Gjithçka nisi rrugicave: “Është vërtetë, nisa të luaj futboll në rrugë. Kjo nuk i pëlqente babait tim, i cili më thoshte se duhet të mësoj në shkollë. Por unë mendoja vetëm për futbollin. Në Shqipëri është ngrohtë dhe ne luanim përjashta. Në moshën 11-vjeçare u bashkova me një klub”, tregon Lala, i cili me trupin e tij ka bërë që shumëkush të dyshojë mbi mundësinë që ai mund të bëhej një futbollist profesionist.

“Shpesh isha i nënvlerësuar për shkak se isha i shkurtër. Më pas erdhi një moment që i binda njerëzit me aftësitë e mia”, tregon ish-mesfushori, i cili në Gjermani mbërriti për të luajtur një ndeshje me Shqipërinë U16. Shumë lojtarë nuk u kthyen pas. “Ishte koha e ndryshimeve politike, por futbollistët shqiptarë nuk lejoheshin të largoheshin jashtë. Disa prej tyre përdorën ndeshjen në Ofenbah për të qëndruar në Gjermani”, shprehet Lala.

Karriera e tij nisi shkallë-shkallë dhe ai tregon se si ishte bërë tifozë me Hanoverin, klub ku sigurisht nuk ishte dëgjuar më parë për vendin tonë. “Është e vërtetë, atje mund të mos kishin dëgjuar për Shqipërinë. Ndoshta ju do të qeshni: në fillimet e mia në Gjermani, Hanover ’96 ishte një nga skuadrat e para që pashë në TV. Ishte viti 1992. Ishte finalja e Kupës kundër Gladbah, me një Jorg Sievers i tmerrshëm në portë, i cili dëshpëroi kundërshtarin pas gjuajtjes së penalltive”.

Ngjitja në Bundesligë në vitin 2002 ishte një moment i artë: “Ai ishte ndoshta viti im më i mirë në Hanover. Ralf Rangnik ishte trajneri ynë, luanim me katër lojtarë në mbrojtje dhe për kohën ishte diçka relativisht e re. Na u desh pak kohë të kuptonim sistemin, por më pas bëmë super ndeshje. Nuk ishte kurrë në mendjen time të luaja në një rol specifik. Isha luftëtar, kaq. Jepja maksimumin në fushë, ai ishte stili im, nuk luaja dot ndryshe. Kjo u pëlqente njerëzve? Po, madje mendoj se është bukur të shëtisësh në Hanover dhe të kuptosh që njerëzit të mbajnë mend”.

Lala nuk ndryshoi më ekip dhe ka një arsye: “Një kohë e gjatë aty, por gjithmonë jam ndjerë rehat. Më pëlqen të udhëtoj, por gjithashtu të kem një shtëpi. Kjo është arsyeja pse refuzova ofertat dhe qëndrova në Hanover. Shiriti i kapitenit? Ishte një nder i madh, sigurisht. Në fillim kisha rezerva, pasi kisha shumë respekt për atë detyrë. Pastaj fola me disa miq, të cilët më këshilluan ta pranoja. Besoj se kam mbetur i njëjti dhe kjo më ndihmoi”.

Në fund, i pyetur nëse e kishte ëndërruar që nj ditë do luante për Shqipërinë, Lala tregohet i sinqertë: “Kur isha fëmijë nuk e kisha menduar që një ditë do luaja për kombëtaren. Kam jetuar në Tiranë mes dy stadiumeve dhe kam parë shumë ndeshje futbolli, gjithashtu edhe të kombëtares. Kur isha në stadium si futbollist i kombëtares dhe pashë vendet prej nga vija, ishte një ndjesi e pabesueshme”.

“Ka lojtarë në Kosovë që ne po i mbikëqyrim, akoma nuk mund të zbuloj emra. Dëshira dhe qëllimi është të nxjerrim sa më shumë lojtarë shqiptarë, që të luajnë në Bundesligë. Shpeshherë ndjek në SuperSport ndeshjet e kampionatit të Kosovës dhe të Shqipërisë. Marrim informacione për lojtarët që kanë talentin, vullnetin dhe dëshirën për t’u afirmuar. Impenjimi kryesor imi është me menaxhimin e lojtarëve të talentuar nga Shqipëria dhe Kosova, por edhe nga Gjermania”, u shpreh mes të tjerash Lala në intervistën e dhënë për Supersport Kosova.

