Erzeni me ambicie të mëdha, drejtori teknik zbulon objektivat e merkatos

Sport Ekspres — Mon, 03 Jun 2019 11:50:45 +0000

Pas mbylljes së sezonit 2018-2019, drejtuesit e skuadrës së Erzenit u kanë dhënë pushime futbollistëve deri në fundin e muajit qershor, ndërkohë që gjatë kësaj periudhe janë treguar aktivë në merkato. Pas rinovimit me Ermal Vathin e nënshkrimit me nigerianin Odakvo, në fokusin e Erzenit janë vënë edhe tre afrikanë të tjerë që priten në Shijak në fundin e muajit qershor. Kamerunasi Xhixhua, i cili është pjesë e Bylisit, mbetet alternativa e momentit.

Për Sportekspres.com, drejtori teknik i Erzenit, Altin Keçi, deklaron se përforcimi me lojtarë të huaj do bëhet vetëm me individë cilësorë. “Jo vetëm lojtarë afrikanë, por Erzeni këtë merkato e ka nisur edhe me futbollistë shqiptarë të njohur në Kategorinë e Parë dhe në Superiore. Ne jemi në bisedë me një futbollist tjetër të Besës që ka luajtur më parë me Erzenin dhe besoj se këtë javë edhe mund ta mbyllim marrëveshjen”.

Por Keçi tregon edhe një tjetër mundësi në këtë merkato: “Në fundin e muajit qershor, tek Erzeni vijnë tre lojtarë afrikanë. Unë i kam bërë gati dokumentat e tyre, dy prej të cilëve janë gati brenda 10 ditëve, ndërkohë që njeri prej tyre është duke i mbyllur ato. Këta i mendojmë përforcime cilësore, pasi CV-ja e tyre tregon se i shërbejnë synimeve tona për sezonin e ri”.

AGRON KAJA

Keçi: Erzeni ekip Superioreje, me Dinamon për tri pikët

Sport Ekspres — Wed, 03 Apr 2019 09:51:15 +0000

Vllaznia kryeson bindshëm grupin A të Kategorisë së Parë, por në Shijak ëndërrojnë sërish. Ua lejon vetëm matematika, pasi praktikisht shkodranët janë me një këmbë në Superiore. Sekretari i FK Erzeni, Altin Keçi, për SportEkspres.com deklaron:

“Ne e vazhdojmë garën me seriozitet, edhe pse nga Vllaznia e vendit të parë jemi 14 pikë larg. Matematika na mban në lojë dhe në çdo ndeshje Erzeni do të luftojë të marrë maksimumin. Nuk do jemi pjesë e aleancave që mund të shfaqen në këtë situatë të kampionatit. Ky Erzen është skuadër për Superiore”.

Për ndeshjen e javës së 22-të me Dinamon, Keçi deklaron se shkojnë vetëm për të marrë tri pikët: “Natyrisht që Dinamo është skuadër e fortë dhe e denjë në Kategorinë e Parë, por ne përfaqësojmë Erzenin dhe do shkojmë në këtë përballje vetëm për të marrë tri pikët. Skuadra shkon me besimin se i ka të gjitha mundësitë për t’ia dalë me sukses”.

AGRON KAJA