. Jo vetëm kaq, por për “gardianin” ata janë të gatshëm të paguajnë edhe klauzolën që e lë të lirë.

Plot 50 mijë euro duhen paguar për Sherrin, i cili sezonin e fundit me Vllazninë është aktivizuar si titullar. Plot 21 ndeshje në Kategorinë e parë vjet, ndërkohë që në Superiore dy vite më parë iu besua porta në 26 përballje.

Sherri ka mbrojtur edhe portën e Shqipërisë U21 në një ndeshje me Sllovakinë, ndërkohë që dëshira e tij është e madhe për të luajtur jashtë vendit. Parametrat e tij janë mjaft të mira dhe mbetet për t’u parë nëse do të konkretizohet me sukses marrëveshja me Apollon Limasol.

Kupa e Shqipërisë për femra, plani i finales Apolonia-Vllaznia

Sport Ekspres — Wed, 20 Feb 2019 09:41:00 +0000

Ditën e premte, në orën 13:00, në stadiumin “Elbasan Arena” do të luhet finalja e 10-të e Kupës së Shqipërisë në futboll për femra. Apolonia dhe Vllaznia janë dy finalistet që do të diskutojnë mes tyre trofeun e dytë për nga rëndësia në futbollin shqiptar të femrave.

Në këtë ndeshje finale hyrja do të jetë falas për të gjithë sportdashësit, që do të thotë se në Elbasan dashamirësit e futbollit femëror do të jenë të shumtë. Vllaznia e Shkodrës është ekipi më i sukseshëm në këtë kompeticion, pasi ka arritur ta fitojë 5 herë rradhazi trofeun, ndërkohë që Apolonia e Fierit luan finalen e dytë në histori.

Sërish gjen vajzat shkodrane ne finale, të cilat dolën fituese dy vite më parë. Edicionin e parë të Kupës së Shqipërisë për femra e ka fituar Tirana, ndërsa Juban Danja e ka fituar dy herë, Ada e Velipojës një herë, dhe Vllaznia e ka fituar pesë herë.

AGRON KAJA