“E vlerësoj Grizman për pesë vitet që ishte me ne, ishte perfekt. Punoi shumë mirë dhe u rrit mjaft si futbollist. Kam folur shumë me të. Tani është një moment kyç për karrierën e tij. Ka shkuar në një klub gjigant si Barcelona. Disa e vlerësojnë atë për veprimin e fundit, por unë jo.”

“Shumë të afërm më kërkojnë të marr drejtimin e Argjentinës. Nuk do e bëj, pasi jam shumë mirë këtu. Kam folur me drejtuesit e federatës dhe gëzojmë marrëdhënie të mira. Nuk kam pasur asnjëherë një propozim të tillë”, deklaroi Simeone.

Si po ndiheni në këto ditë të parë si lojtari i Barcelonës?

“Mirë, shumë mirë. Isha me pushime, por finalizimi i transferimit më stresoi shumë. Doja të vija sa më shpejt këtu. Shokët e ekipit më kanë pritur mirë, lojtarë, staf, doktorë etj. Po e shijoj këtë moment”

LARGIMI NGA ATLETIKO – “Nuk doja të largohesha me kaq polemika. U mundova t’i bëja gjërat siç duheshin me sa më pak zhurmë. Ishte një largim i dhimbshëm, siç ndodhi dhe me Real Sociedadin. Ato dy ekipe do t’i kem gjithmonë në zemër. Atletiko po ndërton një skuadër shumë të fortë dhe më një trajneri si Simeone ato do luftojnë deri në fund, është  e sigurt se do t’i hapin punë kujtdo. “El Cholo” (Simeone) ka bërë gjëra të pabesueshme me atë skuadër, i ka çuar në një nivel që s’do ia priste mendja.

“Do të jetë e mahnitshme të luaj bashkë me të. Mezi pres të shoh sesi është ai në jetën e përditshme, çfarë i pëlqen në stërvitje. Dua ta shoh atë që bën në stërvitje dhe të provoj ta përsëris ose ta bëj atë në mënyrën time. Dua ta njoh atë jashtë fushe. Mezi pres që ai të vijë. Nuk jam person i vështirë. Më pëlqen të jem i rrethuar nga njerëz. Jam i sigurt se çdo gjë do jetë shumë mirë”, u shpreh Grizman.

Osman Dembele, Filip Kutinjo, Luis Suarez, Malkom dhe Grizman janë në betejë për vetëm dy pozicione. Shumë specialistë hedhin dyshime mbi përdorimin e francezit në mesfushë. Por ky repart së pari nuk është i përshtatshëm për karakteristikat e 28-vjeçarit.
Së dyti ardhja e De Jong ka krijuar edhe aty një mbipopullim, nga i cili hidhen dyshime edhe mbi praninë e Buskets në formacion. Së treti Barçës i duhet një mesfushor më difensiv në atë pozicion, duke parë aftësitë jo të mira mbrojtëse të lojtarëve të sulmit. Pra aktivizimi i Grizman në mesin e fushës krijon destabilitet repartesh.

Grizman si mesfushor është gati e pamundur. Qëndron si një opsion mjaft i volitshëm krahu i djathtë i sulmit, ku aktivizohet Kutinjo ose Dembele. Ai është një pozicion mjaft ideal për Grizman, të cilin e ka aplikuar te Atletiko dhe Franca. Kjo atlernativë bie poshtë në rast se Nejmar zbarkon në Barcelonë, ngjarje kjo që ka shumë mundësi të ndodhë. Gjithashtu besimi i madh që Bartomeu ka te Dembele bën që 21-vjeçarit t’i jepet më shumë mundësi të shpalosë talentin e tij.
Kështu e vetmja mundësi është qendra e sulmit. Në majë aktivizohet Luis Suarez. 32-vjeçari nuk ka qenë në versionin më të mirë dy vitet e fundit. Championsi është pika më e dobët. Mosha e tij jep sinjalet e nevojës së një risie në sulm. Grizman e ka dëshmuar shumë mirë se mund të jetë perfekt edhe në atë rol. Suarez mbetet “koka e turkut” për momentin në “Camp Nou”.

                                                                                                                                                                      DENIS LALA

Francezi nuk pranoi të paraqitej në stërvitje me Atletikon e Madridit, që njoftoi marrjen e masave për lojtarin. gjoba ka qenë e pashmangshme, ndërkohë që klubi i tij nuk ka pranuar asnjë marrëveshje me Barcelonën. Katalanasit donin ta paguanin klauzolën me këste, por te Atletiko ishin të qartë dhe akuzuan rivalët e tyre për besimet e kryera në një moment delikat të sezonit.

