Kasano vlerëson jashtë mase Antonio Konten dhe nuk i kursen sulmet kundrejt drejtuesve të Romës. Romelo Lukaku është objektivi i madh i Interit në merkato. Belgu nuk i pëlqen barezit të famshëm, i cili tregon edhe sulmuesin e duhur për zikaltrit.

KONTE – “Blerjen më të madhe Interi e ka bërë në pankinë. Konte do të zvogëlojë diferencat e Interit me Juven dhe zikaltrit mund të luftojnë për titullin kampion. Serie A do të jetë e rëndësishme me Sarrin dhe Konten, ndërsa më vjen keq që u largua Alegri.”

LUKAKU – “Personalisht nuk e pëlqej si lojtar. Është çmenduri të shpenzosh atë shumë parash për atë lojtar dhe flas si tifoz. Unë do ja jepja Ikardin Juventusit për Higuain. Unë do e merrja menjëherë Pipitën.”

ROMA – “Jam i lidhur me Romën. Problemi më i madh është Palota me Fiengën dhe Baldinin. Ky i fundit nuk dallohet kurrë, por vendos gjithçka nga Londra. Ai e kishte fiksim që ta largonte Françesko Totin. Roma do të vuajë me këto lloj tipash.”

Për fat të keq, drejtuesit nuk i ofruan rinovimin dhe diçka e tillë trishtoi shumë tifozë të futbollit. De Rosi është ndër romantikët e fundit, ka ëndërruar gjithmonë ta mbyllë karrierën te Roma dhe të largohesh pas një jetë me ngjyrat verdhekuqe mbi supe nuk është aspak e lehtë.

Antonio Kasano ka luajtur bashkë me te, te Roma dhe kombëtarja italiane. Barezit të famshëm nuk i ka pëlqyer trajtimi që klubi kryeqytetas i ka bërë mikut të tij, ndërsa e mbyll me një mesazh për mesfushorin.

“Baldini dhe Palota e përsëritën gabimin. Pas Totit ndodhi edhe me Danielen. Duhet të mos harrojnë faktin që Roma është Toti dhe më pas De Rosi. Roma nuk është Baldini me Palotën. Shpresoj që verdhekuqtë të ndryshojnë pronësi, sepse e meriton që të luftojë për objektiva të rëndësishëm.

De Rosi? I lutem Danieles që të mos tërhiqet nga futbolli, por të vazhdojë të luajë. Me dështakët që ka në qarkullim, Daniele mund të luajë pa problem deri në moshën 45-vjeçare”, përfundon Antonio Kasano.

Barezi i famshëm ka folur në programin “Tiki Taka” për duelin e madh që ekziston mes fenomenit të Barcelonës dhe yllit të Juventusit. Më pas një koment për Interin dhe hera e parë që bie dakord me Uanda Narën, gruan dhe agjenten e Mauro Ikardit.

Fotot e çiftit sollën kritika të shumta, por një tipi si Kasano as që ia ndjen për jetën private të të tjerëve. Rëndësi ka që Ikardi të shënojë gola, ndërsa jashtë fushave mund të bëjë ç’të dojë.

“Mesi dhe Ronaldo janë dy gjëra të ndryshme. Çdokush është me fat që po shijon numrin 10 të Barcelonës. Interi? Zikaltrit nuk janë Barça. Nuk kanë lojtarë që mbajnë topin dhe nuk mund të luajnë me dy lojtarë që nuk mbrojnë. Spaleti ka luajtur gjithmonë me një pykë. Po të isha unë, do i aktivizoja bashkë Ikardin me Martinez.

Fotot e Ikardit? Për herë të parë jam dakord me Uandën. Një person mund të bëjë çfarë të dojë me jetën e tij, mjafton që të luajë mirë dhe të shënojë gola në fushën e blertë.”

Ai sugjeron që Interi duhet të largojë nga ekipi dyshen Ikardi-Perishiç, madje nuk duhet të ketë asnjë dyshim për diçka të tillë. Më pas një replikë me Uanda Narën, gruan dhe agjenten e Mauro Ikardit, si dhe një koment për golin e Raxha Naingolan kundër Juventusit.

