Nisur nga kjo situatë, mundësia e parë është që në Kategorinë e Parë të shkojë një ekip i cili do të dalë nga një ndeshje Play-out mes dy skuadrave që do të renditen në vendet e treta në Grupet A dhe B të Kategoriaë së Dytë. Në Grupin A këtë javë formatohet renditja e plotë për vendin e dytë dhe të tretë, ndërsa në Grupin B Albpetroli është para Maliqit që ka më pak shanse. Këta të fundit i penalizon edhe infrastruktura.

Në Patos këtë ide e kanë qarkulluar muaj më parë, ndaj skuadra patosarake i ka dhënë “sprint” të fortë ndeshjeve në fazën e dytë. Stadiumi “Alush Noga” i plotëson kushtet dhe ky është një faktor plus për Albpetrolin, që aktualisht renditet në vendin e tretë në Grupin B të Kategorisë së Dytë. Në Grupin A të kësaj kategorie, vendi i dytë dhe i tretë janë  ende në diskutim mes Gramshit, Luzit 2008 dhe Partizanit B.

AGRON KAJA

Partizani është skuadra me numrin më të pakët të pikëve pas 27 ndeshjesh. Kukësi kampion i Ernest Gjokës ka pasur një pikë më shumë se “të kuqtë” e këtij sezoni, ndërsa Skënderbeu e ka mbyllur këtë fazë në tri sezonet e fundit ku është shpalluar kampion me 60, 63 dhe 57 pikë.

“Demat” kanë gjithashtu golavarazhin më të ulët të pesë viteve të fundit: +16. Sulmi është pika e dobët e Partizanit me vetëm 31 gola, ndërkohë Skënderbeu i vitit 2015/2016 mban rekord me 56 gola të shënuar dhe një golevarazh +37.

Mbrojtja e Partizanit ka lejuar vetëm 15 gola deri më tani, por rekordi i mbrojtjes më të mirë pas 27 ndeshjesh i takon Skënderbeut të sezonit 2014/2015. Skuadra e Josës lejoi vetëm 12 gola në tri fazat e para të atij sezoni.

Në analizën e mëposhtme është listuar “gjahu” i preferuar i çdo ekipi të Kategerisë Superiore. Ndeshjet e marra në tavolinë pas përjashtimit të  Kamzës nga Skënderbeu, Flamurtari dhe Luftëtari nuk janë marrë në bazë për këtë analizë.

Partizani kryesues është i vetmi ekip që ka mundur dy ekipe në të tre përballjet e zhvilluara deri më tani. Rekord absolut ka dhe Kukësi ndaj Kamzës dhe Teuta ndaj Kastriotit.

PARTIZANI
Kastrioti – 3 ndeshje, 3 fitore  | 1 – 0, 1 – 2, 2 – 0 |
Kamza – 3 ndeshje, 3 fitore     | 0 – 1, 1 – 0, 0 – 1 |

KUKËSI
Kamza – 3 ndeshje, 3 fitore     | 1 – 0, 0 – 2, 3 – 2 |

TEUTA 
Kastrioti – 3 ndeshje, 3 fitore  | 2 – 0, 0 – 4, 1 – 0 |

LAÇI 
Tirana – 3 ndeshje, 2 fitore, 1 barazim | 0 – 1, 2 – 1, 1 – 1 |

FLAMURTARI
Tirana – 3 ndeshje, 2 fitore, 1 humbje | 1 – 0, 1 – 0 (h) , 1 – 0 |

SKËNDERBEU
Kastrioti – 3 ndeshje, 2 fitore, 1 humbje | 0 – 3, 1 – 0, 2 – 1 (h)|
Flamurtari – 3 ndeshje, 2 fitore, 1 humbje | 0 – 2, 1 – 0, 2 – 0 (h) |
Partizani – 3 ndeshje, 2 fitore, 1 humbje | 1 – 0, 2 – 0, 0 – 1 (h) |

LUFTËTARI
Teuta – 3 ndeshje, 2 fitore, 1 humbje | 3 – 1, 1 – 0 (h), 1 – 0 |

TIRANA –
Kastrioti – 3 ndeshje, 2 fitore, 1 humbje | 2 – 3, 3 – 0, 1 – 0 (h)|

KASTRIOTI
Kamza – 3 ndeshje, 2 fitore, 1 humbje | 2 – 0 (h), 3 – 0, 1 – 0 |
Luftëtari – 3 ndeshje, 2 fitore, 1 humbje | 0 – 1, 0 – 2 (h), 1 – 5 |

KAMZA –
Tirana – 3 ndeshje, 1 fitore, 1 humbje, 1 barazim | 0 – 1, 1 – 1 (h), 4 – 1 |

FLORIAN ALLA

“Për Kategorinë e Parë do të ishte më mirë një kampionat me tre faza por pa këto mini-grupet, sepse që këtu duket si formulë e dështuar. Ndërkohë që këto ndërpreje e këpusin fare garën”, kështu theksoi ish-trajneri i Besëlidhjes në këtë bisedë.

