MARRËVESHJA ME FLAMURTARIN – “Përshëndetje nga Kina. Dua të falënderoj Flamurtarin për këtë eksperiencë 6-mujore, që më dha mundësinë të bëhem pjesë e ekipit. Marrëveshja u prish shumë thjeshtë, me marrëveshje “gentleman” mes meje dhe Idrizit. Gjej mundësinë ta falënderoj presidentin, i cili respektoi vendimin tim për të vazhduar karrierën jashtë shtetit”.

OFERTA KINEZE – “Ishte një ofertë që nuk mund ta refuzoja, pasi tregu aziatik është një treg shumë i madh dhe të hap shumë dyer. Duke parë dhe interesimin e klubit, duke më pritur plot tri javë për t’iu bashkuar, më bindën që të firmos”.

AVENTURA NË SHQIPËRI – “Kjo eksperiencë 3-vjeçare në Shqipëri më ka ndihmuar shumë. Që me Bylisin, ku ramë nga Kategoria, deri me Kukësin që u shpallëm kampionë. Edhe me Flamurtarin kam kaluar mirë. Shpresoj dhe besoj që do të shihemi prapë”,- u shpreh Alla.

Një goditje e madhe për vlonjatët, që vazhdojnë të jenë aktivë në merkato dhe ndoshta nuk do të ndalen me kaq. Sezoni i fundit, për mbrojtësin, nuk ka qenë aspak i mirë. Te Kukësi ka marrë shumë kritika, sidomos nga presidenti Safet Gjici…

Dhe, të mendosh, si për ironi të fatit, që një ndeshje jo e mirë mes Kukësit dhe Flamurtarit, do të bëhej edhe shkaku i lënies në stol të futbollistit, që më pas u kthye në të padëshiruar.

Mbrojtësi 25-vjeçar largohet kështu pas dy sezonesh te Kukësi, ku u shpall edhe kampion i Shqipërisë. Alla ka luajtur 51 ndeshje me verilindorët në Superligë, teksa ka edhe pesë paraqitje në kupat e Europës. Kukësi e mori nga Bylisi për një sezoni fantastik.

Në të shkuarën, Alla ka luajtur në Greqi me Ergotelisin, përpara se të vinte në Shqipëri.

Ka qenë menaxheri Franci Bode ai që ka kuruar këtë transferim, që fuqizon edhe më shumë skuadrën e Ilir Dajës, që pikërisht në prapavijë kishte shumë nevojë.

Te Kukësi Alla arriti dhe të binte në radarin e kombëtares, ku u aktivizua në një miqësore. E ardhmja e Allës pritet të jetë po në kategorinë superior, pasi përflitet se për qendërmbrojtësin është e interesuar skuadra e Flamurtarit, që ka nevojë të menjëhershme ndërhyrje në repartin e prapavijës.

Si cdo fillim ka e nje fund.Faleminderit drjetuesve dhe KF KUKESIT qe me dhane mundesin te jem pjese e historise se klubit .Nje histori qe e shkruaitem me sukses..faleminderit i gjithe stafit teknik qe kam punuar kto 2 vite nga secili mesova e mora me te mirat ..faleminderit stafit mjekesor qe ishin ne cdo moment aty si dhe puntoret e klubit ..respekte per tifozat, faleminderit per emocionet qe na dhuruat ..Dhe ne fund dua te falenderoje shoket e ekipit per ata qe jane dhe per ata qe jane larguar para meje .respekte A.A.6

A post shared by Albi Alla (@albi_alla_) on Aug 20, 2018 at 6:40am PDT

Ashtu siç “Sport Ekspres” ka raportuar dhe dje, të dyja palët duket se janë të interesuara që ta mbyllin këtu bashkëpunimin. Alla ka një rrogë relativisht të lartë dhe nëse do të qëndrojë dhe Kukësi mund ta ketë më të leverdishme ta kursejë një rrogë, pasi jemi në fillim të muajit. Në anën tjetër duket se dhe mbrojtësi do ketë më shumë mundësi për t’u akomoduar në një ekip të ri.

Për Allën ka pasur interesim edhe nga jashtë vendit në të shkuarën, por mbetet për t’u parë se çdo të ndodhë. Shanset e rinovimit mund të thuhet se janë zero, pasi penalltia dhe kartoni i kuq i marrë në ndeshjen e fundit mund të kenë vendosur shumëçka për të ardhmen e 25-vjeçarit.

Mbrojtësi pogradecar në të shkuarën është aktivizuar dhe me Bylisin në Shqipëri, ndërsa më herët ka luajtur vetëm në Greqi. Po ashtu Alla është grumbulluar në dy ndeshje me Kombëtaren e Shqipërisë dhe nga trajneri Xhani De Biazi.

Vetë Gjici deklaroi sot se drejtori Nexhipi është në bisedime me disa skuadra që janë të interesuara për shërbimet e lojtarëve të Kukësit. “RTSH Sport” përmendi dhe emrin e Allës si nga lojtarët që ka tërhequr vëmendjen. “Sport Ekspres” u interesua dhe burime të sigurta pranë klubit të Kukësit bëjnë me dije emrin e skuadrës e cila kërkon qendërmbrojtësin, i cili është aktivizuar edhe me përfaqësuesen e Shqipërisë.

Gazeta mëson se për 24-vjeçarin ka shfaqur interes skuadra belge e Zulte Varegem. Ekipi i Superligës belge, ku luan edhe ish-sulmuesi i Skënderbeut Piter Olajinka, është e interesuar për mbrojtësin e Kukësit dhe priten me shumë interes zhvillimet sa i përket një oferte që do të kënaqte presidentin Gjici. Për t’u përmendur fakti se në fund të sezonit Alla do të jetë një lojtar i lirë, nëse Kukësi nuk do të arrijë grupet e Europa League. Në të tilla kushte nuk është çudi që Kukësi të futet fuqishëm në tregun e shit-blerjeve.

Vladimir Prenga

Mbrojtësi Albi Alla është kthyer me Kukësin, pas shumë diskutimesh dhe përplasjesh me kampionët e Shqipërisë. 24-vjeçari provoi për pak kohë aventurën në Greqi dhe më pas u kthye përsëri te skuadra verilindore, por me dyfishim rroge. Alla tashmë i është bashkuar ekipit në fazën përgatitore në Ohër dhe po stërvitet me grupin duke marrë ngarkesën e plotë. 24-vjeçari pëlqehet nga trajneri Mladen Milinkoviç dhe rikthimi i tij ka qenë edhe një kërkesë e teknikut serb. Pogradecari ka dhënë një intervistë për “Sport Ekspres”, pas rikthimit të tij me skuadrën verilindore.   