“Interi duhet të bëjë vetëm diçka në qershor: duhet t’i nisë për shtëpi Ikardin dhe Perishiç. Është një problem i thjeshtë. Rrëmujën e bëri i pari Perishiç dhe më pas  ti (i drejtohet Uanda Narës, e cila i përgjigjet se po flet miku i Spaletit). Miqtë e mi ndodhen në Bari. Nuk kam miq në botën e futbollit. Goli i Naingolan? Çfarë gafe e Shezinit…”, përfundon Antonio Kasano.

Titulli është fituar, ndërsa zyrtarizimi dhe festa e madhe mund të vijë në ndeshjen e radhës kundër Fiorentinës. Bardhezinjtë e kanë mendjen te ndeshja e kthimit kundër “harkëtarve”. Synimi është kualifikimi në gjysmëfinale.

Megjithatë, zgjedhjet e trajnerit juventin kanë shkaktuar polemika në vendin fqinj. Spali përmbysi golin e Moize Ken dhe siguroi një trepikësh të artë për qëndrimin në elitë.

Sinisa Mihajloviç ishte i pari që reagoi. Trajneri i Bolonjës, por edhe Empoli, Udineze dhe Xhenoa janë ndjerë keq kur kanë parë Spalin të sigurojë një trepikësh të lehtë kundër kampionëve.

“Problemi është kur përballesh me Juven që hedh në fushë të rinjtë ose lojtarë të Serisë C, kjo nuk më duket e drejtë. Ishte diçka që nuk më pëlqeu, por e di që atyre nuk do u plasë fare. Për fat të keq, futbolli italian është i tillë“, komentoi Mihajloviç pas barazimit pa gola kundër Fiorentinës.

Në këtë çështje është përfshirë edhe Antonio Kasano. Barezi i famshëm tregohet i drejtpërdrejtë si gjithmonë. Ai ka mbetur i zhgënjyer nga zgjedhjet e Alegrit dhe e mbyll me një batutë për urrejtjen e madhe që ekziston kundër klubit torinez.

“Nuk më pëlqeu fare qëndrimi i Alegrit. Ai e mbushi ekipin me djem të rinj. Skuadrat që po garojnë për mbijetesën e kanë të vështirë ta pranojnë një situatë të tillë. Juventusi duhet të zbresë në fushë lojtarë për të fituar ndeshjen dhe jo për të zbavitur djemtë e rinj ose për të bërë shfaqje të tilla. Empoli dhe Bolonja ankohen me të drejtë. Bardhezinjtë nuk janë aq të dashur nga njerëzit, nëse e kërkojnë edhe vetë pastaj…”

Një nga pengjet më të mëdha të futbollit italian analizon mendimin e tij në prononcimin e dhënë për “Tiki Taka”. Kasano e cilëson ish-kapitenin një lojtar goli dhe aspak lojtar skuadre. Ai vlerëson cilësitë e Martinezit, ndërsa tregon dhe dëshirat e Luçiano Spaletit, trajnerit zikaltër.

“Interi luan me skemën 4-2-3-1, pra me një sulmues në majë. Ikardi dhe Martinez nuk mund të luajnë së bashku. Nëse do të varej nga Spaleti, do të luante Martinez, sepse ai preferon sulmues që luajnë për skuadrën. Lautaro po paraqitet mirë, është 20 vjeç dhe duhet të luajë titullar, pasi është më i fortë se Ikardi.

Mauro shënon dhe kaq. Trajnerit i pëlqejnë sulmues si: Xheko, Benzema dhe Levandovski. Ikardi është si Inzagi. Mendoj se Spaleti preferon më shumë një sulmues si Martinez, të cilin do e aktivizonte dhe para Piatekut. Ka lojtarë që shënojnë gola, ka edhe nga ata që shënojnë dhe luajnë për skuadrën.”

Sulmuesi argjentinas ka nisur një “luftë” me klubin. Drejtuesit dhe trajneri Spaleti vendosën t’i hiqnin shiritin e kapitenit, ndërsa Ikardi është kapur pas një dëmtimi të mëparshëm dhe nuk po pranon të zbresë në fushë.

Në prononcimin e dhënë për “TikiTaka”, Kasano ia vë gjithë fajin Uanda Narës, agjentes dhe gruas së lojtarit. Deklaratat e saj kundër të gjithëve kanë shkaktuar problemet, ndërsa sulmuesi po tregohet fëmijë me kapjen pas dëmtimit. Në fund merkato dhe një koment për Ivan Rakitiç. Kasano e vlerëson shumë kroatin dhe do nisej menjëherë për ta marrë për Milano, ndërsa i preferuari i tij mbetet Luka Modriç.