INTERVISTOI: AGRON KAJA

Si i përshkruani rezultatet e javës së 20-të e Kategorisë së Parë, në të dyja zonat?
-Më shumë spikat fitorja e Veleçikut me Vorën, që e nxori nga lufta për mbijetesë. Fitorja e Korabit me Erzenin ishte një tjetër ndeshje për t’u veçuar. Shijakasit tashmë duken të dalë nga lufta për vendin e parë në grup.

Në këndvështrimin tuaj, ishin të pritshme apo surpriza këto rezultate?
-Të pritshme i mendoj të gjitha rezultatet e skuadrave që luajnë në Play-off për të dyja grupet, ndërsa ato të zonës Play-out ndoshta mund të ishin ndryshe.  Vetëm në Grupin B do të kemi rivalitet deri në fund. Mes Bylisit e Besës gjithçka do të vendoset në sfidën direkte mes tyre, ndërsa Vllaznia e ka të shtruar rrugën e kreut të grupit. Ndoshta mes Elbasanit e Turbinës mund të ketë ndonjë të papritur.

Futbolli gjatë këtij muaji ndalet në dy javë, sa i shërben kjo ecurisë së garës?
-Këto ndërpreje e këpusin fare garën. Në periudhën tetor-nëntor ato ndikuan për mirë te skuadrat, sepse ishte fillimi i sezonit, ndërsa tani i takon që një skuadër e cila kishte pushimin në kalendar, të luajë pas tre javësh një ndeshje zyrtare.

Sa efikase duket formula e fazës së tretë në Kategorinë e Parë?
-Ne si shqiptarë e gjejmë diçka për ta prishur garën, e në këtë rast është kjo formula e fazës së tretë. Për Kategorinë e Parë do të ishte më mirë një kampionat me tre faza, por pa këto mini-grupet, sepse që këtu duket si formulë e dështuar.

TIRANA-LAÇI -“Kupa e Shqipërisë ndryshon nga Kampionati dhe në ndeshjet çerekfinale priten rezultate interesante. Sa i përket ndeshjes nesër Tirana-Laçi, përpos nostalgjisë e respektit për të dyja skuadrat, mendoj se Tirana është më e avantazhuar. Për kualifikimin ka edhe një ndeshje. Laçi e shikon Europën më shumë nga Kupa, ndaj them se do jetë një kryendeshje e këtij turi”, deklaron Memelli.

KAMPIONATI –  “Duke e nisur nga sfida Skënderbeu-Kukësi, shpresoj që skuadra korçare të shpëtojë nga dënimi 10-vjeçar dhe të shtunën të luhet një ndeshje e fortë. Të gjitha takimet e ditës së diel janë të vështira dhe kanë të veçantat e tyre. Kastrioti-Tirana është mundësia që krutanët të rivalizojnë Luftëtarin për mbijetesë, në takimin Laçi-Flamurtari luajnë dy skuadra të barabarta në renditje, ndërsa Partizani-Teuta, sfida ku dy skuadrat e kreut duan të forcojnë pozitat e tyre”.

“Ndërprerja e kampionateve ishte e mirë për gjithë futbollin tonë dhe jo vetëm për arbitrat, kjo që të gjithë aktorët e faktorët të ndërgjegjësohen. Unë kam nisur të luaj si profesionist në vitin 1998 në situata edhe më të vështira, por 20 vite më pas nuk duhet të pretendojmë se jemi në atë kohë. Gjithsesi, përjashtimi i Kamzës i prish punë kampionatit”, theksoi Memelli për SportEkspres.com.

MUNGESA E GOLAVE –  Ndërsa për shterpësinë e golashënuesve në Kategorinë Superiore, Memelli shprehet: “Shënimi i golave në këtë sezon tregon një shterpësi të rrallë në edicionet e fundit. Sulmuesit nuk shënojnë shumë dhe unë mendoj se ata vetë punojnë pak individualisht, ndërsa trajnerët e skuadrave më shumë fokusohen te puna me grupin. Unë punoja me elementë të veçantë për shënimin e golit, gjithmonë pas stërvitjes me grupin”.

