Bëhet fjalë për Andrej Kramariç, me të cilin kuqezinjtë kanë gjetur marrëveshjen. Sipas raportimeve në mediat italiane, kroati ka rënë dakord me drejtuesit e “Djallit”, ku rol të rëndësishëm ka luajtur padyshim Boban.

Tashmë, duhet të gjendet akordi edhe me Hofenhajmin dhe gjithçka do të mbyllet. Gjermanët kërkojnë 30 milionë euro për të lënë të lirë sulmuesin, shifër që Milani duket se është e gatshme ta paguajë.

Diçka të tillë e pranon agjenti i tij. Vinçenco Kavaliere konfirmon interesimin e Milanit për 27-vjeçarin, por kuqezinjtë duhet të nxitojnë. “Asi” Boban duhet përdorur, pasi rivaliteti për të siguruar lojtarin ofensiv është i madh.

“Kramariç i pëlqen Milanit, por edhe gjysmës së Europës. Nuk mund ta them me saktësi, por çmimi i kartonit varion 30-40 milionë euro. Është një nga sulmuesit më të mirë, por kuqezinjtë kanë një avantazh: Zvonimir Boban. Prezenca e tij në klub mund të ndikojë. Boban e ndjek kombëtaren kroate dhe i di cilësitë e Kramariç. Andrej ka shënuar gola deçiziv, të cilët ishin jetik për kualifikimin e Kroacisë në Botëror”, përfundon agjenti i lojtarit.

Tjetër lëvizje pritet të ndodhë në kampin milanist, por tani një dalje. Diego Laksalt mund të largohet. Rendimenti i uruguaianit nuk ka bindur dhe një ofertë e mirë mund ta largojë nga Milani. Për të interesohen Atalanta, Torino dhe Njukasëlli.