Finalja e “Carabao Cup” përballë Mançester Sitit që zhvillohet të dielën do të jetë një provë zjarri për të gjithë, sidomos për Sarrin, por Çelsi duhet ta fitojë këtë trofe. Situata në ekip është e keqe dhe rreth saj ka folur dhe Antonio Rudiger.

Në një prononcim për “Daily Mail”, qendërmbrojtësi nuk fshihet dhe vë gishtin te taktika e Sarrit dhe problemet që po hasin shumica e lojtarëve për të kuptuar atë që kërkon trajneri italian.

25-vjeçari gjerman bën një krahasim për gjendjen në të cilën ndodhet Çelsi dhe finalen kundër ekipit të Guardiolës e sheh si një provë të rëndësishme për gjendjen, forcën, mundësitë dhe të ardhmen e ekipit londinez.

“Situata jonë nuk ka të bëjë me lodhjen dhe gjendjen fizike. Fajin e ka taktika që preferon trajneri ynë. Në mënyrën e tij, Sarri po ecën përpara. Skemat e tij janë të reja për shumicën e lojtarëve, por duhet të përshtatemi. Është njësoj si të ulesh në bankat e shkollës duke dëgjuar dikë. Natyrisht, ndonjëherë, je i lodhur mendërisht, por në fund të ditës duhet të kesh bërë detyrën tënde. Për momentin skuadra nuk ndihet shumë e sigurt, na mungon besimi dhe po luajmë nën mundësitë tona.

Ndeshja kundër Mançester Sitit do të tregojë të vërtetën dhe atë që do të jetë rruga jonë në këtë sezon. Në ditët e ardhshme do të zbulojmë nëse jemi në gjendje të mbajmë ritmin e Sitit, por dhe të Liverpulit e Totenhemit. Unë nuk jam trajneri, jam thjeshtë një futbollist. Skemën taktike e zgjedh trajneri, ndërsa ne duhet ta ndjekim atë”.

Italiani i Çelsit i urren humbjet, të gjithë kanë të njëjtën ndjesi në futboll, dhe kur një gjë e tillë ndodh, më mirë mos i dil përpara. Antonio Rudiger, mbrojtësi gjerman i ekipit londinez, ka folur për “Evening Standart”, duke treguar “panikun” e përjetuar pas humbjes kundër Uolsvesit në transfertë.

Megjithatë, nervat bien gjithmonë dhe Sarri, i cili është një person që preferon më shumë të dhurojë dashuri sesa të përhapë frikë, arriti të motivonte ekipin e tij për ndeshjen pasardhëse kundër kampionëve të Mançester Sitit.

“Pas ndeshjes kundër Uolvesit (Çelsi u mposht me rezultatin 2-1) Sarri na frikësoi. Dukej sikur po luante mendsh, por kishte të drejtë, sepse nuk duhej humbur ajo ndeshje. Ditën tjetër, trajneri ishte shumë i qetë dhe e kishte të qartë atë që do të na thoshte. Bisedoi me ne dhe na bëri të kuptojmë se duhet të besojmë shumë te vetja jonë. Dëshironte që të përballeshim me Mançester Sitin me bindjen e fitores”, përfundon Rudiger. Në fakt ashtu ndodhi, Kante dhe David Luiz shënuan golat e fitores dhe djemtë e Sarrit arritën një fitore të madhe kundër ekipit të Guardiolës.

“Kam luajtur në Itali me Romën dhe e dija lojën që kërkonte të zhvillonte Sarri, i cili luan një futboll që më pëlqen shumë. Sarri na kërkon të bëjmë presing më lart se sa bënim në sezonin e shkuar, ku të gjithë e dinë që qëndronim më poshtë. Tani është gjithçka ndryshe. Krijojmë më shumë raste dhe gjithçka është më e bukur.

Sarri kërkon që mbrojtësit të mbajnë topin dhe të pasojnë shkurt. Unë e kam demonstruar se mund ta bëj diçka të tillë dhe po përmirësohem nga dita në ditë. Ai është një trajner që nuk kënaqet kurrë dhe na e përsërit gjithmonë që mund të përmirësohemi.

Ai na bën të ndihemi të gjallë. Sinqerisht, jam i habitur që po bëjmë kaq mirë, sepse lojtarë si Hazard dhe Kante luajtën gjatë gjithë Botërorit dhe u bashkuan vonë me ekipin. Janë në formë të shkëlqyer dhe kjo është diçka fantastike për ekipin”, përfundon mbrojtësi gjerman prononcimin e tij për “Mail on Sunday”.