Grizman ka nënshkruar për pesë vite me Barcelonën dhe nis kështu në etapë të re në karrierën e tij. Në kampin katalanas gjërat nuk është se kanë shkuar fort mirë, pasi ka pasur goxha zëra kundër kësaj lëvizje. Madje është aluduar se Mesi do Nejmar në ekip dhe jo francezin. Gjithsesi tanimë zyrtarisht Grizman është katalanas dhe kluazola e largimit të tij është e frikshme: 800 milionë euro.

You were waiting for this. pic.twitter.com/vVR0Prmy0b

— FC Barcelona (@FCBarcelona) July 12, 2019

Grizman do të jetë blerja e tretë blaugrana këtë merkato pas De Jong dhe Neto Murara. Në ditët në vijim priten zhvillime të reja rreth çështjes Nejmar. Me ardhjen e Grizman dhe brazilianit, Barça pritet të shndërrohet në një “makineri të pamëshirshme” për çdo kundërshtar.

ESPN raporton se do të ketë një proces disiplinor ndaj Grizman, i cili mund të gjobitet deri në 200 mijë euro. Sulmuesi e ka bërë të qartë se cikli i tij tek Atletiko e Madridit është mbyllur dhe kërkon të nisë një aventurë të re.

Barcelona është klubi që e do Grizman, por problemi është se katalanasit duan që klauzolën prej 120 milionë eurosh ta paguajnë me këste. Atletiko nga ana tjetër është e qartë dhe e kërkon mënjeherë të gjithë shumën, kjo pasi ata janë të indinjuar për faktin se Barça e ka kontaktuar Grizman në kundërshtim me rregullat e FIFA-s.

Barcelona kërkon që ta paguajë me këste shumën prej 120 milionë eurosh, një praktikë kjo që ndodh shpesh në lëvizjet e merkatos në mbarë botën. Megjithatë, te Atletiko e kanë bërë të qartë në mënyrë publike: Grizman largohet vetëm nëse 120 milionë eurosh paguhet i plotë.

Pavarësisht situatës të tensionuar te Barcelona besojnë se Atletiko do e zbusë qëndrimin e saj dhe për këtë klubi është i gatshë që t’i ofrojë madrilenëve në një shumë më të lartë se 120 milionë, por të ndarë në tri këste që do të paguhen në një periudhë 3-vjeçare.

Në komunikatë thuhet se Grizman duhet të zbatojë kontratën dhe të paraqitet në grumbullimin e ditës së hënë. Sulmuesi i është përgjigjur me të njëjtën monedhë kësaj sjellje “të sertë” nga ana e klubit. Sipas “Mundo Deportivo”, Grizman nuk do të paraqitet në stërvitje. Madje, avokatët e tij po bëjnë gati proçedurat e prishjes së njëanshme të kontrataës.

28-vjeçari do të paguajë 120 milionë euro për të prishur menjëherë bashkëpunimin me klubin francez. Kjo shifra e klauzolës që lejon ndërprerjen e marrëveshjes. Këtë ai ja ka bërë të qartë klubit dhe në ditët në vijim, francezi do të jetë lojtar i lirë. Ajo që pason më pas është zyrtarizimi i tij si futbollisti më i ri i Barcelonës. Kështu, edhe pse me mjaft polemika, çështja Grizman po vjen drejt zgjidhjes.

Grizman do të jetë blerja e dytë e klubit blaugrana këtë verë, pas portierit Neto. Duhet të themi se për Barçën akoma nuk ka ardhur pjesa e nxehtë e merkatos. Operacioni Nejmar është në zhvillime e sipër. Ardhja e tij dhe Grizman do të ishte një përgjigje perfekte për milionat e derdhura nga Reali këtë verë.

Që të ndodhë kjo duhet të zgjidhen disa nyje. Barcelona duhet të shesë dy apo tre lojtarë të bazës së ekipit si Kutinjo, Dembele, Rakitiç apo Umtiti. Largimi i tyre, përveçse do të sillte shumë të ardhura, do të ulte edhe barrën e madhe të pagave vjetore. Kujtojmë se Barcelona është ekipi, që paguan më shumë për rrogat e lojtarëve.

Më pas do të ishte gjithçka e lehtë për të arritur te dy yjet. Edhe Nejmar edhe Grizman e duan afrimin ne “Camp Nou”. Atletko dhe PSG janë të gatshëm t’i lënë të lirë në këmbim të ofertave të duhura. 300 milionë duhen për Nejmar dhe 120 milionë për të paguar klauzolën e largimit të Nejmar.