– Alla vijim me Kukësin, apo mund të quhet rikthim?

– Për mendimin tim është vijim.

– Si e mendoni sezonin e ri?

– Shpresoj të kem shëndetin në radhë të parë. Dua ta nisim sezonin ashtu siç e mbaruam, me një titull.

– Po mendoni për Superkupën?

– Pikërisht, ajo është e para në kalendar.

– E parashikoni një sezon të vështirë duke parë edhe forcimin e kundërshtarëve?

– Mendoj se edhe ekipi ynë është forcuar kështu që do ia lëmë fushës së lojës. Shpresoj të jetë një sezon i fortë dhe i bukur.

– Do jeni në gjendje ta mbroni titullin kampion?

– Për këtë kam ardhur këtu. Dua të fitoj përsëri kampionatin me këtë skuadër. Mund të ia dalim.

– Të kishte munguar Kukësi?

– E vërteta është që më kishte munguar. Qytetin akoma se kam parë, por shokët e ekipit dhe klima e mirë që është në ekip më kishin munguar.

– Si ishte takimi me to, na shuaj ndonjë kuriozitet, çfarë biseduat?

– Takim i përzemërt. Folëm për gjithë këtë kohë që ishim larg. U puthëm, u përqafuam, takim normal mes shokësh (qesh).

– Shkojmë më tej në kohë, takimi i parë me Kamzën, ekip debutues, me fat apo jo me këtë short?

– Nuk shoh ndonjë fat te shorti i kampionatit, pasi do të luajmë me të gjitha ekipet.  Mendoj se ne duhet të ruajmë seriozitetin që kishim vjet dhe t’i marrim ndeshjet një nga një. Kampionati shqiptar po rritet vit pas vitit dhe nuk shoh ndonjë ekip që mund të fitojë çdo ndeshje pa vështirësi.

– E keni parë aventurën e Kukësit në Champions League?

– Po e pashë.

– Çfarë nuk shkoi në ato ndeshje?

– Nuk kishte diçka që nuk shkoi, për mua ishte çështje fati. Djemtë dhanë më të mirën e tyre, e kthyen rezultatin, por ndonjëherë nuk do as Zoti. Mendoj se duhet ta kalonin Sherifin e Tiraspolit.

– Mosmarrëveshjet që kishit me klubin i keni lënë pas tashmë?

– Po i kemi lënë pas. Mendojmë vetëm për futbollin tashmë. Të bëjmë një kampionat të mirë dhe të mendojmë vetëm për arritjen e objektivave tona.

Qëndroi dy muaj në Greqi, gjeti marrëveshjen me Larisën, thuajse firmosi, por pastaj doli në dritë kontrata me Kukësin, që e detyronte të luante në kupat e Europës.

Gjyqi në FIFA do të ishte një humbje e frikshme kohe dhe parash për të gjithë, ndaj Alla ka panuar të kthehet, por me kushtet e tij.

Një sezon kontratë, dyfishim page nga 2500 në 5000 euro, asnjë klauzolë “sekrete” në kontratë dhe… të gjithë të lumtur.

Mbrojtësi 24-vjeçar ka nënshkruar marrëveshjen e re ditën e sotme në zyrat e klubit dhe do të niset drejt Ohrit për të zhvilluar fazën përgatitore.

Mbrojtësi ka folur për faqen e klubit në lidhje me marrëveshjen e re: “Më vjen mirë që gjeta gjuhën e përbashkët me klubin. Të gjitha mosmarrëveshjet që kishim i sqaruam dhe tashmë jam i kënaqur që rikthehem përsëri. Presidenti Safet Gjici u tregua mjaft dashamirës dhe më duhet ta falenderoj, ashtu si të gjithë të tjerët në klub. Jam në një ambient që e njoh mirë dhe do të jap maksimumin tim. E di se çfarë objektivash ka klubi dhe dua të mbroj titullin kampion me Kukësin”.

Alla do të ketë dyfishim të pagës dhe të ardhurat e tij do të jenë 5 mijë euro në muaj. Futbollisti është joshur nga kjo dhe tashmë pritet edhe zyrtarizimi nga klubi verilindor, që do të zyrtarizojë Allën me shumë mundësi brenda 2 apo 3 ditësh. Menjëherë me të mbërritur në klub dhe pas nënshkrimit të marrëveshjes së re me Kukësin do të niset për fazën përgatitore në Ohër me ekipin.

Fitoi Kukësi, apo fitoi Alla, kjo nuk mund të ndahet me thikë. Kukësi pretendonte se e kishte lojtarin nën kontratë dhe e “mbyti” në gjoba, por tani duket se është harruar gjithçka, edhe fakti që Alla iku para kupave të Europës. Nga ana tjetër, vërtet Allës i digjet shansi Greqi, por nëse arin të dyfishojë pagën te Kukësi, nuk ka arsye pse të mos jetë i kënaqur, pasi te verilindorët është pikë kyçe dhe ka kapur edhe kombëtaren, ndërkohë që oferta e Larisës nuk ishte shumë më e lartë se e Kukësit dhe kostoja e jetesës në Shqipëri është më e ulët.

Kukësi pretendon se e ka nënkontratë, lojtari ka deklaruar të kundërtën, madje ka gjetur edhe ekipin e ri. 24-vjeçari është stërvitur madje dhe prezantuar te Larisa, por skuadra greke nuk e ka aktivizuar nga frika e kontratës me kampionët e Shqipërisë. Në kushte të tilla, Kukësi është hedhur në sulm. Presidenti Safet Gjici kërkon ta kthejë në ekip, pasi dëshiron të sigurojë përsëri shërbimet e mbrojtësit. Rruga është e vështirë, por jo e pamundur, palët janë të acaruara, por përsëri mund të gjendet gjuha e përbashkët, Enea Koliçi ka marrë rolin e “ndërmjetësit” për të rikthyer Allën pranë ekipit.

RIKTHIMI – Mbrojtësi Albi Alla nuk do të lihet i lirë nga klubi i Kukësit. Kampionët e Shqipërisë besojnë se i kanë të gjitha “kartat” në favorin e tyre, prandaj kërkojnë që të bindin përsëri 24-vjeçarin të rikthehet në skuadrën e tyre. Futbollisti nuk e dëshiron diçka të tillë, por në kushtet kur nuk ka asnjë mundësi tjetër mund të bëjë prapakthehu.

