“Përfundimi i këtij kampionati ishte i lexueshëm që në mbylljen e fazës së dytë, dhe kjo skema e fazës së tretë unë mendoj se është e pavlerë. Kjo skemë duhet të ndryshojë urgjentisht, sepse po rezulton një kampionat që vetëm në dy faza luhet me garë reale”, kështu theksoi Andrea Marko në këtë intervistë.

INTERVISTOI: AGRON KAJA

Si e vlerësoni garën e Kategorisë së Parë në fazën e tretë, monotone, të lexueshme apo normale?
-Asnjerën prej tyre, por më shumë duket një garë e pavlerë për futbollin e kësaj kategorie. Unë e shikoj se brenda kësaj gare ka një matematikë gënjeshtare në kuptim e plotë të fjalës, sepse të gjitha verdiktet janë të deklaruara e të mbyllura në të dy anët e renditjes në grupe.

Është luajtur gjysma e fazës së tretë, çfarë kanë treguar skuadrat më shumë nga dy fazat e para?
-Në dy fazat e para kishte më shumë luftë sportive, kishte më shumë garë, ndërsa në këtë fazë të tretë, skuadrat që kanë dalë nga synimet po luajnë me ekipe eksperimentale. Kështu edhe Dinamo, e cila në sezonin tjetër ndoshta do të thotë më shumë se sa ky që po mbyllim.

Java e 23-të ka disa sfida delikate, pritet që këtë javë të ketë lëvizje të forta në renditjen e të dy grupeve?
-Në Kavajë mendoj se Besa-Bylis është një ndeshje delikate, e cila do ta shtojë rivalitetin mes tyre deri në mbyllje të kampionatit. Edhe ndeshjet që luhen në zonën Play-out në dy grupet janë shumë delikate, ndërkohë që sfida Turbina-Elbasani merr vlerat e “derbit” të Shqipërisë së Mesme.

Ku priten rezultate surprizë në javën e 23-të, në Grupin A, apo në Grupin B?
-Rezultate surprizë edhe mund të ketë në të dt grupet, por si do që të dalin ato, unë mendoj se renditja është e përcaktuar. Në sfidën e Cërrikut mund të kemi barazim, e po kështu në Vora-Iliria e Veleçiku-Shënkolli. Ndërsa Besa është më afër fitores me Bylisin, por gjithçka mes tyre nuk mbyllet këtu.

Si e mendoni përfundimin e Kategorisë së Parë të këtij sezoni?
-Përfundimi ishte i lexueshëm që në mbylljen e fazës së dytë dhe kjo skema e fazës së tretë, unë mendoj se është e pavlerë. Kjo skemë duhet të ndryshojë urgjentisht, sepse po rezulton një kampionat që vetëm në dy faza luhet garë reale.

Për SportEkspres.com, ai thekson se ky bojkot i Shoqatës së Arbitrave ka domethënie që duhet vlerësuar për vazhdimësinë. “Unë e mendoj të drejtë bojkotin që arbitrat i bëjnë kampionatit. Ky është një veprim që kërkon refleksion më të plotë nga strukturat që e organizojnë lojën e futbollit në vendin tonë.

Nuk jemi ende një shtet që të besojmë stjuartët në stadiumet tona. Sikundër ndodhi në Kamzë, duhen bërë shembull edhe ndeshje të tjera, ku në Kategorinë e Parë dhe në të Dytën ka raste të shumta”, u shpreh Marko.

Ndërprerjen e kampionateve ai e shikon në interes të lojës së futbollit. “Arbitrat e ndërprenë futbollin, por kjo ndërprerje i shërben kësaj loje. Janë disa aktorë e faktorë që duhet të gjejnë veten në këtë situatë, ndërsa duhet ndërhyrje urgjente për përcaktimin real të masave të sigurisë në stadiume. Këtë herë është dhunuar i gjithë futbolli ynë, jo vetëm arbitrat”.

INTERVISTOI: AGRON KAJA

Janë luajtur 9 nga 10 ndeshjet e javës së 17-të të Kategorisë së Parë, si i përshkruani rezultatet?
-Në tërësi, rezultatet e ndeshjeve të javës së 17-të në Kategorinë e Parë ishin të pritshme, duke veçuar fitoren e Lushnjes me Besën, si dhe fitoren e Orikumit në tranfertë me Apoloninë. Elbasani gaboi me barazimin në fushën e tij, po ashtu edhe Iliria me Besëlidhjen.