AGRON KAJA

“Kur mendon se kemi të bëjmë me kampionen në fuqi, Skënderbeun, natyrisht që pas humbjes me Partizanin, gjithçka për këtë situatë të çon te dënimi i FIFA-s. Kështu po ndodh edhe me Luftëtarin, i cili u ‘shkërmoq’ në fushën e tij nga Kastrioti. Asgjë e mirë nuk ndjehet në fushë nga ai Luftëtar i sezonit të kaluar. Humbja 1-5 ndaj Kastriotit duket si një “puç” brenda familjes bluzi. Këtë ndoshta e tregon edhe largimi i trajnerit Mezani”, kështu theksoi Dosti në këtë deklaratë.

Dhe për SportEkspres.com, ish-gardiani i Elbasanit shkon edhe më tej për këtë situatë: “Duke i parë Skënderbeun e Luftëtarin brenda rezultateve të javës së 19-të, zbritjen graduale të tyre në tabelën e renditjes, mund ta quajmë edhe si një goditje të kampionatit në pjesën më të bukur të tij. Luftëtari këtë e tregoi më frikshëm dhe është normale të thuhet se filloi ‘rënia e lirë’ e tyre. Mbijetesa ndoshta do të shtojë në ekuacionin e saj edhe njerën prej këtyre dy skuadrave”.

AGRON KAJA

Për 17 sezone rresht, Vasil Ruci ka qenë sulmuesi kryesor i Flamurtarit të Vlorës (1976-1993), ndërkohë që në sezonin 1990-1991 është shpallur kampion me këtë skuadër të madhe. Golat e tij janë të shumtë, por veçohet ai ndaj Barcelonës në vitin 1986. Në dy sezone ai ka qenë kryegolashënues i kampionatit, duke mbetur një nga më të mëdhenjtë e futbollit vlonjat dhe atij shqiptar ndër vite.

INTERVISTOI: AGRON KAJA

Në këtë mot të rënduar nga reshje shiu e bore, mundësohet marrja e ngarkesave stërvitore?
-Kjo varet shumë nga terrenet ku përgatiten skuadrat, por edhe nga programet stërvitore të trajnerëve. Por unë e shoh ndryshe këtë ecuri të Kategorisë Superiore në këtë sezon, pasi ka shumë ekipe me probleme dhe dy skuadra të dënuara, ndaj këtu nuk mund të mendohet për futboll elitar.

Kjo javë ka kulmuar përgatitjet e skuadrave edhe me miqësore, mund të tregohen vlerat reale të skuadrave pas një jave përgatitje?
-Që në fillimin e kësaj minifaze përgatitore nuk mendohet se skuadrat kanë arritur gjendjen e tyre më të mirë dhe ndeshjet miqësore evidentojnë dukuri që trajnerët i sistemojnë në procesin stërvitor. Në miqësore bëhen kolaudime të vogla në skuadër, më shumë për të afruarit e rinj në merkato.

Po situatën te skuadra e Flamurtarit, si e mendoni për dy fazat e tjera të Superiores?
-Nuk besoj se Flamurtari është keq, sikundër lexoj e dëgjoj në media. Mbështetja që i jep skuadrës administratori Sinan Idrizi, besoj se do ta mbajë skuadrën në këto nivele si në dy fazat e para, por unë e shoh më pranë zonës së Europës në renditjen e Superiores.

Nga skuadrat e Superiores në këtë sezon, mendoni se Luftëtari po rrezikon shumë pas vendimit të UEFA-s?
-Dyshimet që ka UEFA nuk besoj se janë pa gjë dhe së bashku me Skënderbeun bëhen dy skuadra me probleme në Kategorinë Superiore. Kjo situatë vjen nga mosprivatizimi i klubeve tona të futbollit dhe Liga Profesioniste që u zyrtarizua muajin e kaluar nuk bind shumë.

Cilat nga skuadrat e Kategorisë Superiore i veçoni për përgatitje më të mira në këtë periudhë dimërore?
-Përgatitjet e tregojnë vetë situatën dhe unë besoj se Partizani me Kukësin në Antalia të Turqisë dhe Teuta këtu në Shqipëri janë më aktivë. Ata po bëjnë përgatitje me standarde,  duke zhvilluar edhe miqësore me skuadra të Superligës turke. Përgatitjet e tyre i veçojnë nga skuadrat e tjera.

Gjysma e dytë e këtij sezoni të Superiores do të nisë me ndeshjet e 1/8-ve të Kupës së Shqipërisë, i ndihmojnë këto për kolaudim më të mirë të skuadrave drejt kampionatit?
-Kupa ndihmon, por kolaudimi i skuadrave normalisht duhet të jetë bërë para këtyre ndeshjeve. Sepse edhe ky është një trofe që synohet nga të gjitha skuadrat, por edhe një javë më shumë përgatitje për kampionatin, skuadrave të Superiores ju vlen për të bërë përshtatjen e plotë.