KOLIÇI – Një ndër të “dorëzuarit” e “betejave” me klubin e Kukësit është Enea Koliçi. Portieri pranoi të rikthehej dhe duke parë miqësinë e tij me Albi Allën, presidenti Safet Gjici i ka kërkuar që të negociojë me të për rikthimin e shtatlartit. Koliçi do të flasë me Allën dhe do të mundohet ta bindë për një rikthim edhe pse situatat janë mjaft të vështira. “Gardiani” ka shfaqur optimizëm para presidentit dhe klubit të Kukësit për mundësinë për ta bindur atë, tregojnë burime pranë klubit verilindor.

MILINKOVIÇ – Rol në këtë vendim ka edhe trajneri Mlladen Milinkoviç. Tekniku serb ka kërkuar rikthimin e Allës, pasi do të preferonte që të luante me të dhe Shametin në prapavijë. Dyshe që ka luajtur bashkë sezonin e shkuar dhe e njohin mjaft mirë lojën e njëri-tjetrit. Numri një i stolit të kampionëve e pëlqen Allën dhe e ka vendosur në krye të dëshirave të tij për mbrojtjen.

GJICI – Një ndër vështirësitë e arritjes së rikthimit të mbrojtësit mund të jetë edhe mënyra e pritjes nga ana e klubit dhe presidentit Gjici. Megjithatë sipas burimeve pranë kreut të klubit, pritja për të do të jetë mjaft e mirë. Futbollisti nuk do të penalizohet dhe do të vazhdojë normalisht të punojë me pjesën tjetër të ekipit.

Për momentin ndërmjet Kukësit dhe Allës janë duke u hedhur urat e komunikimit, ndërsa trenin pritet ta nisë Koliçi drejt stacionit të përbashkët.

Albi Alla është te Larisa prej javësh dhe është zyrtarizuar aty që prej 1 korrikut, por Kukësi nuk ka ndërmend të heqë dorë prej gjyqit ndaj tij. Supersport raporton se klubi verilindor po e vazhdon betejën ligjore në FSHF, aty ku ka paraqitur kontratën e Allës, ku shkruhej se mbrojtësi duhej të luante me Kukësin në kupat e Europës dhe sipas klubit verilindoër, Larisa ka biseduar dhe firmosur me lojtarin pa i përfunduar kontrata.
Megjithatë, klubi grek pretendon se kontrata nis në 1 korrik dhe Albi Alla ka mbyllur gjithçka më 30 qershor. Sipas tyre, nuk është e ligjshme që kontrata e mbyllur më 30 qershor ta mbajë lidhur Allën edhe për kupat e Europës. Kush ka të drejtë? “Sport Ekspres” ka komunikuar me të gjitha palët e përfshira dhe realisht të gjithë kanë gabuar.
1. Kukësi u firmos futbollistëve kontrata të paligjshme, sepse asnjë kontratë nuk duhet të ketë fuqi vepruese matanë 30 qershorit, nëse përfundon aty. Loja e detyrimit për të luajtur vetëm në kupat e Europës është një shpikje shqiptare dhe UEFA e FIFA nuk e njohin absolutisht.
2. Alla ka faj sepse ka firmosur një kontratë të parregullt dhe nuk e ka lexuar gjithçka me vëmendje, apo e ka firmosur me vetëdije, duke mos u shqetësuar shumë për pasojat. Prej janarit Alla është bërë me menaxher grek dhe kompania që e përfaqëson ka zbuluar detajet e çuditshme të kontratës së tij, që janë të paligjshme.
3. Federata Shqiptare e Futbollit ka faj që lejon deformimin e kontratës tip nga UEFA e FIFA. FSHF u jep klubeve kontratën tip, që mund të ketë modifikime e klauzola sipas dëshirës, por asnjëherë duke shkelur rregullat, si në rastin e Kukësit, që përpilon kontratë njëvjeçare me shtrirje në dy sezone. FSHF duhej t’i kishte ndaluar me kohë kontrata të tilla, por duket qartë që ose nuk i ka lexuar fare, ose nuk e ka vrarë mendjen, për sa kohë futbollistët nuk janë ankuar.
Si i bëhet? Nëse Kukësi këmbëngul dhe vërtet kërkon të shkojë në gjyq me Larisën dhe Allën, FSHF është jashtë loje, nuk dënon dot e nuk i jep dot drejtësi askujt, sepse vetë e ka bërë lëmsh.
Çështja do të shkojë në FIFA e më pas në KAS dhe me shumë mundësi skenari do të jetë ky: Kukësi do të dënohet për përpilim kontratash të jashtëligjshme, Alla do të dënohet më pak, sepse ka firmosur me/pa dashje, një kontratë të paligjshme.

Nëse çështja shkon në KAS,
“digjet” qendërmbrojtësi
Fillimisht do të jetë FIFA ajo që do të japë versionin e saj dhe do të vendosë drejtësinë. Nëse as këtu palët nuk do të gjejnë paqe, atëherë fjala e fundit do i takojë KAS-it, që tashmë është i mirënjohur në Shqipëri, për rastet e njëpasnjëshme, që pas precedentit të Beogradit. Në këtë pikë, pavarësisht se kujt do t’i japë të drejtë institucioni më i lartë i drejtësisë sportive, Alla do të penalizohej, duke mos pasur të drejtë që të aktivizohet në takime zyrtare. Burime pranë lojtarit bëjnë me dije se kjo situatë do të zgjidhet shumë shpejt dhe do të jetë më e lehtë nga ç’pritet, pasi dihet se presidentit i Larisës është një nga avokatët më të fuqishëm në Greqi.