Duke ju referuar skuadrave që kërkojnë kreun në dy grupet dhe atyre më të rrezikuara për mbijetesë, çfarë treguan ato në këto sfida?
-Treguan se janë të denja për ato vende. Vllaznia është e sigurt në krye të Grupit A, po kështu Bylisi në Grupin B. Edhe pse nuk luajtën me Tomorin, ballshiotët e ruajtën kreun dhe distancën me Besën. Vora dhe Turbina duken dy skuadrat më të rrezikuara për rënie nga kategoria.

Një ndeshje nuk u luajt, e shikoni me rrezik mosparaqitjen e Tomorit në ndeshjen në Ballsh?
-Tomori zgjodhi mënyrën e kokëfortësisë, por harroi që Rregulloren e FSHF-së që e ka miratuar në nisje të sezonit. Pavarsisht padrejtësisë që ju bë me Apoloninë, duhet ta vazhdojë garën dhe të mos niset nga interesa të individëve, që nga ana profesionale nuk e justifikojnë drejtimin e skuadrës.

Këtë javë ka patur shumë ankesa për gjykimet, mendoni se arbitrat duhet të marrin fajin e dështimeve të skuadrave?
-Arbitrat janë njerëz dhe do gabojnë. Gabime bëhen edhe ndaj Partizanit e Kukësit, por kjo nuk do të thotë se ata janë fajtorët. Në Kategorinë e Parë niveli i gjykimeve është i barabartë me ato të skuadrave, ndaj them se nuk ka ndonjë të veçantë mes tyre në garën e kampionatit.

Mund të themi se java e 17-të i “saldoi” pozicionet e skuadrave në renditje për fazën e dytë?
-Përfundimisht kjo renditje do të mbetet edhe pas ndeshjeve të javës së 18-të, me ndonjë ndryshim që nuk do ndikojë në formimin e minigrupeve. Ndjej keqardhje për Elbasanin në fundin e renditjes, por edhe për Besën në rivalitetin për kreun e Grupit B me Bylisin.

Kategoria e Parë do të luajë fazën e tretë me përgjysmimin e pikëve, është kjo formula e duhur për këtë kategori?
-Unë mendoj se jo, sepse duke parë që kemi disa skuadra që kanë luajtur edhe në Superiore, njëherësh edhe me krijimin e Ligës Profesioniste, një kampionat me 16 skuadra dhe një grup do ta shtonte më shumë cilësinë në këtë kategori. Gjithashtu do ta forconte edhe Ligën me futbollistët e saj.

Specialisti i futbollit, Andrea Marko, për SportEkspres.com deklaron se luftë më e fortë do të zhvillohet në Grupin B, pasi sipas tij renditja e skuadra do ta imponojë shumë rivalitetin. Duke e menduar Vllazninë në kreun e Grupit A, Marko kërkon që skuadrat të jenë të përgjegjshme, kryesisht në fazën e tretë. Ato që dalin nga objektivat mund të jenë më tolerante, sidomos me skuadrat që duan pikë.

INTERVISTOI: AGRON KAJA

Andrea, Kategoria e Parë nis gjysmën e dytë të sezonit, si e përshkruani garën në tërësi nisur nga 14 ndeshjet e luajtura në gjysmën e parë?
-Edhe Kategoria e Parë është bërë një garë e fortë, pasi aty po luajnë skuadra të mëdha të futbollit shqiptar, madje që kanë dalë edhe kampione. Duke qenë Dinamo, Vllaznia, Elbasani, Besa, Apolonia, Bylis e Tomori, që kanë eksperiencë në Superiore, gara ka qenë e fortë dhe e bukur.

Në këtë periudhë pa aktivitet zyrtar, si mendoni se e kanë shfrytëzuar skuadrat me lëvizjet e tyre gjatë muajit janar?
-Duke përjashtuar Lushnjen, që u përgatit dy javë në Malin e Zi, skuadrat e tjera janë përgatitur në terrene shumë të vështira, madje edhe nën ndikimin e kushteve të rënduara të motit me reshje shiu e bore. Gjithsesi, të gjitha skuadrat kanë qenë aktive në përgatitjet e tyre, sipas mundësive.

Çfarë mundësi teknike krijohen për skuadrat në këtë minifazë gjatë muajit janar?
-Kjo minifazë përgatitore zhvillohet me llogari nga të gjitha skuadrat, nga kreu në fundin e renditjes. Përgatitjet janë zhvilluar edhe me ndeshje miqësore, që  u japin trajnerëve më shumë mundësi të njohjes së gjendjes. Faza e tretë është e vështirë, pasi aty llogaritë edhe “ngatërrohen”.

