Amir Bilali

Edhe Amir Bilali në Izrael, e mërkura vendimtare

Sport Ekspres — Sun, 07 Jul 2019 20:13:34 +0000

Amir Bilali, mbrojtësi qendror që e mbylli sezonin te Shkupi në Maqedoni, po tenton të luajë në Izrael dhe bëhet fjalë për një klub të madh si Hapoel Tel Aviv. Aktualisht 25-vjeçari ndodhet në Izrael dhe ka rënë dakord për kushtet e kontratës.

Gjithsesi fillimisht duhet të bindë stafin teknik para se të nënshkruar. Të mërkurën ata kanë planifikuar një miqësore kundër Hapoel Umm el-Fahm, klub që do të garojë në ligën e dytë sezonin e ardhshëm.

Bilali, në Maqedoni është aktivizuar edhe me Rabotniçkin, ndërkohë që ka provuar të luajë edhe në Superiore me Teutën dhe Bylisin. Lojtari polivalent ka qenë pjesë e moshave të Lacios dhe më pas provoi edhe një eksperiencë me Çeljen në Slloveni.

Amir Bilali i lirë, Shkupi merr “ish”-in e Partizanit

Sport Ekspres — Mon, 10 Jun 2019 16:59:52 +0000

Partizani e zyrtarizoi në janar, ndërkohë që ende pa u mbyllur merkato dimërore iku. Ata që janë tifozë të “demave” të kuq duhet ta mbajnë mend Fatjon Jusufin, të cilin skuadra kryeqytetase e afroi nga skuadra e Renovës. Ish-trajneri Skënder Gega ia bëri të qartë: hapësirat do të jenë të pakta.

Në këto kushte Jusufi zgjodhi të ndërpriste kontratën dhe u transferua në Armeni, ku u aktivizua me Shirak. Dy ndeshje dhe një gol, ndërkohë që një dëmtim e penalizoi. Pak muaj në Armeni dhe tashmë do të luajë sërish në Maqedoninë e Veriut, pasi ka firmosur një kontratë 1-vjeçare me opsion rinovimi edhe për një sezon tjetër.

“Është kënaqësi dhe nder të vesh fanellën e një klubi historik dhe të madh si Shkupi. Mendova të vazhdoj karrierën te Shkupi sepse më përshtatet filozofia e tyre dhe më pëlqen projekti që kanë. Shpresoj që të përsërisim së bashku sukseset e viteve të fundit edhe në vijim me Shkupin dhe sukseset të mos kenë të ndalur”, ka deklaruar Jusufi për faqen zyrtare të klubit.

BILALI – Ndërkohë te Shkupi janë njoftuar disa largime, mes tyre edhe mbrojtësi Amir Bilali. Ish-lojtari i Bylisit dhe Teutës është i lirë dhe dëshira e tij është të rikthehet në Superiore. “Amir Bilali është futbollisti me të cilin është ndërprerë kontrata, ndërsa bashkëpunimi nuk ka vazhduar pasi që edhe u kishin kaluar kontratat futbollistëve në vijim: Viktor Angelov, Armel Bradji, Maharafa Tandina dhe Ergyn Abdul”, njofton mes të tjerash klubi i Shkupit.

Elvin Beqiri në stafin e Vllaznisë

Sport Ekspres — Fri, 24 Aug 2018 07:11:56 +0000

Vllaznia është në kërkim të një qendërmbrojtësi. Braziliani Xheferson Santana nuk bindi trajnerin Hasan Lika dhe u largua, ndaj klubi kuqeblu pret lojtarë të tjerë.

Ndërkohë, në Shkodër tashmë është zgjidhur çështja e zëvendëstrajnerit. Do të jetë Elvin Beqiri krahu i djathtë i Hasan Likës. Ish-kapiteni është pjesë e stafit të Shqipërisë U17, që drejtohet nga Xhemal Mustedanagiç.

Për Beqirin karriera e trajnerit ka nisur me kohë, por ende jo në nivele të larta, sepse ka punuar me moshat e Vllaznisë, duke preferuar të fitojë eksperiencë pa u nxituar.