Nga largimi tek deklaratat,
precedenti i Allës “unik”
Titulli kampion ishte arritja më e madhe e klubit të Kukësit, por gjërat që prej asaj dite nuk kanë shkuar në mënyrën më të mirë të mundshme. “Goditja” e parë ishte largimi i qendërmbrojtësit Albi Alla, i cili ishte projektuar si një nga shtyllat e ekipit dhe në kupat e Europës, megjithatë lojtari pretendoi se i ka përfunduar kontrata. Menjëherë u kundërpërgjigj Kukësi, i cili paraqiti kontratën e lojtarit dhe një nga pikat e klauzolës, sipas së cilës thuhej: “Lojtari pranon dhe merr përsipër se do të vazhdojë të luajë me të njëjtat kushte dhe në rastin e zgjatjes së afatit të sezonit të futbollit nga FSHF dhe/ose kualifikimit të klubit në kupat e Europës ose në Champions League. Në këto raste kontrata zgjatet automatikisht, pa limit, një absurditet më vete. Në rast se lojtari nuk paraqitet pranë klubit për të marrë pjesë në kupat e Europës apo Champions League, Alla duhet t’i paguajë klubit deri në 500.000 euro brenda 30 ditësh nga kërkesa shkresore ose verbale të bëra nga klubi dhe për çdo ditë vonesë lojtari deklaron se do të paguajnë penalitet prej 0.5% të shumës totale. Lojtari deklaron se nëse ai nuk kryen pagesën, kjo do të përbëjë kusht që FSHF, UEFA dhe FIFA të mos e lejojë lojtarin të transferohet në ekipe të tjera vendase dhe të huaja”. Në hapat e parë të konfliktit, verilindorët kërkuan që lojtari të kthehej dhe do ja hidhte vetëm me një gjobë. Menaxheri i lojtari, i kontaktuar nga “Sport Ekspres” pak javë më parë, deklaroi se kontrata ishte e paligjshme dhe se nuk i druhej aspak një beteje ligjore me Kukësin: “Kontrata e klientit tim është brenda rregulloreve të FIFA-s dhe do të zbatojë ato, asgjë tjetër. Kaq, gjithë të tjerat janë diskutime pa vlerë. Sipas ligjit, një kontratë ka një kohëzgjatje në bazë të periudhave të transferimeve. Një vit, një vit e gjysmë, etj. Kontrata fillon dhe përfundon në afatet e lejuara të dritareve të merkatos, jo më tej. Nëse Alla ka firmosur për sezonin 2016/17, nuk lejohet me ligjet e FIFA-s që në bazë të asaj kontrate ai të vazhdojë të luajë deri në korrik apo gusht 2017, sepse në 1 korrik nis zyrtarisht sezoni i ri. A i druhemi një beteje ligjore me Kukësin? Jo, absolutisht. Nëse Kukësi dëshiron, le ta çojë çështjen në gjyq, nuk ka asnjë problem. Unë mund të them që jemi një kompani shumë e madhe, kemi besim te departamenti ynë ligjor dhe unë flas në bazë të letrave, të dokumentacionit dhe të rregullores së FIFA-s. Ne zbatojmë ligjet e futbollit të FIFA-s dhe UEFA-“s. Situata qëndroi e ngrirë për pak kohë deri në momentin që qendërmbrojtësi i përfaqësueses kuqezi u prezantua në klubin grek të Larisës, Kukësi përsëri doli me një deklaratë që lajmëron se do të kërkojë dëmshpërblim për këtë transferim jo të rregullt. Siç parashikon kontrata, verilindorët kërkuan 500 mijë euro dëmshpërblim për prishje të njëanshme të kontratës. Tashmë situata ka ndryshuar dhe siç bëhet e ditur pretendimet e klubit kampion kanë ndryshuar, duke e rritur ndjeshëm kërkesën financiare, që arrin në 3 milion euro. Është e vështirë që të gjendet një precedent që të jetë ndjekur nga një klub me kaq shumë ngulm sa Kukësi. E sigurt është që në këtë histori do të dëmtohen të gjithë.

Megjithatë, Larisa pretendon se kontrata nis në 1 korrik dhe Albi Alla ka mbyllur gjithçka më 30 qershor. Sipas tyre, nuk është e ligjshme që kontrata e mbyllur më 30 qershor ta mbajë lidhur Allën edhe për kupat e Europës.

Si i bëhet? Nëse Kukësi këmbëngul dhe vërtet kërkon të shkojë në gjyq me Larisën dhe Allën, FSHF është jashtë loje, nuk dënon dot e nuk i jep dot drejtësi askujt, sepse vetë e ka bërë lëmsh. Çështja do të shkojë në FIFA e më pas në KAS.

Sot ishte planifikuar një seancë ballafaqimi mes palëve në Dhomën e Zgjidhjes së Konflikteve në FSHF për çështjen mes Kukësit dhe Albi Allës. Një seancë, pajtimi siç parashikohet nga rregullorja në raste të tilla, ku me ndërmjetësinë e FSHF synohet gjetja e një akordi mes palëve, por në zyrat e institucionit shqiptar të futbollit janë paraqitur vetëm përfaqësuesit e klubit të Kukësit, ndërsa kanë munguar ata të qendërmbrojtësit 24-vjeçar, raporton Supersport.

Në këtë mënyrë zhvillimi i seancës ka qenë i pamundur dhe Federatës i duhet të caktojë një datë tjetër për seancën e parë, ku do të tentohet gjetja e mirëkuptimit mes palëve. Për momentin si Kukësi ashtu dhe lojtari qëndrojnë në llogore të kundërta, Kukësi ka paditur futbollistin për shkelje të njëanshme të kontratës duke u larguar nga skuadra me përfundimin e sezonit pa marrë pjesë në ndeshjet europiane. Pretendimi i klubit kampion të Shqipërisë është se Alla ka firmosur në kontratën e tij me Kukësin se “lojtari pranon të luajë me të njëjtat kushte edhe në rast të zgjatjes së sezonit futbollistik nga federata apo edhe në rast të kualifikimit në Champions ose Europa League”.

Kukësi pretendon se në kontratë është parashikuar se në rast mosparaqitje të futbollistit për të luajtur në Kupat e Europës lojtari penalizohet me një shumë prej 500 mijë eurosh, me klubin që këcenoi se do ta çonte çështjen edhe në KAS, nëse nuk i jepet e drejtë në FSHF e FIFA.

Nga ana tjetër, përfaqësuesit e pogradecarit që është bashkuar me skuadrën e AEL Larisës pretendojnë  se rregulloret e UEFA-s nuk i njohin zgjatje të tilla të kontratave edhe për ndeshjet europiane.

Realisht, si Kukësi, ashtu edhe Alla kanë të drejtën e vet, por nëse vërtet çështja shkon në FIFA, të dyja palët rrezikojnë dënimin dhe më shumë rrezikon Kukësi, që aplikon klauzola që nuk parashikohen në rregulloret e FIFA-s dhe UEFA-s, pasi çdo sezon përfundon më 30 qershor.

Nga ana tjetër, Alla do të bllokohej deri në fund të procesit dhe jo vetëm në aspektin personal do të ishte një dëm i madh, por edhe për kombëtaren, meqë ai është pjesë e saj”. Duke iu kthyer kontratës së Kukësit, duhet sqaruar edhe diçka: “Alla, sipas kontratës, ka njoftuar klubin 3 muaj përpara se do të largohet, për të mos kaluar në rinovim automatik të kontratës. Gjithashtu, një muaj përpara fundit të sezonit ka dorëzuar kërkesën për të mos qenë pjesë e skuadrës në kupat e Europës”.