Gjithsesi, asgjë nuk është zyrtarizuar dhe 28-vjeçari vazhdon të krijojë dyshime nëse “Camp Nou” do të jetë “shtëpia” e tij sezonin e ardhshëm. Mediat flasin për një interes të shtuar të PSG. Megjithatë, është drejtori i Atletiko Madrid, që mendon të përfundojë “lojën” e sulmuesit francez.

Gil Marin është shprehur se marrëveshja e Grizman me Barcelonën është arritur që në muajin mars. Në deklaratën e tij ai shton edhe se duhet të krijohet një skuadër me burra, duke thumbuar francezin. “Jam shumë i qartë, e kam marrë vesh që në mars se Grizman do të shkojë në Barcelonë. Ne duhet të krijojmë një grup serioz me lojtarë burra”, u shpreh drejtori i klubit bardhekuq.

                                                                                                   DENIS LALA

Atletico Madrid CEO Gil Marin on Antoine Griezmann: “We know since last March that Griezmann is going to Barcelona.” pic.twitter.com/llsULU73zj

— Squawka News (@SquawkaNews) June 12, 2019

Presidenti Josep Bartomeu po mendohet dhe po synon që t’i bindë të gjithë se Grizman është një nënshkrim i rëndësishëm për Barcelonës. Francezi shikohet si një nga alternativat më të mira që të ofron tregu. Gjithsesi duhen bindur lojtarët kryesorë, të cilët duhet ta kuptojnë se Grizman është zgjidhja më e mirë për sulmin në sezonin e ardhshëm.

PSE DUHET AFRUAR – Bartomeu mendon se Barcelona do të fitonte sportivisht me këtë afrim. Grizman është një lojtar që e njeh shumë mirë kampionatin dhe në skemat e Valverdes mund të mbulojë disa pozicione. Një “xhol” në duart e stafit teknik. Ndërkohë Kutinjo i ka bërë gati valixhet, pasi ka zhgënjyer dhe nuk mund ta presin më.

Besohet se Grizman ofron shumë më shumë për ekipin. Sulmuesi ka një marrëdhënie shumë të mirë me golin (133 gola e 50 asiste në 253 ndeshje), ndërkohë që lëvizshmëria pa top dhe presioni në mbrojtjet kundërshtare janë elementë që francezi i ofron dhe Barcelona këto kohë i ka humbur.

Grizman është një lojtar që me cilësitë e tij mund të përshtatet kudo. Ai mund të luajë në të majtë të sulmit me Suarez dhe Mesin. Sulmuesi mund të aktivizohet edhe në të djathtë, nëse në ndonjë rast do të duhet të luhet me Mesin si sulmues “fals”. Gjithashtu mund të pozicionohet në majën e repartit ofensiv.

Afrimi i Grizman vë në pikëpyetje Ousman Dembele. Nga ana tjetër Bartomeu e di shumë mirë: vera nuk ofron opsione më të mira. Deri më 1 korrik duhet paguar klauzola prej 125 milionë eurosh, ndryshe do të ketë një ankand dhe PSG është gati ta rrëmbejë sulmuesin nga Atletiko e Madridit.

Media të ndryshme e bëjnë fakt të kryer akordin mes klubit katalanas dhe yllit të ekipit “colchoneros”. Rreth kësaj situate ka folur Diego Simeone. Trajneri i Atletikos tregohet i qartë në fjalët e tij dhe beson e shpreson që Grizman të vazhdojë të qëndrojë tek ekipi i tij.

“Antuan është kapiteni jonë dhe është shumë i rëndësishëm për ne. Nuk jam i shqetësuar për çfarë flitet. Ka gjithçka për t’u përmirësuar akoma me ne. Nëse mendoj se mund të largohet, sigurisht që nuk do të flisja mirë për të”, përfundon trajneri argjentinas.

Gjithsesi sulmuesi anësor në fund vendosi të qëndrojë nën urdhrat e Simeones. Tanimë thuhet se ka zhvillime sërish në këtë pistë. Le Parisien raporton se ka një marrëveshje mes Grizman dhe Barcelonës.

Katalanasit do të paguajnë 120 milionë euro për kartonin e kampionit të botës. Aq është edhe klauzola e largimit aktualisht. Sulmuesi ka një kontratë deri në vitin 2023 me Atletikon, ndërkohë që thuhet se paga që i ka ofruar Barcelona është mjaft e lartë.

Flitet për një kontratë 3-vjeçare, prej së cilës vitin e parë në xhepat e futbollistit do të shkojnë 17  milionë euro neto. Vitin e dytë ai do të përfitojë 18 milionë, kurse në të fundit 19 milionë euro. Sikurse kuptohet, Grizman është objektivi kryesor i Barcelonës dhe sulmi ka nisur.