Nisur nga emrat e afruar në merkato, Bylis e Besa në Grupin B kanë bërë shumë përforcime. A do të jetë një duel mes tyre për vendin e parë në grup?
-Patjetër që mes Bylisit e Besës gara do të jetë shumë e fortë për vendin e parë në Grupin B. Mes tyre do të jetë luftë e hapur, por të dyja duhet të kenë kujdes nga faza e tretë. Kjo sepse tolerimet me këtë formulë janë të pashmangshme, kryesisht nga skuadrat që dalin nga objektivat.

Vllaznia në Grupin A duket pa shqetësime dhe nuk ka lëvizur shumë në merkato. A i ka kapacitetet që ta ruajë vendin e parë në grup?
-Me këtë situatë që ka skuadra e Vllaznisë në renditjen e Grupit A, unë e mendoj në Kategorinë Superiore. Në këtë gjysmë të dytë i duhet që ta menaxhojë me kujdes kreun e grupit, por edhe të mendojë për skuadrën që do t’i duhet për Superioren e sezonit të ardhshëm.

Formula e fazës së tretë luhet me pikë të përgjysmuara, a do të ketë tolerime nga skuadrat që mund të kenë dalë nga objektivat e tyre?
-E përmenda edhe më sipër këtë fakt. Është një formulë që nuk të nxjerr dot jashtë realitetit dhe kjo për skuadrat që nuk rrezikojnë zbritjen një kategori më poshtë, por edhe te grupi i skuadrave që nuk do të kenë mundësi të kapin objektivat e tyre për kreun.

Në të dy grupet, në krye dhe në fundin e renditjes, si i mendoni verdiketet e këtij kampionati?
-Nisur nga vështirësia që sjell faza e tretë me përgjysmimin e pikëve, them se Vllaznia duhet të luftojë euforinë që mos rrezikojë kreun. Në këtë grup, Vorën e shoh të rënë nga kategoria, ndërsa Grupi B do të ketë më shumë rivalitet dhe këtu do të vendosin më shumë ndeshjet direkte.

Andrea Marko ka qenë pjesë e futbollit dinamovit në periudhën 1975-1986, njëherësh edhe i Kombëtares. Në këtë karrierë ai kujtohet si futbollisti që u dënua nga sistemi i kaluar për bastet sportive, duke e larguar në moshë të re nga futbolli i luajtur. Në dy dekadat e fundit Marko ka qenë trajner në skuadrat Luftëtari, Bylis, Dinamo, Apolonia, Skënderbeu e Kastrioti.

INTERVISTOI: AGRON KAJA

Si e përshkruani javën e 17-të të Kategorisë Superiore, Jo vetëm për nga rezultatet që u arritën?
-Ka qenë një javë e cila veç normalitetit, pati edhe surpriza, këtë herë në rezultate. Por për këtë javë nuk duhen lënë pas fjalët e mira për Teutën, e cila me fitoren në Krujë e konfirmoi veten si pretendente për titullin. Njëherësh, këtë javë veçohet edhe kriza e fitores te Skënderbeu.

Cilën ndeshje e veçoni si surprizë në rezultatet e kësaj jave të parafundit të fazës së dytë?
-Mendoj se humbja e Skënderbeut në Korçë mbetet e tillë, pasi askush nuk e kishte menduar të tillë. Fitorja e Teutës në Krujë pritej, ndoshta jo kaq e thellë, ndërkohë që rezultatet e tjera i mendoj në logjikën e tyre pa asnjë dyshim.

Sa vlera ka në futbollin e Superiores një ndeshje si ajo Partizani-Kukësi që u luajt pa tifozë?
-Futbolli duket si i pa vlerë kur në shkallët e stadiumit nuk ka tifozë, por nuk e kuptova pse ekipet nuk paguan për gjobën që ata të ishin në stadium. Ndeshja Partizani-Kukësi u luajt më një lojtar më pak në fushë, kështu futbolli ka humbur shumë vlera.

Këtë javë kemi dy fitore në transferta, ju i shikoni logjike apo me dyshim?
-Unë mendoj se si te Skënderbeu, ashtu edhe te Kastrioti, të gjithë të marrin përgjegjësitë e tyre për humbjet. Të mos fiksohen pas shprehjes se kështu e ka futbolli, sepse po i çojnë skuadrat në të kundërt të objektivave. Gjithsesi, meritat e fituesve nuk zbehen në këto dy sfida.