Kontrata e Allës dhe klauzola e “krimit”

Kukësi, ashtu si gjithë klubet shqiptare, prej vitesh aplikon një kontratë tip të shpërndarë nga FSHF, por me disa shtojca e klauzola që herë janë normale e herë jo. Natyrisht, për faktin që janë konfidenciale, nuk mund t’i publikojmë të gjitha, por në rastin e Allës, rast që vlen për shumë futbollistë, ekziston klauzola e detyrimit për të luajtur në kupat e Europës, që përbën një shkelje për rregulloren e FIFA-s. Natyrisht, dikush mund të thotë: Alla e firmosi, të mbajë përgjegjësi! Ndoshta do të mbajë, por nga ana tjetër edhe klubet shqiptare nuk janë në rregull.

Sipas kontratave tip të FIFA-s, kontrata e një futbollisti përfundon në mbylljen e sezonit të fundit të shënuar në kontratë. Sipas FIFA-s, nuk është e mundur që të aplikohet një kontratë për një sezon, duke i shtuar si klauzolë edhe 1 apo disa muaj në sezonin pasardhës. Sezoni i ri në Shqipëri, ashtu si në gjithë Europën Perëndimore, nis më 1 korrik, që do të thotë se klauzola që detyron futbollistët tanë të luajnë në korrik është një shkelje e pastër. Pse pranojnë futbollistët? Ca nga injoranca e ca nga halli, sepse nuk e kanë luksin të kundërshtojnë. Çfarë problemi u krijohet? Mjafton të kujtohet rasti Liridon Latifi verën e shkuar: luajti në korrik për Kukësin, më pas u kthye te Skënderbeu dhe në janar kishte oferta nga jashtë, por kishte plotësuar numrin e dy transferimeve në një sezon dhe e vetmja mundësi që të lëvizte ishte që të shkonte në kampionate me sistemin pranverë-dimër, si Kazakistani e ndonjë tjetër, apo të shkonte në Azi a Amerikë.

Larisa e ka zyrtarizuar Allën, por në fakt ai nuk ka firmosur ende, duke e ditur që deri në 30 qershor nuk mundet ta bëjë këtë gjë. Megjithatë, Kukësi kundërsulmon, duke i kërkuar Allës të mos negociojë apo firmosë me asnjë klub, pasi është ende nën kontratë me kampionët e Shqipërisë.

Përveç kësaj, Kukësi i kujton Allës një nga pikat e kontratës, klauzolën e famshme që e detyron të qëndrojë edhe për kupat e Europës.

Edhe pse është një klauzolë absurde, që vetëm në Shqipëri zbatohet, Alla e ka firmosur, me apo pa dijeni, ndaj nëse palët përballen në FIFA, me siguri rrezikojnë të gjithë dënim.

Qendërmbrojtësi i kombëtares shqiptare nuk është paraqitur në grumbullimin e skuadrës për kupat e Europës, me justifikimin se kontrata e tij ka mbaruar dhe se klauzola që e detyron vetëm për kupat e Europës është e paligjshme.

Në fakt, këtu Alla ka të drejtë, sepse sipas rregullores së FIFA-s dhe UEFA-s kontratat përfundojnë në fund të sezonit të rregullt dhe nuk kanë fuqi vepruese për sezonin pasardhës. Kjo do të thotë se nëse Allës i ka përfunduar kontrata më 31 maj 2017, atëherë nuk është logjike që ai të ketë detyrimin të luajë për Kukësin në Europë deri në korrik, gusht, apo më tej, nëse Kukësi kap grupet në Champions League apo Europa League.

Megjithatë, Kukësi tund kontratën, që është legjitimuar edhe nga FSHF, e cila ka një justifikim që në fakt në FIFA e UEFA nuk pi ujë: Nëse palët janë dakord, kontrata është e vlefshme!

“Sport Ekspres” ka kontaktuar menaxherin e Kukësit, Naim Halili, pas lajmit se Alla ka firmosur në Greqi dhe komenti i Halilit ka qenë i prerë: “Transferimi i Allës është i paligjshëm. Ne do të kontaktojmë me klubin e Larisës, ku do t’i paraqitim kontratën e lojtarit. Këtë çështje do ta ndjekim në FIFA dhe nuk do t’ia japim lejekalimin ndërkombëtar dhe do ta penalizojmë lojtarin”.

Kjo do të thotë se Alla dhe Kukësi tashmë duhet të përballen në FIFA, duke qenë se Federata Shqiptare e Futbollit nuk ka ndërmend të vendosë pro apo kundër secilës palë.

Lajmin e ka dhënë klubi grek, me një komunikatë zyrtare në faqen e vet në internet.

Qendërmbrojtësi i kombëtares sonë ka firmosur një kontratë 3-vjeçare dhe te Larisa bashkohet me shqiptarët Gertin Hoxhalli e Fatjon Andoni.

Alla e kishte deklaruar me kohë se po bisedonte me klube greke dhe se kontrata me Kukësin i kishte përfunduar, por Kukësi e priste për kupat e Europës, duke i treguar kontratën.

Pikërisht kontrata u bë “mollë sherri”, sepse kompania që përfaqëson Allën prej disa muajsh e konsideron klauzolën e kontratës si të parregullt dhe jashtë normave të FIFA-s.

Në një intervistë për “Sport Ekspres”, agjenti i Allës e ftoi Kukësin ta çonte në FIFA, nëse mendon se Alla ka gabuar.

Në njoftimin e vet Larisa specifikon që Alla është me pasaportë greke, duke u transferuar në Greqi që në moshën 3-vjeçare e duke u shkolluar në vendin fqinj, ku nisi edhe futbollin dhe firmosi kontratën e parë si profesionist me Ergotelis në Kretë. Natyrisht, Larisa e shkruan këtë edhe për të treguar që ka blerë një futbollist “vendas” dhe mbi të gjitha që nuk zë një vend komunitari në skuadër.

Kontrata e Albi Allës është në posedim të “Sport Ekspres” dhe tashmë është e qartë që lojtari e ka firmosur kontratën, ku dhe bëhet e ditur se pjesë e saj është klauzola e cila e mban të lidhur me klubin e Kukësit dhe për Champions League. Në krahun tjetër, menaxheri i tij bëri të qartë se nuk do të zbatohen këto pika dhe lojtari i tij është i lirë, pasi ajo klauzolë nuk është e ligjshme. Ajo që bie në sy është dhe përpilimi jo shumë i saktë i kontratës pasi Champions League veçohet nga termi “kupat e Europës”, megjithatë kjo kalon në plan të dytë. Në këtë kopje të kontratës është e sqaruar dhe pika nëse lojtari nuk kthehet, ku parashikohet një dëmshpërblim praj 500.000 eurosh, edhe pse kontrata e tij ka mbaruar.

