Antonio Marku

Antonio Marku: Na detyron fanella, Vllaznia e mposht Bylisin

Sport Ekspres — Wed, 22 May 2019 18:59:25 +0000

Vllaznia dhe Bylisi do të diskutojnë mes tyre titullin e Kategorisë së Parë dhe 30 milionë lekët që jep Federata Shqiptare e Futbollit për këtë trofe. Shkodranët duan ta kalojnë me sukses këtë përballje dhe mbrojtësi Antonio Marku është optimist përpara sfidës me ballshiotët.

“Finalja me Bylisin ka specifikën e saj dhe si e tillë është vlerësuar nga skuadra jonë. Kemi një kundërshtar të fortë, madje me përvojë në Superiore, dhe nesër në Durrës do jetë një 90-minutësh i fortë dhe i bukur. Vllaznia do ta arrijë fitoren, Shkodra e meriton trofeun”, është shprehur mbrojtësi i majtë për “SportEkspres.com”.

Më tej Marku shton: “Luajmë për fanellën e Vllaznisë dhe pesha e saj na detyron që këtë finale ta fitojmë. Na duhet që të bëjmë një mbyllje sa më të mirë dhe Kupa do ishte shpërblim më i madh se sa ana financiare e saj. Nga këtu nis për ne sezoni i ardhshëm, që do jetë vendimtar dhe do tregojë forcën e vërtetë të kësaj skuadre”.

AGRON KAJA

Dëmtime te Vllaznia, pa dy titullarë kundër Dinamos

Sport Ekspres — Thu, 25 Apr 2019 07:47:38 +0000

Vllaznia luan të dielën kundër Dinamos në Pezë-Helmës dhe dje lojtarët kanë zbritur në fushë për të vijuar përgatitjet për përballjen ndaj bluve. Trajneri Agim Canaj është përballur me probleme dëmtimesh, pasi dy prej lojtarëve kuqeblu nuk janë stërvitur me grupin.

Sikurse raporton vetë klubi shkodran, mbrojtësi Antonio Marku dhe sulmuesi anësor Arsen Hajdari nuk do të marrin ngarkesë të plotë. Ky është sugjerimi që u ka bërë futbollistëve në fjalë stafi mjekësor dhe nuk dihet se kur do të bashkohen me grupin.

Gjasat janë që të dy ta humbin ndeshjen me Dinamon dhe për trajnerin Canaj janë mungesat të rëndësishme. Gjithsesi, duke qenë se vendi i parë është arkivuar dhe alternativat nuk mungojnë, nuk është se ka ndonjë alarm. Kjo do jetë një mundësi edhe për ndonjë nga të rinjtë të marrin minuta.

Marku: Deri në fund për fitore, Vllaznia mendon për titullin dhe Superioren

Sport Ekspres — Sun, 21 Apr 2019 18:26:35 +0000

Mbrojtësi i majtë i Vllaznisë, Antonio Marku, nuk është aktivizuar plotësisht në këtë sezon pas disa dëmtimeve. Rikthimi i tij në fushë erdhi me golin e barazimit në ndeshjen e Kupës ndaj Kamzës në turin e dytë, ndërkohë që të shtunën ai ishte një nga shtyllat e mbrojtjes në fitoren me Korabin.

Vllaznia u rikthye në stadiumin “Loro Boriçi” pas një periudhe të gjatë dhe kjo fitore i forcoi më shumë pozitat e shkodranëve në kreun e renditjes. Për SportEkspres.com, Marku deklaron se Vllaznia po e respekton garën deri në fund, ndërsa Korabi ishte një rival i vështirë.

“Me Korabin ishte ndeshja e tretë në këtë sezon dhe kjo fitore nuk ishte e lehtë, pasi dibranët janë rivalë të vështirë. Rezultati minimal 1-0 nuk i ul vlerat e skuadrës për këtë fitore. Ne po e respektojmë garën dhe deri në fund të këtij sezoni do të luajmë vetëm për fitore, pa asnjë lëshim me çdo kundërshtar”, u shpreh Marku.

Mbrojtësi tregon se skuadra po mendon edhe për fitore në finalen e Kategorisë së Parë me Bylisin. Marku këto emocione i nis që në javën e ardhshme ndaj Dinamos. “Unë kam luajtur dy sezone në elitë me Dinamon (2010-2012) dhe sfida me ta për mua do jetë e veçantë. Tashmë Vllaznia po mendon për Superioren, por edhe për finalen e Kategorisë së Parë. Me sa duket finalisti tjetër do të jetë Bylisi i Ballshit. Synimi ynë është që ne ta fitojmë atë sfidë”, përfundon Marku.

AGRON KAJA