Bojkot tek Egnatia, Dimo: Vetëm na mashtrojnë, s’jemi paguar!

Sport Ekspres — Thu, 04 Apr 2019 08:49:49 +0000

Futbollistët e Egnatias kanë ditë që nuk dalin në stërvitje. Arsyeja lidhet me pagat dhe gjithë këtë situatë të krijuar, futbollisti Amarildo Dimo e quan një mashtrim të hapur që bëhet ndaj tyre. Për SportEkspres.com, fieraku deklaroi se as në ndeshjen e radhës nuk do të shkojnë nëse nuk marrin pagat e prapambetura.

“Të gjithë futbollistët e Egnatias kanë tre muaj pa u paguar, por kjo situatë ka pesë muaj që ka nisur vetëm me mashtrime. Nuk i kuptojmë se si mundet që të bëjnë futboll këta drejtues që gënjejnë javë pas jave, ndërsa ne na detyrojnë që të ‘ngopemi’ me mashtrimet e tyre.

Ne kemi bojkotuar stërvitjen dhe po presim që të na paguajnë. Nëse vonohen deri në ndeshjen e radhës, ne nuk do shkojmë në Lushnjë”, theksoi Dimo. Në ndeshjen me Besën, rrogozhinasit po fitonin 0-2 në pjesë të parë dhe më pas ndeshja u përmbys në 3-2. U tha se lojtarët nuk u angazhuan pikërisht prej pagave, por sërish nuk pati asnjë reflektim dhe futbollistët presin ende të paguhen.

AGRON KAJA

37 vjeçari i Egnatias sfidon rivalët, Dimo: Jemi ne për Superiore!

Sport Ekspres — Tue, 11 Dec 2018 14:41:39 +0000

Në fazën e parë të Kategorisë së Parë, skuadra e Egnatias në Grupin B ka qenë në vendet e kreut të renditjes, ndërkohë ka disa javë që renditet në vendin e 5-të. Me 6 fitore, 1 barazim dhe 5 humbje, skuadra e Rrogozhinës mbetet në pesë të parat që luftojnë ngjitjen në Kategorinë Superiore.

Dhe sipas fierakut 37 vjeçar Amarildo Dimo, synimet nuk janë mbyllur për tu ngjitur në Kategorisë Superiore. “Në këto 12 javë ne kemi patur probleme vetëm në ndeshjet në transfertë ku skuadra nuk ka patur shumë qëndrueshmëri, ndërsa në fushën tonë kemi patur më shumë ekuilibër në rezultate”.

Për SportEkspres.com, Dimo deklaron se objektivin për Superioren e mbështet në përbërjen e skuadrës, por edhe në mbështetjen që ajo ka nga drejtuesit e trajneri Duro. “Në Grupin B janë tre-katër skuadra që synojnë ngjitjen në Superiore, dhe Egnatia është njera prej tyre. Kemi përbërje me futbollistë cilësorë dhe në gjysmën tjetër të sezonit do të jemi një skuadër më konkurruese me rivalët”.

Në karrierën e tij Amarildo Dimo ka luajtur në 6 skuadra: Luftëtari, Cakrani, Bylis, Norga, Skënderbeu, Apolonia dhe sot Egnatia, ku edhe pse 37 vjeç mbetet lojtari numër një në skuadër.