“Daily Mirror” bën një renditje me futbollistët më të paguar të planetit. Listën e kryeson Lionel Mesi dhe direkt pas tij është Kristiano Ronaldo. Normalisht paga e këtyre të dyve mund të justifikohet për nivelin e futbollit që na kanë dhuruar prej më shumë se një dekade.

Lojtarët që habisin më shumë në këtë listë janë emra si Aleksis Sançez, Kutinjo, Garet Bejl apo Mesut Ozil. Këto lojtarë e kanë ndihmuar fare pak, për të mos thënë aspak ekipin, gjithsesi kjo nuk i pengon të futen në 10-shen e më të paguarve. Ja lista me futbollistët më të paguar:

10. Mesut Ozil (1,6 mln euro në muaj)

 9. Kilian Mbape (1,75 mln euro në muaj)

 8. Aleksis Sançez (2,30 mln euro në muaj)

 7. Filipe Kutinjo (2,35 mln në muaj)

 6. Garet Bejl (2,6 mln në muaj)

 5. Luis Suarez (3 mln euro në muaj)

 4. Nejmar (3,15 mln euro në muaj)

 3. Antuan Grizman (3,4 mln euro në muaj)

 2. Kristiano Ronaldo (4,8 mln euro në muaj)

 1. Lionel Mesi (8,5 mln euri në muaj)

Atletiko nuk dëshiron të mbetet e papërgatitur dhe ka zgjedhur zëvendësuesin. Sipas raportimeve të portugezes “Record”, Zhoao Feliks është objektivi i madh. Klubi “colchoneros” është futur në garë për shërbimet e yllit të Benfikës.

Klauzola e largimit të 19-vjeçarit është 120 milionë euro dhe Atletiko është gati ta paguajë atë. Zhoao Feliks është një nga surprizat më të bukura të futbollit portugez dhe Diego Simeone e sheh atë si lojtarin e duhur për të zëvëndësuar një emër të madh si Grizman.

Francezi përfiton një rrogë prej 3.3 milionë eurosh në muaj, por ai tundohet nga ideja për të luajtur e fituar trofe të rëndësishëm me ekipin katalanas. Diego Simeone e ka shprehur gjithmonë faktin që francezi nuk do të largohet. Trajneri argjentinas nuk mund ta imagjinojë ekipin “colchoneros” pa yllin e saj.

“Antuan është një nga kapitenët tanë. Klubi ka bërë një punë të jashtëzakonshme për ta mbajtur dhe ai është i lumtur këtu me ne. Grizman është shumë i rëndësishëm për Atletikon dhe as që më shkon ndërmend largimi i tij”, përfundon “El Cholo”.

Presidenti i Atletikos ka konfirmuar edhe njëherë faktin që Grizman nuk do të largohet, madje tregohet tepër i bindur në atë që thotë.

“Antuan do të qëndrojë tek Atletiko. Kjo është e sigurt 3000%! Edhe sa herë duhet ta përsëris diçka të tillë. Më marrin çdo pesë minuta dhe më pyesin se çfarë po ndodh. Grizman është një futbollist i Atletikos së Madridit”, përfundon presidenti i klubit “colchoneros”.

Mungesat e shumta kanë prekur ekipin “colchoneros”, ndërsa Dieogo Simeone tenton të rikuperojë Diego Kostën për sfidën me ekipin kryesues. Trajneri është shumë i lidhur me sulmuesin dhe ka besim maksimal tek ai.

“Do të përpiqemi ta kemi gati Diego Kostën për ndeshjen e fundjavës kundër Barcelonës. Dëshiroj që të vazhdojë të qëndrojë me ne edhe për sezonin tjetër. Shpresoj të ketë vazhdimësi me këtë klub. Diego ndodhet në një moshë ideale dhe unë i besoj deri në vdekje atij. Nuk është rastësi fakti që nga momenti që është kthyer, kemi fituar Ligën e Europës dhe Superkupën e Europës”, thekson Simeone.

Argjentinasi ndalet dhe te situata e Antuan Grizman. Fjalët e merkatos e lidhin francezin me një kalim te Barcelona, por Simeone nuk e beson. Grizman është një nga kapitenët e ekipit dhe do ia bënte me dija trajnerit, nëse dëshiron të transferohet tek ekipi katalanas.

“Antuan është një prej kapitenëve të ekipit. Nëse do duhet të thotë diçka, do e bëjë. Unë e shoh të përfshirë në grup dhe me dëshirën për të ndihmuar ekipin. Shpresoj që të rikthehet te goli, ka nevojë ai dhe ekipi. Kundër Alaveshit u zëmërua kur e zëvendësova. Po fitonim 0-3, por ai donte të luante akoma. Ky është qëndrimi i duhur që kërkoj nga të gjithë lojtarët”, përfundon trajneri i Atletikos së Madridit.