Cili do të ishte parashikimi juaj për verdiktet e këtij kampionati të Kategorisë Superiore?
-Partizani është më i gatshëm për titullin kampion, por Kukësi duhet skuadër më e kompletuar. Teuta do të jetë si një “nëndetëse” pas tyre, ndërsa Laçi e Flamurtari synojnë Europën. Te skuadrat për mbijetesë, veç Kastriotit të rrezikuar, të tjerat do të varen shumë nga merkato e financat.

Pas dy fazave të para në Kategorinë Superiore, Arbri e shikon të vështirë dhe të fortë garën për kreun, të cilën e ndan mes Partizanit, Kukësit e Teutës. Laçin dhe Flamurtarin i quan vetëm skuadra që duan Europën dhe për zonën e mbijetesës veçon Kastriotin. Për skuadrën e dytë që mund të zbresë nga kategoria, ai e sheh në dyshen mes Luftëtarit e Kamzës.

INTERVISTOI: AGRON KAJA

Nga “Dinastia Arbri”,  po bëhet ende “rezistencë” në futbollin e kësaj periudhe?
-Mbiemri “Arbri” asnjëherë nuk ka luajtur futboll për të rezistuar. Njihet kontributi ynë ndër vite, i cili sot për sot mbahet në trajning. Unë dhe Klodiani drejtojmë skuadra të moshave në Berat, Gersi të rinjtë e Tomorit, ndërsa Polizoi ka ditë si zëvendëstrajner te Luftëtari.

Në familjen tuaj, do të ketë të tjerë “Arbri” për futbollin shqiptar?
-Besoj se do të presim disa vite, jo shumë, që pasardhësit tanë të shafqen në futbollin shqiptar. Aktualisht, në aktivitet me moshat janë dy djemtë e Gersit, Geroni dhe Amari në Berat, ndërsa në Vlorë është djali i Polizoit, Noeli. Duken me talent në futboll, por të presim.

Kur ju luanit në një skuadër me vëllanë tuaj Arbenin, si ndjeheshit?
-Nuk ka më bukur se kur luan në një skuadër më vëllanë. Beni ka qenë një futbollist i talentuar me Tomorin e Kombëtaren, dhe besoj se në atë periudhë të dy kemi dhënë kontribut të madh. Te Tomori rezultatet ishin pozitive, ndërsa Arbeni luajti me sukses edhe në Greqi.

Kur sheh sot futbollin shqiptar, si e kujton aktivitetin tënd si futbollist i Tomorit?
-Futbolli shqiptar sot ka shumë ndryshim me atë futboll kur unë kam luajtur. Ne kishim ekonomi të dobët atëhere, por prodhonim lojë dhe jepnim shpirtin në fushë. Këtë nuk e shohim sot te skuadrat e Superiores, ndoshta edhe nga hapësira e tregut në futbollin tonë.

Në karrierën tuaj 15 vjeçare si futbollist, keni një ndeshje që ju ka mbetur më shumë në kujtesë?
-Ka shumë ndeshje e detaje që unë i veçoj dhe i ruaj në kujtesë, por më të veçantë kujtoj ndeshjen Tomori-Kombëtarja, më 15 maj 1985. Kjo ndeshje u luajt në përurimin e stadiumit “Tomori”, dhe në fitoren tonë 3-1 unë shënova golin e parë.

Aktualisht sa e ndiqni futbollin shqiptar sot?
-Natyrisht që e ndjek, dhe shumë rregullisht. Me këtë shpërndarje që i është bërë Superiores dhe Kategorisë së Parë, thuajse shoh një ndeshje në ditë, ku gjeografia e këtij interesi për mua është në periferinë e Myzeqesë, shpesh edhe në Tiranë.

Në 18 javët e luajtura në Superiore, çfarë mund të dalloni si dukuritë më të veçanta?
-Dukuria më evidente është fakti se Partizanit si kryesues i renditjes po ecën  mirë drejt titullit kampion. Nuk mendoj një Skënderbe si në sezonet e kaluara, ndërsa Kukësi do jetë rival, së bashku me Teutën që po tregohet skuadër simpatike.

Në fundin e renditjes janë katër skuadra, ju si e shikoni mbijetesën e tyre në Superiore?
-Me pozicionin në fundin e renditjes Kastrioti duket shumë i rrezikuar, dhe skuadrën e dytë që mund të zbresë nga Kategoria Superiore e shoh mes Kamzës e Luftëtarit. Kjo do të varet shumë nga përforcimet që mund të bëjnë gjatë këtij muaji dhe nga pikët që do të grumbullojnë në dy fazat e tjera.