Më pas ai flet edhe për Rashicën, i cili po shkëlqen në Bundesligë: “Miloti është duke bërë jashtëzakonisht mirë sidomos nga janari. Është në rrugën e duhur dhe për mendimin tim në një përqindje të madhe do të bëhet edhe më i mirë. Ai po kënaq tifozët e Verderit, por edhe shqiptarët që jetojnë në Gjermani, Kosovë apo Shqipëri, ku janë krenarë për të”.

“Transferimi i Rashicës? Futbolli është bërë shumë i shpejtë, Miloti ka tërhequr vëmendjen e klubeve të mëdha në Europë. Ai duhet të përmirësohet në disa aspekte për të arritur nivelin më të lartë. A mund të ketë lëvizje? Nuk mund ta them 100%, futbolli është i paparashikueshëm, por edhe në Bremen ai ndihet shumë mirë dhe do të ishte mirë që të luante edhe një sezon. Klubet shohin shumë potencial te Miloti dhe shpresojmë që një ditë të arrijë majat”, shtoi Lala.

Në vazhdim ai flet edhe për përfaqësuesen e Kosovës dhe ndryshimin me Shqipërinë: “Për kaq pak vite, që nga njohja në UEFA dhe FIFA, Kosova është rritur shumë. Ka elementë shumë të mirë, por natyrisht nuk duhet të presim gjera të mëdha sot për nesër. Deri tani kanë bërë shumë shumë mirë dhe mua më bëhet qejfi që për një kohë të shkurtër ka patur këtë përparim”.

“Shqipëria dhe Kosova janë aty-aty në nivel, por Kosova ka shumë talente edhe është në zhvillim e sipër. Te Shqipëria lojtarët janë në moshë disi më të madhe, kanë më shumë eksperiencë, por Kosova ka shumë talente dhe premisa që të bëjë dhe më mirë në të ardhmen. Kjo është, le të themi, diferenca mes Shqipërisë dhe Kosovës, megjithëse unë do të doja që të kishim vetëm një kombëtare”, përfundoi ish-lojtari i kombëtares.

22-vjeçari zhvilloi një ndeshje të madhe në mesjavë kundër Bajernit të Mynihut në gjysmëfinalen e Kupës së Gjermanisë. Ai dhuroi asistin e golit të parë, barazoi rezultatin me anë të një goli fantastik, por një penallti e “falur” kaloi gjigantin bavarez në finalen e madhe.

Rashica është zbuluar dhe ndihmuar shumë nga Altin Lala. Ish-mesfushori i njohur i kombëtares kuqezi është agjenti i tij. Lala ka qenë ditën e djeshme në kryeqytetin dardan për të ndjekur sfidën Prishtina-Drenica.

Sipas “Gazetës Express”, agjenti ka përfituar për të parë ndonjë talent tjetër. Asnjë emër në sfond, por mirditori ka vështruar nga afër fitoren e Prishtinës, që triumfoi falë golave të Armend Thaçit dhe Mario Morinës në pjesën e parë, ndërsa Osman Meziu shkurtoi rezultatin për miqtë në pjesën e dytë.

Bëhet fjalë për Milot Rashicën. Futbollisti nga Vushtrria është kthyer në një ndër lojtarët më të përfolur të Bundesligës. 2019-ta ka qenë një vit fenomenal për 22-vjeçarin, i cili ka shënuar 10 gola në 13 takime për skuadrën e Verder Bremen.

Një ecuri e tillë s’ka nevojë për shumë koment. Është e natyrshme që për lojtarin të ketë interes të lartë, por vetë Altin Lala ka thyer heshtjen duke dhënë një prononcim për medien e njohur gjermane “Kicker”, ku sqaroi se lojtari i tij do t’i mbetet besnik skuadrës nga veriu i Gjermanisë, për të paktën edhe një sezon.

“Verder Bremen është klubi i duhur për zhvillimin e mëtejshëm të Milotit edhe për sezonin që vjen. Stafi i trajnerëve i kanë dhënë atij shumë besim dhe durim. Ai sapo ka kuptuar se çfarë kualiteti zotëron. Mund të presim akoma më shumë nga ai te Verderi”, tha Lala.