Finalja e madhe e këtij sezoni do të luhet në “Wanda Metropolitana” dhe ëndrra e madhe e të gjithëve në kampin “colchoneros” ishte mbërritja aty. Diçka e tillë nuk ndodhi, pasi Kristiano Ronaldo mendonte ndryshe dhe tashmë ka filluar të mendojë ndryshe edhe vetë “ylli” i ekipit të Simeones.

Siç raporton “Mundo Deportivo”, kampioni i botës me Francën dëshiron të luajë ne një ekip me Mesin sezonin e ri. Grizman dëshiron shumë transferimin te Barcelona, aq sa është gati të pranojë një rrogë më të vogël.

28-vjeçari përfiton 23 milionë euro në sezon tek Atletiko. Ai është gati të heqë dorë nga 7 milionë euro dhe të pranojë një rrogë prej 16 milionësh në sezon, aq sa ofronte dhe klubi katalanas verën e kaluar.

Sulmuesi ka folur pas ndeshjes, duke zbuluar se ka nevojë për pushim. Një gjë e tillë është normale, pasi është fundi i vitit dhe të gjithë kanë nevojë për të rikarikuar energjitë.

“Mund të përmirësohem akoma, nuk jam në formën maksimale, por do të jem shpejt. Jam shumë i lumtur që po e ndihmoj ekipin. Ka qenë një vit i gjatë dhe kemi dhe disa ndeshje për të luajtur përpara pushimeve. Ka shumë ndeshje dhe është e vështirë të pushosh mirë, kam nevojë për një javë për ta marrë veten. Ndihem mirë, por jo siç do të doja. Festimi? Është e futboll, gëzim, argëtim, kur shënon duhet të festosh”, përfundon sulmuesi kryesor i Atletiko Madrid.

Nikola Kaliniç zhbllokoi shifrat në minutën e 26-të. Kroati u tregua i saktë pas një pasimi të Grizman dhe kaloi ekipin në avantazh dhe regjistroi rrjetën e dytë në kampionat. Djemtë e Simeones nuk u ndalën dhe shënuan përsëri në minutën e fundit të pjesës së parë. Një goditje e Grizman u ndal nga dora e një mbrojtësi dhe arbitri akordoi penallti, pas shikimit të pamjeve në VAR. Francezi mori përsipër penalltinë dhe ia doli të dyfishonte shifrat.

Vendasit reaguan në pjesën e dytë dhe shkurtuan diferencën me anë të Kaleros në minutën e 57-të. Mbrojtësi kërceu më shumë se të gjithë pas një goditje këndi dhe rihapi shanset e Vajadolidit për të mos dalë pa pikë. Vendasit nuk u ndalën dhe barazuan rezultatin pas gjashtë minutash. Një tjetër goditje dënimi dhe pas një rrëmuje në zonë, topi përfundoi në këmbët e Saul, i cili shkaktoi autogol.

Megjithatë, ekipi “colchoneros” ai doli të kalonte përsëri në avantazh. Antuan Grizman shënoi dhjetë minuta përpara fundit të ndeshjes, pas një rrëmujë në zonën e Vajadolidit. Tre pikë fantastike për Atletikon, ndërsa kampioni i botës dhe ylli i ekipit u ngjit në kuotën e 6 golave në kampionat.

Grizman theu një rekord gjatë ndeshjes së sotme. Dygolëshi i sotëm e ngjit 27-vjeçarin në kuotën e 83 golave në kampionat me Atletikon, duke u bërë golashënuesi më i mirë i huaj në kampionat për ekipin kryeqytetas.

83 – Antoine Griezmann has become the all time non-Spanish Atletico scorer in LaLiga history (83 goles). Prince. pic.twitter.com/kuyCLeGBsZ

— OptaJose (@OptaJose) December 15, 2018

Vajadolid – Atletiko Madrid 2-3
(Kalero 57’, Saul (aut) 63’ / Kaliniç 26’, Grizman (pen) 45’, 80’)

Përpara ndeshjeve të Champions-it jemi mësuar të shohim lojtarët e ekipeve të rreshtuar me fëmijë të vegjël përpara tyre. Të gjithë duke dëgjuar himnin, dikush duke buzëqeshur, ndonjë serioz e i përqendruar, e një tjetër i karikuar në maksimum dhe që tenton t’ua transmetojë dhe shokëve të tij adrenalinën.