Po për Kategorinë e Parë ku Tomori ka sezone që “vegjeton”, si e mendoni vazhdimësinë e tij?
-Në 14 javë, Tomori nuk tregoi se është për pesëshen e parë në Grupin B dhe po rrezikon shumë mbijetesën në Kategorinë e Parë. Ndryshimi në bankinë shpresoj të sjellë fat, por interesimit të bashkisë i duhet edhe një sponsor, apo kalim i klubit me maxhorancë drejtues privatë.

U luajt edhe java e katërt e Kategorisë Superiore, që prodhoi vetëm shtatë gola, tre prej tyre nga pika e bardhë e penalltisë, një në Kamzë e dy në Kukës në sfidën mes vendasve dhe Skënderbeut. Po shihet qartë se nga javë në javë zgjidhja po vjen nga 11-metërshat, ose nga goditjet standarde e krosimet. Kështu u shënua edhe këtë javë. Të qëndrojmë në Kukës, aty ku goli i parë u realizua pas një krosimi, që u shoqërua me uljen e topin nga Soue (pa dashje) për Takun, i cili e dërgoi në zonë te Dita dhe ky i fundit pas një marrje të mirë realizoi. Në Kamza-Teuta miqtë iu gëzuan një autogoli. U bënë disa gabime, me Arrabal që nuk kontrolli topin që i iku nga kontrolli Latif, ndërsa më pas Lena vertikalizoi për sulmuesin ganez dhe gjuajtja e tij shkoi në rrjetë pas devijimit të korçarit Frashëri. Rastet në këtë ndeshje ishin me “pikatore”. Në Laç u shënuan dy golat e tjerë. I pari erdhi pas një topi të gjatë të Bardhit për Uzunin, me beratasin që gjuajti dhe topi pas një devijimi shkoi në këmbët e Xhixhës. I riu, që ka spikatur për shënimin e golave me moshat, nuk fali. Për golin e dytë nuk ke çfarë flet, pasi krosimin e Nikës portieri Selimaj e përplasi në kurrizin e Pjeshkës dhe e ktheu në asist për Xhixhën. Po të shikosh në video mënyrën se si janë shënuar të gjithë këto gola, kupton që ka një mungesë të theksuar të ndërtimit të manovrës sulmues në mënyrë të organizuar, duke u fokusuar kryesisht te ndonjë krosim, apo te shfrytëzimi i gabimeve të kundërshtarit.

TRENDI – Të mos humbësh është bërë parësore dhe duket se të gjithë trajnerët e kanë një presion të tillë. Shumica e ekipeve luajnë me mesfushorë qendrorë me tipare mbrojtëse, madje edhe Skënderbeu që shkëlqeu këtë javë në Kukës luante pa një “10”-ësh. Lilaj, Dita dhe Muzaka garantojnë kilometra të tëra vrapim dhe shumë ndërprerje aksionesh, por fantazia u mungon. Në fakt edhe lojtarët e tjerë të Skënderbeut nuk është se do bënin më shumë në këtë aspekt. Trajneri Daja kërkon të shfrytëzojë zënien keq të kundërshtarëve dhe shfrytëzimin e hapësirave dhe aftësinë goditëse të këtyre lojtarëve. Shpesh organizatorin e ka bërë Xhejms. Kukësi ka Zeqirin, por vetëm në pjesën e dytë u fut, duke mos bërë gjë. Nuk është më ai përparmi, ndërkohë edhe Bakaj është kthyer në një sulmues. Në Vlorë është fiksuar treshja Useini-Sidibe-Pollozhani, ndërsa te Partizani edhe Bardhi që mund të bëjë diçka në këtë aspekt, e kanë zhvendosur në sulm. Lushnja ka një lojtar si Gava, i aftë në hapjen e topave, si dhe me një goditje të mirë. Gjithashtu po ingranohet edhe Papa, lojtar jo me cilësi shumë të mëdha organizative, por me driblimet në vend shpesh krijon hapësira dhe shtyn skuadrën para, por kjo është disi e vështirë, duke ditur se përgjithësisht ky ekip luan i tërhequr dhe kundërsulmi është “shpëtimi”. Kamzës i është dëmtuar Mustafa, që ishte afruar për të organizuar manovrën sulmuese të skuadrës së Ndreut, që i beson edhe Mehmetit e Mumajesit. Vllaznia është ndryshe në këtë aspekt, pasi ka në ekip Vucajn, Hasanin dhe Likën. Në Laç bënë një lojë të mirë dhe disa herë me topat pas shpine organizuan aksione të rrezikshme, por nuk kishte finalizim. Gjithashtu edhe Gilman Lika vertikalizoi bukur në një moment në pjesën e parë, duke u dhënë një mundësi të mirë kuqebluve. Laçi përgjithësisht ka pasur lider në mesfushë, teksa Vucaj për disa vite udhëhiqte në atë repart, ndërsa më pas sollën Cetkoviç. Tanimë në ekip është braziliani Eskerda, lojtar me cilësi, i cili ende nuk është në maksimumin e tij. Gjithashtu janë edhe disa të rinj si Kallaku, Lushkja e Smaçi, ata që tentojnë të bëhen “motori” organizues i Laçit në momentin që futen në fushën e blertë. Në Durrës fantazinë ia kanë besuar Lenës dhe Dostit, por deri më tani nuk është se kemi parë ndonjë mrekulli, ndërsa në Gjirokastër treshja e qendrës së mesfushës ka misionin e qartë për të ndaluar kundërshtarët. Brahimaj-Ramadani-Aleksi është treshja e “fiksuar” për momentin, me Rrocën që ndryshon pak nga shokët e skuadrës së tij, por që një dëmtim e ka privuar atë në pjesën më të madhe të ndeshjeve të deritanishme.