SHKAKU – “Uanda e krijoi gjithë këtë katastrofë dhe e futi Ikardin në telashe. Me deklaratat dhe postimet e saj në rrjetet sociale, ajo i krijoi Mauros një tokë të djegur përreth. Ajo flet shumë, flet për të gjithë dhe krijon probleme. I hoqën shiritin e kapitenit dhe do të ketë një shkak për këtë. Nuk janë të çmendur tek Interi.”

DËMTIMI? – “Gjëra të tilla i bëja kur isha 20 vjeç. Tani është një situatë pa kthim prapa. Dëmtimi në gju nuk ishte kaq i rëndë më parë dhe Mauro luante. Me heqjen e shiritit u rikthye dhe dhimbja në gju. Aman me këto skema… Unë isha zëvendëskapiten i Romës, por Spaleti erdhi dhe më tha: ‘Nuk do jesh më, pasi nuk je një shembull’. Kishte të drejtë. Më pas më shpjegoi gjërat që priste nga unë dhe bëri mirë. Nëse është sjellë kështu dhe me Mauron, ekziston një shkak. Nëse nuk kthehet të luajë, ai duhet të largohet në verë. Vazhdon të diskutohet një çështje e tillë vetëm prej Uandës.”

MERKATO – “Rakitiç është një lojtar i nivelit ndërkombëtar. Ai është një kampion dhe do nisesha tani për ta marrë, por e shoh të vështirë që Interi ta blejë atë. Megjithatë, mua më pëlqen më shumë Luka Modriç.”

Përballë ish-futbollistit ishte gruaja e Ikardit, Uanda Nara, e cila nuk e priti aspak mirë këshilën e Kasanos.

Kasano: “I jap një këshillë Ikardit dhe ia thotë dikush që ka bërë plot idiotllëqe. Duhet të shkojë në dhomat e zhveshjes, të sqarohet me shokët, ose me trajnerin. Ai ka probleme me Spaletin dhe me disa lojtarë, kjo është e qartë tashmë. Duhet të sqarohet dhe të mbyllë gjithçka aty, sepse ai i duhet Interit dhe Interi i duhet atij. Nëse nuk ka pajtim, nuk ka më kthim pas”.

Uanda iu përgjigj ashpër: “Këto janë gjepura, si të shkojë në dhomat e zhveshjes, ai shkon përditë aty. Ku ka gabuar Ikardi, për çfarë të kërkojë falje dhe çfarë duhet të sqarojë?”.

Kasano ka një përgjigje origjinale kur pyetet se çfarë do të ndjente, nëse do të ishte në vend të argjentinasit dhe do i hiqnin shiritin e kapitenit. “Ashtu siç jam ndërtuar unë, do shkatërroja gjithçka, por duhet gjetur zgjidhja, pasi Ikardi nuk mund të qëndrojë pa luajtur deri në verë”, përgjigjet barezi i famshëm.

Wanda Nara and Icardi getting lessons in diplomacy and morals from Antonio Cassano.
“Tell your husband to apologise to his team-mates and sort this situation out before it’s too late!”

This is getting beyond ridiculous now ??https://t.co/RSeQk8UFtU

— Uncle $harma ?? (@RSharmzz) February 25, 2019

Rrëfimet e tij janë interesante dhe origjinale. Kështu ka ndodhur dhe kësaj radhe në prononcimin e dhënë për “Sky Sport 24”. Kasano prek shumë tema, duke e nisur me Higuain dhe Ikardin, ndeshjet më të bukura në karrierë, çështjen e racizmit dhe ndeshjet derbi.

Kasano i rikthehet dhe shpërthimit të vitit 2010 ndaj Garrones, presidentit të Sampdorias, të cilin e ofendoi me fjalët “këlysh k… dhe plak m….”, gjë për të cilën ndihet akoma i turpëruar. Më pas dhe krahasimi për talentët e rinj dhe çmimet e çmendura që po qarkullojnë sot në futboll.