Gjatë ndeshjes së djeshme të zhvilluar në stadiumin “Wanda Metropolitano”, kamerat nuk po arrinin të gjenin një nga titullarët e Atletikos. Mungonte Antuan Grizman, ylli i “colchoneros”.

Kur kamerave u është dashur të ulin pak rrezen e tyre francezi është parë duke bërë një veprim të veçantë. Sulmuesi nuk ka përtuar dhe është ulur t’i lidhë këpucët djaloshit shoqërues. Një gjest i bukur dhe i mrekullueshëm. Thjeshtësi, mirësi, xhentilesë dhe edukatë.

Për më shumë gjithçka përmblidhet në buzëqeshjen dhe lumturinë e djaloshit të vogël. Sa pak mjafton ndonjëherë për t’i emocionuar të tjerët. Një veprim fantastik, ose quajeni si të doni! I vogli nuk do ta harrojë kurrë, pasi rrallë të ndodh që një Kampion Bote të ulet në gjunjë për të lidhur këpucët, por mbi të gjitha ia vlen për atë buzëqeshje magjike të djaloshit…

Luka Modriç është favoriti kryesor dhe një gjë e tillë konfirmohet dhe nga Spanja. Sipas “Ondo Cero”, mesfushori kroat i Realit të Madridit do të jetë fituesi i “Topit të Artë”.

Gjatë këtyre ditëve u përfol për një garë francezo-kroate, me Luka Modriç, Rafael Varan dhe Kilian Mbape në podin e fituesve. Por, lajmi i “Onda Cero” thekson dhe diçka tjetër. Varan dhe Mbape nuk do të jenë në treshën e parë. Nëse Modriç do të jetë fituesi i çmimit, në pod do të ngjiten Kristiano Ronaldo dhe Antuan Grizman.

Me pak fjalë, të tre lojtarët më të mirë të këtij viti vijnë nga La Liga spanjolle. Portugez u largua nga vendi iberik dhe ka nisur aventurën italiane me Juventusin, por deri në maj ai ishte pjesë e Realit të Madridit.

Votimet janë mbyllur, fitues do të shpallet njëri midis: Luka Modriç, Kilian Mbape dhe Rafael Varan. Tashmë mbetet vetëm shpallja e fituesit, ndërsa Diego Simeone ka dhënë mendimin e tij për çmimin në fjalë.

Nuk ka shanse të ndodhë, por trajneri argjentinas zgjedh Antuan Grizman si lojtarin e duhur për ta fituar “Topin e Artë”. Të dy punojnë bashkë të Atletiko e Madridit, Simeone e njeh shumë mirë dhe e arsyeton mendimin e tij se pse Grizman e meriton këtë çmim, më shumë se çdo futbollist tjetër.

“Nga pikëpamja e përgjithshme mund të themi që Leo Mesi dhe Kristiano Ronaldo janë futbollistët më të mirë në botë. Por, jo në vitin 2018. Këtë herë është Antuan (Grizman), i cili ka qenë para të gjithëve. Në këtë vit, askush në botë nuk ka bërë kaq gjëra të rëndësishme për skuadrën e tij si Grizman, si për Francën dhe për Atletikon. Ky është realiteti. Kur një futbollist siguron që gjithë skuadra mund të funksionojë, duke u bazuar në trurin e tij, ka një vlerë të pallogaritshme.”

“Franca luan falë inteligjencës së Grizman. Kur ai është i kthjellët dhe në formë të mirë fizike, nuk ka asnjë tjetër lojtar në botë kupton dhe interpreton futbollin si ai. Nëse shohim dhe trofetë e fituar si: Kupa e Botës, Europa League dhe Superkupa e Europës, askush nuk ka bërë aq shumë për skuadrën e tij, sesa Antuan Grizman”, përfundon trajneri i Atletikos së Madridit për “France Football”.

Braziliani i natyralizuar si spanjoll është një nga ata lojtarë, për të cilët nuk është e këshillueshme t’i acarosh nga nervat. Nëse ndodh, ai nuk e bën më dallimin midis shokut të skuadrës dhe kundërshtarit. Golashënues, potencë dhe një karakter i ashpër.

30-vjeçari i ka pasion dyluftimet fizike dhe nuk tërhiqet kurrë. Për ta nevrikosur atë ka menduar Samuel Umtiti. Francezi sapo ishte rikthyer te Barcelona nga dëmtimi dhe në një moment ka ndodhur përplasja mes tij dhe sulmuesit të Atletikos.

Aty afër ka qenë dhe Antuan Grizman, i cili ka një miqësi të fortë me mbrojtësin e Barçës dhe është shok skuadre te kombëtarja e Francës me të. Ai ka dashur të qetësojë palët, ndërsa Diego Kosta ka shpërthyer, siç citon “El Mundo Deportivo”.