Një luftë e hapur që duket se do të marrë zgjidhje vetëm në FIFA, sepse FSHF i bie shkurt: kontratat e tilla lejohen, përderisa kanë rënë dakord palët! Problemi është se në momentin që skuadra garanton kualifikimin në kompeticionet europiane, teorikisht lojtari firmos një kontratë të re pa afat përfundimi, pra digjet një dritare në merkato. Edhe pse është e sqaruar shumë qartë se kontrata përfundon në fund të kalendarit sezonal të FSHF, në pikën pasardhëse shkruhet që kontrata vazhdon për kupat e Europës, pra do të kemi një kontratë të re në varësi të ecurisë në kupat e Europës. Lojtari e ka firmosur një kontratë të tillë dhe tashmë çështja duket e destinuar të përfundojë në FIFA për t’u zgjidhur.

Ja dy pikat e para të kontratës në lidhje me klauzolën e kohëzgjatjes së kontratës së Allës.   

KONTRADIKTA – Në kontratën e firmosur nga Alla pika i) dhe ii) në dukje duken të kundërta dhe kontradiktore. Nëse në pikën e parë bëhet e qartë se kontrata është 1-vjeçare dhe përfundon në fund të sezonit kalendarik, pika e dytë thotë që lojtari është nën kontratë edhe për kupat e Europës, pra lojtari në teori ka nënshkruar një kontratë bashkëpunimi të ri menjëherë pas përfundimit të së parës. Afati i përfundimit të kontratës së verës? Nga një muaj e tutje, sepse në futboll asgjë nuk është e pamundur dhe Kukësi ka shanset e veta sportive për të shkuar larg në kompeticionet ndërkombëtare për klube.

KUR MBYLLET KONTRATA? – Sipas kontratës, ajo lidhet për një sezon futbollistik, pra pas 1 korrikut deri më 30 qershor, edhe pse shpesh klubet tona abuzojnë, duke firmosur deri më 31 maj. Sezoni futbollistik fillon në datën zyrtare të shpallur nga Federata Shqiptare e Futbollit dhe mbaron në datën zyrtare të përfundimit të sezonit të shpallur.

500. ii) Lojtari pranon dhe merr përsipër se do të vazhdojë të luajë me të njëjtat kushte dhe në rastin e zgjatjes së afatit të sezonit të futbollit nga FSHF dhe/ose kualifikimit të klubit në kupat e Europës ose në Champions League. Në këto raste kontrata zgjatet automatikisht, pa limit, një absurditet më vete. Në rast se lojtari nuk paraqitet pranë klubit për të marrë pjesë në kupat e Europës apo Champions League, Alla duhet t’i paguajë klubit deri në 500.000 euro brenda 30 ditësh nga kërkesa shkresore ose verbale të bëra nga klubi dhe  për çdo ditë vonesë lojtari deklaron se do të paguajnë penalitet prej 0.5% të shumës totale. Lojtari deklaron se nëse ai nuk kryen pagesën, kjo do të përbëjë kusht që FSHF, UEFA dhe FIFA të mos e lejojë lojtarin të transferohet në ekipe të tjera vendase dhe të huaja.

Kontrata “tip” dhe

absurditetet e saj

Ka kontrata 1-vjeçare, 1+1, disa-vjeçare, me klauzola të ndryshme monetare apo edhe siç ndodh në Spanjë me të drejtë që një lojtar i huazuar të mos luajë kundër ekipin që ka kartonin e tij. Ecuria e klubeve shqiptare në kupat e Europës le të themi që s’ka qenë premtuese dhe maksimumi i ndeshjeve që zhvilloheshin në verë në kompeticionet ndërkombëtare rrallë herë i arrinte katër. Pjesëmarrja në Europë ishte një burim përfitimi, por asnjëherë nuk shiheshin fitime më të mëdha nga kalimi i tureve, ose më saktë nuk mendoheshin. Me kalimin e viteve situata po ndryshon, fatmirësisht për mirë, kemi një skuadër si Kukësi që ka kaluar katër ture, kemi dhe një skuadër si Skënderbeu që ka provuar grupet e Europa League-s. Normalisht që besimi reciprok si nga klubi dhe lojtarët nuk është maksimal, çka bën që pjesa më e madhe e kontratave të jenë minimale, një-vjeçare. Mes shumë nenesh që mund të ketë kontrata, ndër të rrallat vende në botë, në Shqipëri ndodh që ka dhe nënpika për një zgjatje të kontratës, por pa një datë përfundimi. Rasti i Allës në dukje mund të jetë i lehtë për t’u gjykuar, pasi përderisa ka hedhur të zezën mbi të bardhë ka qenë dakord, por sa e drejtë është kjo dhe sa i detyruar është lojtari për të zbatuar kontratën? Çështja do të shkojë në FIFA dhe ky është rasti i parë në këtë lloj në Shqipëri. Gjasat janë që i fituar të dalë lojtari, kjo për disa arsye. Së pari, UEFA ka paraqitur një model kontrate sipas së cilës duhet të jenë të ngjashme të gjitha kontratat që do të paraqiten nga klubet. Modeli i kësaj kontrate e përjashton një pikë të klauzolës së zgjatjes për kupat e Europës, sepse kontrata e një sezoni nuk mund të mbartë detyrime për 1 korrik e tutje, kur nis sezoni i ri. Së dyti, kontrata është e vlefshme për kupat e Europës dhe për kampionat jo, po sikur skuadra pjesëmarrëse në kompeticion të arrijë në grupe, po në kampionat a do të ketë të drejtë lojtari të luajë pa një kontratë ekzistuese? Së treti, këto lloj klauzolash aplikohen VETËM në Shqipëri, pasi në asnjë vend tjetër të botës, ose për të qenë i saktë, në asnjë kampionat prestigjioz apo serioz nuk njihen.