 TIFOZËT – Nuk është vetëm një problem i futbollit tonë, është i përgjithshëm në rajon, ku vihet re një numër i vogël njerëzish që frekuentojnë stadiumet. Arsyet janë të ndryshme, duke nisur nga lëvizjet e ndryshme të popullsisë, nga rrethet drejt kryeqytetit, apo edhe jashtë vendit. Ana financiare ndikon gjithashtu, por edhe besimi që njerëzit kanë te kampionati. Shpesh ka fjalë shumë, por në një shoqëri ku është shumë e lehtë të ngresh dyshime dhe t’i besosh ato, atëherë kjo krijon shumë probleme. Në Kukës shumëpak e ka menduar që do vinte dita të luftohej për titullin, ndërkohë që ndaj Skënderbeut mund të ishin në stadium rreth 2 mijë tifozë. Në Laç ishin sa çereku, në  Vlorë gjithashtu interesi është i ulët dhe vetëm në ndonjë ndeshje me Skënderbeun interesi rritet për shkak të rivalitetit të viteve të fundit. Edhe Partizani tashmë nuk e ka mbështetjen e mëparshme, ndërkohë që në këto javë është hasur një interesim i ulët edhe në Kamzë. Me pak fjalë, numri i tifozëve në stadiume sa vjen e ulet…

Analiza e javës së 4: Skënderbeu ka bërë super merkato, pres më shumë nga Flamurtari dhe Teuta. Partizani? Të rigjejë klimën 

Gjergji Stefa

Luan Pinari është një nga ata që si futbollist ka luajtur në të tria skuadrat e kryeqytetit: me Tiranë, Dinamon dhe Partizanin. Aktualisht punon si trajner në Shkollën e Mjeshtërisë Sportive “Loro Boriçi” dhe drejton Shkëndijën e Tiranës. 39-vjeçari ka dhënë një intervistë për “Sport Ekspres” dhe analizon javën e katërt të kampionatit, duke nisur me përballjen Kukësi-Skënderbeu e për të vijuar me të tjerat me radhë.

Luan, jeni dakord me opinionin se fitorja e Skënderbeut në Kukës mund ta ketë vrarë kampionatin?

Shpresoj që jo. Dua ende te besoj se Kukësi i ka mundësitë të krijojë konkurrencë. Nuk shoh skuadër tjetër që mund të rivalizojë Skënderbeun.

Pse besoni te Kukësi?

Ka potencial në sulm. Bakaj dhe Guri janë sulmues shumë të mirë. Do isha kurioz t’i shihja bashkë në vijën e parë. Ndoshta Kale, Alijev Bakaj dhe Guri janë shumë kur luan kundër Skënderbeut. Klubi funksionon. Ndoshta e penalizon disi terreni.

E prisnit fitoren e Skënderbeut?

Jo pa u sforcuar si ndodhi. Meritojnë notën 10 në merkato. Kanë 20 lojtarë cilësorë dhe kanë afruar lojtarë që e njohin mirë kampionatin.

Po tjetër kush ju bind për titull?

Partizani as nuk duhet ta mendojë në këtë moment. Duhet te rigjejë klimën e duhur që të vijë te rezultatet. Mos të ketë objektiva për

momentin.

Trajneri është vënë me shpatulla pas murit?

Kam rezervat e mia për atë, por nuk është fajtori i vetëm. Drejtuesit dhe lojtarët janë gjithashtu fajtorë. Merkato ka qenë e gabuar, ndërkohë që nuk ka fare dëshirë për të treguar se janë në gjendje të bëjnë diçka.