“Shiko se shoku yt i skuadrës jam unë dhe jo Umtiti”, është shprehur sulmuesi i Spanjës. Grizman është përmbajtur dhe i ka bërë me shenjë që të qetësohet dhe të përdorë trurin, por atë është e vështirë ta qetësosh.

Disa minuta më vonë erdhi dhe avantazhi i përkohshëm i ekipit të Simeones dhe goli u shënua nga Diego Kosta. Gjatë festimit të golit, ai është përqafuar me Grizman dhe mes tyre është rikthyer qetësia. Gjëra normale që “lindin” në fushën e blertë dhe po aty “vdesin”, por një lojtar si Diego Kosta nuk duhet ta zemërosh kurrë…

Grizman ka vite që po luan në nivele të larta dhe po shfaqet protagonist me ekipin e Simeones dhe kombëtaren e Francës. Ai nuk e ka fshehur kurrë ëndrrën e tij për të fituar “Topin e Artë”, ndërsa në ndihmë i del dhe shoku i tij i skuadrës, Diego Godin. Uruguaiani ka një lidhje të veçantë me francezin dhe uron e shpreson që sulmuesi të shpallet fitues, në prononcimin e dhënë për “EL Mundo”.

“Shpresoj të shpallet fitues, sepse, përveçse e meriton për mënyrën se si luan futboll, ka fituar gjithçka në këtë sezon. Atë që ka bërë me Atletikon dhe Francën e kanë parë të gjithë dhe do të ishte një padrejtësi serioze, nëse nuk ia japin këtë vlerësim. Sigurisht, ka dhe lojtarë të tjerë të mëdhenj kandidatë dhe mendoj se dhe ata kanë arsyet e tyre për të shpresuar në fitimin e ‘Topit të Artë’. I respektoj gjykimet e të tjerëve, gjithashtu mund t’i kuptoj motivet e tyre, por mendoj dhe shpresoj që Antuan të shpallet fitues”, përfundon Diego Godin, kapiteni i Atletiko Madrid.

“Po përjetoj një nga momentet më të bukura në jetën dhe karrierën time, si në klub ashtu dhe në kombëtare. Kam fituar Europa League, Superkupën e Europës dhe Kupën e Botës, ndihem me fat dhe shpresoj të vazhdoj kështu. Nuk ndihem inferior krahasuar me Mesin dhe Ronaldon dhe mund ta pohoj qetësisht, që tashmë ndodhem në tavolinën e më të mëdhenjve. Jam në maksimumin tim, por e di që mund të përmirësohem. Kërkoj që të jem sa më i kompletuar. Nuk më intereson të shënoj 50 gola, por dua të ndihmoj skuadrën time të fitojë. Dua të përmirësohem, të fitoj dhe të vazhdoj kështu, duke luajtur në këtë mënyrë.”

Grizman i rikthehet dhe njëherë kandidatëve për çmimin e lojtarit më të mirë të sezonit të dhënë nga UEFA, ku asnjë futbollist francez nuk ishte kandidat, pavarësisht se u shpallën Kampionë Bote.

“Tani nuk mund të bëjmë më gjë, por ishte një mëkat të mos shihje asnjë Kampion Bote të nominuar. Zhvilluam një Botëror të madh dhe e gjithë skuadra meritonte vlerësimin. Mbape, Varan dhe Kante luajtën në mënyrë të përsosur, por shkoi si shkoi. Tani mendoj vetëm për të fituar Topin e Artë, një çmim shumë prestigjioz dhe historik. Kam dhe tre muaj në dispozicion për të dhënë gjithçka nga vetja dhe për ta fituar atë çmim”, përfundon sulmuesi i Atletikos së Madridit prononcimin e tij për “AS”.

Sulmuesi i Atletikos së Madridit, Antuan Grizman, ka folur mbas ndeshjes duke treguar emocionet e përjetuara përpara tifozërisë së tyre. 27-vjeçari flet dhe për mënyrën e lojës, por fitorja vlen më shumë se futbolli i bukur.

“Fitorja i bën gjërat më të thjeshta për festat mbas ndeshjeve. Dëshironim të shihnim tifozët tanë dhe të luanim në “Stade de France”, për më tepër, përpara familjarëve tanë. U ndjemë mirë, provuam emocione të forta dhe shpresoj të jenë kënaqur dhe tifozët.