PRECEDENTI – Kukësi ka plot pesë vite që bën mirë në kampionatin shqiptar, po ashtu dhe në kupat e Europës dhe kjo lloj kontrate nuk është një prodhim kuksian. Ka plot 20 vite që kjo lloj klauzole qarkullon në Shqipëri. Të gjitha klubet shqiptare e aplikojnë këtë lloj kontrate tip. Të gjitha skuadrat pretendente që mund të arrijnë kupat e Europës nënshkruajnë të tilla kontrata, me arsyen e qartë: që skuadra të mos shkrihet në fund të sezonit. Pikërisht nga kjo arsye lindi dhe detyrimi që shtyu në krijimin e një kontrate me një klauzolë të tillë. E ligjshme apo jo? FSHF e pranon dhe është një tjetër çështje. FIFA dhe UEFA njohin fundin e sezonit datën 30 qershor. Më tej duhet një kontratë e re. Pikërisht këtu del një tjetër problematikë. Nëse një lojtarit i përfundon kontrata në 30 qershor dhe me një klauzolë të tillë ai detyrimisht do të nënshkruante një të re, por me një detaj të vogël që nuk kuptohet, pa një datë përfundimi të kësaj kontrate. Në këtë mënyrë lojtari djeg një dritare për t’u transferuar diku tjetër sepse nuk lejohen më shumë se dy transferime në një sezon futbollisitik. Edhe nëse ndodh që futbollisti të transferohet në një tjetër skuadër dhe ka luajtur në kupat e Europës, përveç se nuk ka të drejtë të luaj me klubin e ri të kupat e Europës, në merkaton e janarit nuk ka të drejtë të ndërroj skuadër. Një kontratë me një klauzolë “shqiptarshe”, që ka në vetvete shumë pikëpyetje. Kukësi nuk është aspak fajtor që i aplikon këto kontrata, ashtu si asnjë skuadër tjetër, pasi vetë futbollistët janë të vetëdijshëm për atë që firmosin. Shqipëria është vendi i çudirave dhe këtu nuk bën përjashtim as futbolli.

Arsyet e kësaj përplasjeje? Për Dervishin, menaxhimi i keq ka çuar në një përplasje që nuk është e favorshme për askënd: “Alla dhe Kukësi duhet të gjejnë një pikë takimi. Ky problem u keqmenaxhua nga klubi. Detyra ime ishte të zgjedh lojtarë, kontratat i bën avokati, por s’ka rëndësi kjo. Nëse kjo çështje shkon në gjyq, me shumë mundësi fiton lojtari, pasi FIFA njeh fundin e sezonit kur mbaron kalendari i FSHF-së. Mos të harrojmë që Alla posedon pasaportë greke, çka e favorizon”, përfundon Dervishi.

Albi Alla dhe Kukësi, një binom perfekt sezonin e fundit, por sa larg janë tani! Jo thjesht në aspektin gjeografik, sepse Alla është në Greqi, por mbi të gjitha për faktin se qendërmbrojtësi refuzon të luajë në kupat e Europës me Kukësin, duke qenë se i ka përfunduar kontrata me klubin kampion të Shqipërisë. Te Kukësi tregojnë kontratën dhe klauzolën që e detyron Allën të vazhdojë edhe në kupat e Europës, nëse arrihej kuy objektiv, por këtu lind problemi madhor: vetëm në Shqipëri aplikohen klauzola të tilla, pasi të luajturit në kupat e Europës i përket sezonit të ardhshëm, ndaj duhet firmosur detyrimisht një kontratë e re. Alla me të drejtë kujton rastin Liridon Latifi: ylli i Skënderbeut luajti korrikun e shkuar i huazuar te Kukësi, u kthye te Skënderbeu dhe në janar “u dogj”, sepse nuk lejohet të transferohej në kampionate që ashtu si i yni, luajnë në periudhën vjeshtë-pranverë (2 klube në një sezon është maksimumi i lejuar për një futbollist).

Në lidhje me këtë çështje, “Sport Ekspres” ka kontaktuar menaxherin e Albi Allës, grekun Fotis Paparegas, i cili është pjesë e agjencisë ACE Management, që ndër klientët e vet ka edhe Konstantinos Manolas, ylli i Romës në Serinë A. Paparegas me mirësjellje ka pranuar të flasë për problemin e Allës me Kukësin, duke shpjeguar arsyet pse qendërmbrojtësi ka të drejtë të mos kthehet, nëse nuk i ofrohet kontratë e re. Rinovim me Kukësin? Paparegas është i hapur për çdo ofertë, edhe nga Kukësi…

Zoti Paparegas, prej sa kohësh jeni menaxheri i Albi Allës?

Prej 5-6 muajsh.

A jeni në dijeni të klauzolave që Kukësi ka vendosur në kontratën e Allës verën e shkuar?

Kontrata e Albi Allës ka klauzola të shumta, për titullin, kualifikim në kupat e Europës, arritjen e objektivave, e shumë të tjera.

E kemi fjalën për klauzolën që e detyron Allën të luajë edhe në kupat e Europës për Kukësin.

Shikoni, Albi zhvilloi një sezon të mirë me Kukësin. Ai është shpallur kampion dhe është anëtar i kombëtares dhe është shumë i lumtur për këtë. Kishte një kontratë për një sezon me Kukësin, ajo kontratë ka përfunduar. Kontrata e tij është brenda rregulloreve të FIFA-s dhe do të zbatojë ato, asgjë tjetër. Kaq, gjithë të tjerat janë diskutime pa vlerë.

A keni biseduar kohët e fundit me përfaqësues të Kukësit?

Askush nga Kukësi nuk më ka telefonuar në lidhje me oferta të reja. Kontrata e Allës ka përfunduar.

Kukësi pretendon se Alla duhet të kthehet dhe prej dy ditësh kanë nisur gjobat ndaj tij.

Sipas ligjit, një kontratë ka një kohëzgjatje në bazë të periudhave të transferimeve. Një vit, një vit e gjysmë, etj. Kontrata fillon dhe përfundon në afatet e lejuara të dritareve të merkatos, jo më tej. Nëse Alla ka firmosur për sezonin 2016/17, nuk lejohet me ligjet e FIFA-s që në bazë të asaj kontrate ai të vazhdojë të luajë deri në korrik apo gusht 2017, sepse në 1 korrik nis zyrtarisht sezoni i ri.

A i druheni një beteje ligjore me Kukësin?

Jo, absolutisht. Nëse Kukësi dëshiron, le ta çojë çështjen në gjyq, nuk ka asnjë problem. Unë mund të them që jemi një kompani shumë e madhe, kemi besim te departamenti ynë ligjor dhe unë flas në bazë të letrave, të dokumentacionit dhe të rregullores së FIFA-s. Ne zbatojmë ligjet e futbollit të FIFA-s dhe UEFA-s.

E ardhmja e Allës, ku mund të jetë?

Para fundit të këtij sezoni shumë klube më kanë kontaktuar në lidhje me situatën e tij dhe ka interesim për të. Ende nuk kemi vendosur, është ende herët.

Po Kukësi, a do të ishte një opsion për sezonin e ardhshëm?

Kukësi nuk na ka bërë ende asnjë ofertë për të ardhmen. Unë jam i gatshëm të bisedoj me drejtuesit e klubit, e kam për detyrë të flas dhe t’i përgjigjem çdo oferte nga çdo ekip, nga e gjithë bota, dhe Kukësi nuk bën përjashtim.