Kishte diçka tjetër ndryshe që ju mund ta veçoni në këtë analizë të javës së 17-të të Superiores?
-Ndoshta mund të veçohet numri i madh i golave, 13, një mesatare e mirë me 2.6 gola për çdo ndeshje. Kjo javë e kurorëzoi Partizanin “Kampion Dimri”, njëherësh për rezultatet që u arritën, duket sikur diçka zien për gjysmën tjetër të kampionatit.

Nisur nga 17 javët e luajtura, çfarë mendoni se duhet ndryshuar në gjysmën tjetër të këtij sezoni në Superiore?
-Duke qenë se të gjitha skuadrat do të vijnë më 20 janar nga faza përgatitore, besoj se do të kemi një gjysmë të dytë interesante në këtë kampionat. Dhe këtu do të dëshiroja që stadiumet të jenë me tifozë, sepse me dënimet që po jepen, më shumë po ja prishim bukurinë lojës.

Sot në mesditë zhvillohet takimi final për Ligën Profesioniste në futboll, si e mendoni këtë hallkë të re në futbollin tonë elitar?
-Liga Profesioniste duhet të kishte vite në futbollin shqiptar, gjithsesi është për tu përshëndetur. Por  duhet të jemi të ndërgjegjshëm se do të jetë si puna e foshnjës, pasi do kohë për t’u rritur. Pozitive është se Liga Profesioniste do të rritë sovranitetin, financat dhe nivelin e organizimit të garës.

“Kam luajtur në Kuçovë, ku fituam thellë. E mbaj mend edhe për një episod: nuk kishim këpucë me taka të gjithë dhe ia jepnim njëri-tjetrit. Ai që m’i dha mua kishte vënë thumbat e gjatë në fillim dhe unë vetëm pengohesha. Trajneri më hoqi sepse vetëm rrëzohesha. Të gjithë mbetën të habitur, sepse nuk kishte ndodhur që një lojtar që hynte si zëvendësues dhe të ndërrohej përsëri. Pasi e mori vesh hallin tim, më përgëzoi se si kisha arritur të luaja me ato këpucë”, tregon tekniku për gazetarin Eduart Ilnica, në “Konica.al”.

PENGU – Biografia ishte pengesë në ato vite dhe Andrea shprehet kështu: “Nga gjyshi, për shkak të biografisë, nuk jam grumbulluar ndaj Irlandës së Veriut. Ajo që më ka mbetur peng, ishte që nuk luajta kundër Aberden në Skoci, që në fund të sezonit fitoi Kupën e Kupave. Në Tiranë dolëm 0-0 dhe unë luajta, por fati nuk na deshi që të shënonim. Në kthim ata fituan 1-0. Ishte koha kur Aberden drejtohej nga Aleks Ferguson dhe unë e mbaj mend shumë mirë. E kujt i shkonte mendja se ai do të bëhej trajner legjendë me Mançester Junajtid”.

GJOBA DHE TERIM – I pyetur me episodet e veçanta që i kujtohen, Andra Marko veçon dy: “Janë shumë, por më kujtohet viti 1985. Ne do luanim me Greqinë, sipas kalendarit, por vdes Enver Hoxha dhe natyrisht ndeshja nuk u zhvillua. Me marrëveshje, ndeshja shtyhet për në nëntor. Barazojmë 1-1, një ndeshje e mirë dhe në fund një kundërshtar grek më kërkon fanellën, duke më zgjatur të vetën. Më erdhi turp mos ia jepja timen dhe kështu e hoqa dhe ia dhashë. Kur shkoj të marr pagën, kisha 1250 mijë lekë të vjetra të asaj kohe minus nga rroga. Ishte gjoba që më kishin vendosur për fanellën që nuk kisha dorëzuar. Ajo bluzë kushtonte 250 lekë të vjetra dhe ishte trikotazh, nuk kishte as vlerë, me dy herë që lahej zbardhej fare”, vijon dinamoviti.

“Një tjetër episod që mbaj mend ishte një miqësore me një ekip turk, ku luante edhe Fatih Terim, sot trajner i Turqisë. Dolëm barazim 1-1, por unë humba një rast ideal fare pranë portës. Terim, në fund, më erdhi dhe më rrahu shpatullat. Me sa kuptova më tha që mos u mërzit se miqësore ishte”, përfundoi Andrea Marko.