HIGUAIN – “Higuain është i vetmi lojtar i mirë i Milanit. Në vend që ta shesin, kuqezinjtë duhet ta ndërtojnë skuadrën rreth tij. Unë do të bëja si Gatuzo: do ta mbyllja në shtëpi. Nëse do të kisha shkopin magjik në dorë, do ta dërgoja tek Interi në vend të Ikardit, sepse Pipita është një super kampion. Ikardi? Nëse dëshiron të largohet do i thosha: ‘rruga e mbarë’. Ky është mendimi im.”

RACIZMI – “Nuk arrij t’i kuptoj këto episode, por jemi të gjithë njësoj. Mendoj se ky problem ekziston në Itali dhe kam përshtypjen se jemi me të vërtetë një vend racist.”

BARELA-ZANIOLO-ALAN – “Sot zhvillojnë 2-3 ndeshje të mira dhe çmimi u shkon në 50, 60, 70, apo 80 milionë euro. Futbolli po shkon në një drejtim të gabuar. Kjo është diçka e çmendur dhe nuk më pëlqen aspak. Sa duhet të paguajmë për Tiago Alkantarën? Sa vlenin Iniesta, Ksavi dhe Pirlo? Alkantara vlen pesëfishin e Barelës. Zaniolo është një lojtar i mirë dhe i ri. I pëlqen të luajë shumë në aspektin fizik dhe më pëlqen, sepse ka personalitet. Do të jetë një Pogba i ardhshëm? Nuk e di, por më pëlqen shumë. E krahasojnë me Totin? Po, natën e mirë! Alan te PSG? Nëse francezët ofrojnë 80 milionë euro, do ta nisja në këmbë për në Paris.”

GOLI I PARË – “Më ndihmoi shumë ai gol kundër Interit, por unë do të arrija sërish të bëhesha një futbollist i nivelit të lartë. Isha i mbushur me vetëbesim, isha i sigurt që herët apo vonë do ia dilja, sepse ky ishte fati im. Sigurisht që goli kundër Interit ma thjeshtoi rrugëtimin. Mendoja se po zhvilloja një ndeshje të mirë, ashtu siç mendoja se do të ishte shoku im i skuadrës që do të bëhej i famshëm. Cilësia e lojës time ishte e çmendur, nuk ishte rastësi, por talenti që më kishte dhuruar nëna natyrë. Vitet më të bukura i kalova te Sampdoria, por nuk harrohet as titulli i fituar me Milanin.”

GARRONE – “Kam bërë shumë gabime, por do të paguaja gjithë floririn e botës për të mos e bërë atë me presidentin. Tregova mungesë respekti dhe më vjen keq për atë gabim të mallkuar, në atë ditë të mallkuar. U trishtova shumë dhe i kërkova 1 mijë herë falje presidentit dhe djalit të tij.”

DERBI – “Më i bukuri ishte ai i Romës. Goli që shënova me kokë kundër Fernando Koutos mbetet në histori. Derbi më tërheqës ishte ai i Xhenovës. Atletiko-Real? Ka diferencë midis ekipeve për fat të keq dhe nuk është një derbi si të tjerët.”

NDESHJET MË TË BUKURA – “E preferuara ime është gjysmëfinalja e Euro 2012, ku fituam përballë Gjermanisë 2-1. Zhvillova një ndeshja madhështore për 60 minuta. Më pas zgjedh Inter-Totenhem (4-1 në Europa Ligë, sezoni 2012-2013), ku zhvillova një ndeshje stratosferike. Siç ka thënë Toti kohë më parë, unë kam dhënë 50% të asaj çfarë mund të jepja. Nuk më pëlqenin stërvitjet dhe i shkatërroja gjërat. Nëse do të bëja atë që duhej për 15 vite, do të bëhesha si Leo Mesi. Argjentinasi do të mbetet përgjithmonë në historinë e futbollit. CR7? Luftëtar dhe atlet i madh, por Leo ka aftësi teknike të pabesueshme dhe është i paarritshëm.”

PENGJET – “Nuk kam pengje sa i përket klubeve. Le të themi që do të më pëlqente të isha pjesë e kombëtares në vitin 2006, por Lipi kishte një hierarki të rëndësishme për dhomat e zhveshjes. Nuk dëshironte lojtarë të cilët shkaktonin trazira në dhomat e zhveshjes. Kam luajtur me skuadrat më të forta në botë dhe nuk mund të them që s’kam qenë i lumtur dhe me fat. E dija se nëse do të dështoja, do të kishte një tjetër tren duke më pritur.”