Amiri presion Gjermanisë: Durimi im e ka një fund

Sport Ekspres — Mon, 01 Jul 2019 15:03:17 +0000

Gjermania është një ndër shtetet që e ka mbështetur më së shumti multikulturalizmin. Kombëtarja gjermane është një shembull konkret. Futbollistë me origjinë, polake, shqiptare, sllave, afrikane dhe turke kanë luajtur së bashku me fanellën e katër herë kampionëve të botës.

Një ndër talentet më premtues të futbollit gjerman është i riu me origjinë afgane Nadiem Amiri. Mesfushori me tipare sulmuesi ishte ndër lojtarët më të mirë në Europiani U21 ku Gjermania u rendit e dyta.

Në një intervistë për “Bild”, 22-vjeçari tha se vendi i origjinës e kërkon prej pesë vitesh, por ai është i gatshëm të tregohet i durueshëm për ftesën nga kombëtarja gjermane.

“Dua të luaj për Gjermaninë, kjo është e vetmja gjë që më intereson. Federata e Afganistanit më ka kërkuar që në moshën 17-vjeçare. Megjithatë, durimi im e ka një fund. Nëse vjen një moment, ku për shembull s’kam luajtur ende për Gjermaninë në moshën 28-vjeçare, atëherë është e qartë që s’do kem më shanse për të luajtur me Gjermaninë. Në këtë rast mund të pranoj që të luaj për Afganistanin”, tha Amiri.

VIDEO | Eureka, gjendet “imituesi” i talentuar i Paulo Dibala

Sport Ekspres — Thu, 15 Nov 2018 18:17:56 +0000

E mbani mend djaloshin e vogël me bluzën e Dibala, i cili godiste topin në mënyrë fantastike, duke e futur atë lehtësisht në një dritare të vogël dhe të ngushtë për të festuar pastaj njësoj si idhulli i tij? Argjentinasi i Juventusit shpërndau videon e tij dhe kërkoi ndihmë: “Më ndihmoni dot ta gjej kush është?”, shkruante Dibala në rrjet sociale.

Një gjë e tillë ka ndodhur dhe djaloshi i talentuar është gjetur. Ai quhet Amir, është 10 vjeç dhe është nga Irani. Amir është një fans i zjarrtë i Paulo Dibala, por lojtari nuk ka arritur akoma të komunikojë me “imituesin” e vogël.

“Gazzetta dello Sport”, në bashkëpunim me Shoqatën e miqësisë “Itali-Iran”, ka arritur të komunikojë me Amirin dhe familjen e tij. Ata jetojnë në Dehdasht, një qytet më afër Kuvajtit dhe Irakut, sesa Teheranit, kryeqytetit iranian.

10-vjeçari ndjek shumë ndeshje të Serisë A, luan futboll në një skuadër të vogël dhe është i lidhur shumë me Italinë. Djaloshi ka vuajtur dhe ka qarë përpara një viti, kur Suedia bëri gjëmën duke lënë të kaltrit jashtë Kupës së Botës.

Tashmë mbetet që Dibala të krijojë kontakt me Amirin e vogël dhe, ku i dihet, një ditë mund të vijë ftesa për t’u takuar së bashku, ose për të shijuar Dibala live në stadium. Një ëndërr për Amirin e vogël dhe të talentuar nga Irani.