Po ideja qe lojtarët po sabotojnë stafin?

Nuk e besoj. Çdo lojtar do që të fitohet ndeshja. Është një projekt i ndërtuar gabim. Duhet te qetësohen dhe të flasin në sy me njëri-tjetrin.

Teuta barazoi në Kamzë, Flamurtari brenda me Luftëtarin?

Flamurtari dhe Teuta duhet të rriten dhe më shumë. Sapo janë krijuar si ekipe. Kam respekt për punën e dy trajnerëve, por nuk bëhen gjërat

me të rënë të lapsit. Për kampion as nuk duhet ta mendojnë për

momentin. Nëse shkojnë në Europë do jetë sukses. Kam dëshirë t’i shoh të dyja ekipet 3 vite pa ndryshuar, sikurse ndodhi me Skënderbeun.

Si e vlerësoni luftën për mbijetesë?

Nëse Lushnja do ishte pak më e fortë, do ishte më ndryshe. Megjithatë Lushnja deri tani ka qenë serioze dhe duhet komplimentuar. Nëse vitin e shkuar u nda kampionatin në mes, këtë vit do jenë Skënderbeu dhe Kukësi për kampion, Lushnja për të mos rënë, ndërsa te tjerat duhet të kenë kujdes sepse mendojnë Europën, por mund të rrezikojnë mbijetesën.

Teknikisht çfarë të bëri përshtypje këtë javë?

Asnjë ide në lojën e Partizanit. Asnjë. As skema e as vertikalizime. Pjesa e dytë e Kamzës dhe mënyra si kërkoi barazimin me Teutën ishte për t’u vlerësuar. Mesfusha e Luftëtarit më pëlqeu dhe patjetër në tërësi loja e Skënderbeut. Muzaka është lojtar kyç në atë skuadër. Laçi tregoi që aty ka qenë dhe ndoshta Nica e kish bërë dramë situatën më shumë se sa duhet, ndërsa për Vllazninë ende nuk po krijoj një opinion fiks, por kuptohet që po vuan për golin.

Kampionati pa Tiranën?

Do jetë më e bukur Superiorja vitin tjetër sepse do kthehet Tirana. Pres me padurim ta shoh Tiranën në Kupë në ç’raport është me ekipet e Superiores, sepse në Superkupë tregoi që mund të ishte konkurruese në këtë kampionat. Partizani në mungese të Tiranës është skuadra me emrin më të madh në kampionat, por nuk po e respekton fanellën dhe pritshmërinë.

Kritika dhe vetëm kritika nga trajneri Ze Maria. Trajneri brazilian nuk mbetet kurrë i kënaqur. Edhe pas fitores që skuadra e tij arriti me Ilirinë, sërish ai ka mbajtur ekipin për një kohë të gjatë në dhomat e zhveshjes. Si e hënë që ishte, trajneri zhvilloi analizën e pasndeshjes, meqë të dielën ishte pushim për ekipin. Dhe takimi i djeshëm nuk ka qenë dosido. 40 minuta analizë ka zhvilluar Ze Maria në dhomat e zhveshjes së “Skënder Halilit”, aq sa stërvitja ka nisur në orën 16:30 edhe pse ishte paralajmëruar që përgatitjet nisin në orën 16:00, duke bërë për ujë të ftohtë skuadrën.

Kritikat – Kritikat edhe këtë pasndeshje kanë qenë të mëdha për ekipin. Trajneri dhe stafi kanë mbetur jo të kënaqur nga loja e skuadrës dhe individët në veçanti. Mësohet se Ze Maria është shprehur se nuk do të tolerojë më një gjendje të atillë, siç u pa në “Selman Stërmasi” ditën e shtunë. Loja sipas tij ka qenë përtokë, por kjo nuk duhet të ndodhë më, pasi rrezikohet rezultati sidomos në ndeshjet në transfertë.

Krahët nuk funksionuan – Një pjesë të kritikave të tij Ze Maria ia ka adresuar lojtarëve të krahëve. Sipas tij, këta futbollistë nuk e kanë bërë mirë punën e tyre. Ata duhet të jepnin sa më shumë topa në qendër për sulmuesit që këta të fundit të kishin sa më shumë raste për gol. Sipas Ze Marias lojtarët duhet të jenë më ofensivë dhe të jenë pjesë e manovrës sulmuese. Kritika ka pasur edhe për qarkullimin e topit, që në këtë ndeshje çaloi. Po kështu gjendja e skuadrës nuk është nga më të mirat përsa i përket anës fizike.