Ne përpiqemi t’u dhurojmë atyre çfarë presin prej nesh. Natyrisht, ne nuk luajmë si Spanja, ose Barcelona, por ne përpiqemi t’i fitojmë ndeshjet për tifozët tanë. Kupa e Botës do të na shoqërojë gjatë gjithë jetës tonë”, përfundon Antuan Grizman.

“Dua ta mbyll me futbollin në Amerikë. Ndoshta me një prej këtyre dy ekipeve: Los Anxhelos Galaksi, ose Majemi, sepse këto janë dy qytete shumë të mira. Më pëlqen mentaliteti dhe kultura e spektaklit që ekziston në Shtetet e Bashkuara të Amerikës”, zbulon sulmuesi 27-vjeçar, i cili është një nga kandidatët më të fortë për fitimin e trofeut të “Topit të Artë”.

Grizman ka fituar tre trofe gjatë këtij sezoni. Me Francën ai arriti majën e botës duke fituar Botërorin e Rusisë, ndërsa me klubin spanjoll, ai fitoi Europa Ligën dhe Superkupën e Europës. Që nga kalimi në drejtimin e Simeones, Grizman është rritur shumë si lojtar dhe sot ai është një nga më të fortët në botë.

Në dy finalet e para ka shënuar dhe Grizman është një nga kandidatët kryesorë për fitimin e çmimit prestigjioz të Topit të Artë. Ai shpjegon qartë se pse duhet të jetë ai fituesi dhe thumbon FIFA-n për mungesën e lojtarëve francez në më të mirët, sipas qeverisë botërore të futbollit.

“Ky ka qenë sezoni më i mirë i karrierës time. Nëse nuk do të ma japin Topin e Artë do pyesja seriozisht se çfarë duhet të bëja më shumë për ta fituar atë? Kam shënuar, kam ngritur trofe të rëndësishëm dhe kam qenë deçiziv në momente vendimtare. FIFA The Best është një çmim që e jep FIFA, që organizoi Botërorin e Rusisë. Si ka mundësi që në treshen e kandidatëve për të fituar çmimin nuk kishte asnjë futbollist francez?

Çdokush bën zgjedhjet e tij, por në këtë rast ishte diçka e papritur. Mendoj që mund të konkurroj për të fituar Topin e Artë dhe do të ishte e mrekullueshme ta fitoja, sepse është një çmim i pakrahasueshëm. Në vitin 2016, unë humba finalen e Europianit dhe isha pjesë e treshes së parë. Këtë vit kam fituar tre finale dhe mendoj që është logjike të pretendoj atë çmim”, përfundon sulmuesi 27-vjeçar për “L’Equipe”.

Drejtuesit e klubit spanjoll janë gati për t’i rinovuar kontratën portierit, i cili është një nga objektivët kryesore për klubet e mëdha europiane. Aktualja i skadon në vitin 2021 dhe 25-vjeçari ka një klauzolë shitje prej 100 milionë eurosh. Atletiko dëshiron ta blindojë dhe është gati për t’i ofruar atij rinovimin e kontratës, përpara Krishtlindjeve. Klauzola do të dyfishohet siç citon “AS”, dhe ekipi që kërkon shërbimet e sllovenit do duhet të paguajë 200 milionë euro. Portieri është dakort parimisht për të rinovuar, por çështja e klauzolës së re është akoma për t’u diskutuar.

Nga ana tjetër, Grizman ka folur mbas fitores duke “snobuar” tifozët e Atletikos. Në stadium u dëgjuan vërshëllima, por diçka e tillë nuk është një problem për sulmuesin francez.

“Gjëja më e rëndësishme janë pikët dhe jo loja e skuadrës. Ne jemi Atletiko e Madridit, nuk zhvillojmë një futboll të bukur, por ne besojmë që pikët janë ajo çfarë ka rëndësi. Ëndërroj të vazhdoj të fitoj. Topi i Artë vendoset nga persona të tjerë, por unë jam krenar për çka kam fituar dhe falënderoj shokët e kombëtares dhe të Atletikos. Jam kandidat për topin e artë, por gjithmonë kam vënë interesin e skuadrës përpara vetes time”, përfundon Grizman, i cili fitoi Kupën e Botës me Francën, dhe Europa Ligën dhe Superkupën e Europës me Atletikon.

Francezi ka një klauzolë prej 200 milionë eurosh dhe Hënes dhe Rumenige janë gati për të shpenzuar një shumë të tillë për të siguruar shërbimet e 27 vjeçarit.

Nëse tratativat për afrimin e Grizman nuk do të kenë një fund të lumtur, atëherë klubi gjerman do të hidhet në sulm për Paulo Dibala, i cili sigurisht që ka një kosto më të vogël se francezi dhe kontrata me Juventusin i skadon në vitin 2022.