Jurgen Zela

Tashmë ka një çështje “Alla” tek Kukësi. Klubi pretendon se lojtari është nën kontratë dhe e pret në stërvitje, por në krahun tjetër lojtari vijon qëndrimin në Greqi me idenë se është një lojtar i lirë. Ky largimi i tij i pallogaritur ka vënë jo pak në alarm trajnerin Ernest Gjoka, pasi Alla konsiderohej një pikë e rëndësishme dhe për kupat e Europës. Burime pranë klubi të Kukësit bëjnë me dije se për lojtarin kanë nisur gjobat që prej ditës së djeshme dhe për çdo ditë që vonohet në stërvitje, shifra vijon dhe rritet.

QENDRA E MBROJTJES – Kukësi e nisi merkaton në dalje me pesë largime, ndërsa në hyrje ende asnjë lojtar nuk është zyrtarizuar. Prapavija dhe porta llogariteshin “të blinduara”, por tashmë situata është ndryshe. Alla ishte projektuar titullar së bashku me Shametin në qendër të mbrojtjes, ndërsa tani alternativa e vetme është Pashaj. Stafi i Kukësit ka nisur menjëherë kërkimet për një mbrojtës që të mos i lihet asgjë fatit, pavarësisht se si do të shkojnë bisedimet me Allën. Burime pranë lojtarit kanë konfirmuar se menaxheri i tij vijon tratativat me klubin e Kukësit për zgjidhjen e kësaj çështje, por ndeshjet në Champions League janë shumë pranë dhe nuk ka kohë për të pritur zhvillimet.

SYNIMET – Trajneri kërkon një mbrojtës që të përligjë së paku nivelin e ndeshjeve Champions, por dhe ta njohë kampionatin shqiptar, që të mos i duhet shumë kohë që të përshtatet. Pra, kërkohet një lojtar nga kampionati shqiptar. Aktualisht në treg nuk ka shumë lojtarë të lirë brenda Superiores, por ndërkohë ka edhe emra të ofruar nga jashtë Shqipërisë. Tregu ballkanas dhe ai brazilian janë në fokus, por herë për CV të varfër e herë nga frika se lojtarët e ofruar janë pa eksperiencë, te Kukësi po mendohen dhe po presin. Pas pak ditësh, para nisjes për në Austri, do të merret edhe vendimi final: nëse nuk kthehet Alla, do të afrohet patjetër një futbollist, i cili preferohet me eksperiencë edhe në arenën ndërkombëtare.

Alla ka qenë një element shumë i rëndësishëm tek skuadra Kukësit, duke qenë protagonist i padiskutueshëm në arritjen e titullit kampion. Largimi i tij do të ishte një problem shumë i madh për kuksianët që tashmë kanë më pak se një muaj kohë për të përgatitur ndeshjen e parë në Champions League. Në një kohë kaq të shkurtër, do të ishte shumë e vështirë gjetja e një lojtari të të njëjtit nivel dhe akoma më e vështirë do të ishte përshtatja e tij me skuadrës.

Lojtari dhe menaxheri i tij presin kontaktin nga drejtuesit e Kukësit, për të parë një rrugë të kësaj situate, por e mira e Kukësit do të ishte një rikthim i tij, qoftë vetëm për ndeshjet në arenën ndërkombëtare. Presidenti Safet Gjici mund të jetë ai që mund t’i japë një zgjidhje kësaj situate, ose më saktë duhet t’i japë sa më parë një zgjidhje,sidomos me pretendimet madhore në kupat e Europës.

Pas konfirmimit të trajnerit Ernest Gjoka në krye të pankinës, puna për ndërtimin e një skuadre që të konkurrojë denjësisht në kupat e Europës ka nisur. Edhe pse priten që kampionët të bëjnë afrime të bujshme, që të përligjin dhe nivelit të Champions League, ende nuk ka ardhur asnjë zyrtarizim. Fillimisht kampionët e kanë nisur projektin për sezonin e ardhshëm me largimet, ku Kushtrim Lushtaku është i vetmi futbollist që ka tërhequr dokumentacionin nga klubi i Kukësit, por në ditët në vijim pritet që të ketë dhe lojtarë të tjerë që do ta ndalin këtu rrugëtimin me verilindorët.

ALLA

Mund të jetë Albi Alla humbja më e madhe e kuksianëve, para ndeshjeve të Europës. Qendërmbrojtësi, i cili ia doli që në vitin e parë me kuksianët të kurorëzohej si kampion, ta mbyllë këtu bashkëpunimin me Kukësin. I kanë mjaftuar vetëm dy vite në Superiore, për të treguar vlerat e tij, diçka që u konkretizua dhe me ftesën që mori nga trajneri i kombëtares Xhani De Biazi, për ndeshjet e muajt mars. Pas një sezoni fantastik me blutë, rrugët mes tij dhe verilindorëve mund të ndahen këtu.

KONTRATA

Siç bëhet e ditur për “Sport Ekspres” nga burime pranë lojtarit dhe menaxherit të tij, 24-vjeçarit i ka përfunduar kontrata me Kukësin. Deri në këto momente ai nuk ka pasur asnjë kontakt me drejtuesit e klubit. Normalisht që verilindorët nuk dëshirojnë që të humbasin shërbimet e një prej lojtarëve titullar, sidomos para ndeshjeve të Champions League, por deri në këto momente Alla është lojtar i lirë, gjithnjë sipas burimeve pranë tij. Vetë lojtari e ka bërë të ditur më parë se në Shqipëri, Kukësi do të jetë e vetmja skuadër me të cilën do të luajë, megjithatë për të pasur një zyrtarizim duhet pritur në ditët në vijim, edhe pse zgjatja e një bashkëpunimi nuk është se shihet në horizont.

OFERTAT

Performanca e mirë me Kukësin, sigurisht që nuk ka kaluar pa rënë në sytë e menaxherëve të klubeve të ndryshme në Europë. Ofertat për Allën nuk mungojnë dhe qendërmbrojtësi po i merr në shqyrtim të gjitha, për të vendosur më pas se ku do të vijojë karrierën e tij. Një aventurë e re jashtë Shqipërisë, duket më e mundshme për mbrojtësin nga Pogradeci, pasi do të ishte një hap i rëndësishëm në aspektin personal, por njëkohësisht për Kukësin do të ishte një humbje e madhe, pasi do të krijonte një “gropë” në mbrojtje, që duhet mbyllur sa më parë, pasi ndeshjet në arenën ndërkombëtare janë shumë pranë. Megjithatë nuk mund të quhet e mbyllur gjithçka sepse palët mund të arrijnë një tjetër marrëveshje, por që në planin e parë duket jo e lehtë.