Kritikat pas Besës – Ze Maria e tha hapur pas ndeshjes me Besën se loja nuk i ka pëlqyer, ndërkohë që këtë gjë ua ka bërë të ditur edhe futbollistëve të tij na analizën e zhvilluar të enjten e kaluar. Pas ndeshjes me Besën braziliani tha mes të tjerash: “Kemi luajtur si në një ndeshje miqësore. Fituam e ky është një hap që vlen. Por nuk jam i kënaqur me paraqitjen e skuadrës. Tirana e vërtetë që unë dua ishte ajo e finales së Superkupës”. Me kavajasit Tirana fitoi me rezultatin 1-2 dhe autor i të dy golave ishte kapiteni Karabeci, që golin e barazimit e realizoi me penallti. Praktikisht Ze Maria nuk mbetet asnjëherë i kënaqur, edhe pse skuadra e tij e ka nisur mbarë në të tri frontet.

3 fitore ka arritur Tirana në sezonin zyrtar nga 9 shtatori deri më sot

15:00 është orari kur do të luhet ndeshja mes Pogradecit dhe Tiranës. Takimi është caktuar të zhvillohet ditën e diel

Karabeci tre ditë pushim

Erando Karabeci ishte i vetmi nga futbollistët e Tiranës, i cili nuk zhvilloi dje stërvitje me skuadrën. Shkaku është i thjeshtë. Futbollisti ka bajamet e zmadhuara dhe do të qëndrojë disa ditë pushim. Sipas asaj që është mësuar, futbollisti ka nisur kurën me antibiotikë dhe në këto kushte ai s’mund të stërvitet. Atij i duhet të qëndrojë edhe dy ditë të tjera pushim, për t’u kthyer me të gjitha gjasat në stërvitje të mërkurën. Karabeci është nga të vetmit lojtarë që këtë sezon që sapo ka startuar ka luajtur të tria ndeshjet. Madje për momentin Karabeci me dy golat në Kupë është golashënuesi i bardhebluve. Erando si kapiten i ekipit është një nga lojtarët më të mirë të skuadrës. Edhe pse pati oferta nga çdo skuadër e Superiores, futbollisti vendosi që të qëndrojë te Tirana ku ka nëntë vite që vesh këtë fanellë.

Trajneri u nxjerr shkumën lojtarëve

Ka qenë një e hënë “e egër” stërvitore për Tiranën. Pas fitores jo bindëse të ditës së shtunë, trajneri Ze Maria për gati dy orë është stërvitur në “Skënder Halili”. Dhe stërvitja e djeshme ka qenë nga ato që të “bie në kokë”. Për rreth 40 minuta, lojtarët kanë zhvilluar stërvitje të rëndë me vrapime të forta. Grupit nuk i kanë rezistuar Greca që ka mbetur pak mbrapa dhe portieri Abibi. Pjesa tjetër e skuadrës është munduar të bëjë maksimumin në stërvitje, sepse në të kundërt e sheh veten jashtë 11-shes. Ze Maria nuk ka kursyer askënd. Madje as veten dhe të birin që e ftonte të stërvitej me ekipin e parë, ndonëse djali i vogël i tij nuk ia ka dalë dot të jetë me ritmin e më të mëdhenjve. Më pas trajneri ka vendosur që të ndajë ekipin në disa grupe për të punuar në kuadrat. Në fund si zakonisht luhet edhe ndeshja brenda grupit, por për të folur për formacionin është shumë shpejt, sepse e djeshmja ishte vetëm stërvitja e parë e javës.

Mauexhe që tani lider në mesin e fushës

Tirana gjen zëvendësuesin e Ruben Akuasë. Problem mbetet goli i sulmuesit

Toni Mauexhe po konfirmohet dita-ditës te Tirana si i huaji më i mirë i ardhur këtë verë. Futbollisti nga Uganda ka zëvendësuar plotësisht Ruben Akuanë. Me paraqitjen e tij, mesfushori ka treguar vlera në fushën e lojës, duke qenë titullar në tri ndeshjet zyrtare. Po kështu ugandezi është autori i golit të vetëm në takimin me Ilirinë. Shkurt, mesfushori është ngjitur në katedër dhe drejton mesfushën e Tiranës së bashku me Dajën e Karabecin. Është lider para mbrojtjes, madje lojtar më cilësor se Akuaja, sidomos në manovrën sulmuese.

Problemi te Tirana mbeten sulmuesit. Në tre ndeshje zyrtare, por edhe ato miqësore sulmuesit akoma nuk kanë shënuar gola që mund t’u vlejnë skuadrës. Ngo, Halili, Sentamu, Levendi ende nuk kanë tundur rrjetat e skuadrave kundërshtare, por kjo shpresohet të ndodhë në ndeshjet në vazhdim të kampionatit dhe Kupës