Alket Kruja

Shënkolli pa trajner, Kruja: Ika për arsye personale

Sport Ekspres — Sun, 14 Jul 2019 11:52:35 +0000

Dita e shtunë ka qenë e fundit e Alket Krujës në stolin e skuadrës së Shënkollit, që e mori në sezonin e kaluar në një situatë jo fort të mirë në renditje. Fundi ka qenë shumë pozitiv, pasi në drejtimin e Krujës kjo skuadër arriti të mbijetonte në Kategorinë e Parë.

Kështu që Shënkollit i duhet që këtë sezon ta nisë trajneri i ri. Sot paradite, tekniku Kruja deklaroi për SportEkspres.com, se arsyet e largimit nga drejtimi i skuadrës së Shënkollit janë personale.

“Situata ime personale më imponoi të marr këtë vendim për largim nga pankina e Shënkollit. I falenderoj të gjithë ata me të cilët bashkëpunova dhe realizuam objektivin e qëndrimit të Kategorinë e Parë. Shënkollit i uroj suksese në këtë sezon të ri”, u shpreh Kruja.

AGRON KAJA

Shënkolli, trajneri Kruja: Me Ilirinë, finalja e radhës!

Sport Ekspres — Fri, 22 Mar 2019 11:57:36 +0000

Shënkolli po mendon për ndeshjen e radhës, që e zhvillon në transfertë kundër Ilirisë së Fushë-Krujës. Trajneri Alket Kruja deklaron se kjo sfidë është e vlerësuar maksimalisht prej tyre, pasi Iliria është e fortë në fushën e saj.

Për SportEkspres.com, tekniku Kruja deklaroi se në këtë ndeshje skuadra e drejtuar prej tij shkon për të marrë pikë. “Në këto dy javë, asgjë tjetër nuk më shkon ndërmend veç ndeshjes së radhës me Ilirinë në Fushë-Krujë. Duhet vlerësuar, pasi është skuadër e fortë në fushën e saj.

Kemi dy javë kohë që po e përgatisim skuadrën që nga kjo sfidë të mos dalim pa pikë. Të gjitha ndeshjet deri në fundin e kampionatit do të jenë si finale për ne. Edhe kjo me Ilirinë është finalja e radhës për ne”, shprehet Kruja.

AGRON KAJA

Shënkolli gati, Kruja: Nuk ka rëndësi ku luhet, duam 3 pikët

Sport Ekspres — Fri, 22 Feb 2019 10:39:47 +0000

Shënkolli luan në transfertë ndeshjen e javës së 18-të të Kategorisë së Parë. Kalendari i ka vënë përballë skuadrës së Veleçikut. Edhe pse koplikasit nuk do të luajnë në Shkodër, sikurse kanë bërë në takimet e tjera të këtij sezoni, trajneri i Shënkollit, Alket Kruja nuk e shikon si një faktor negativ për skuadrën e tij faktin që ndeshja do luhet në Pukë.

Madje ai e vlerëson këtë sfidë në Pukë si një plus për skuadrën e tij, pasi do të jetë një ndeshje e hapur me një rival direkt në renditje. Për SportEkspres.com, Kruja deklaroi se skuadra e Shënkollit do të luajë për rezultat pozitiv në këtë takim.

“Ne e kemi vlerësuar maksimalisht këtë sfidë dhe nuk e kemi problem se do të luhet në Pukë, sepse për Shënkollin kjo është vetëm një ndeshje në transfertë. Skuadra është e kompletuar në formacionin bazë dhe ne do të luajmë me synimin për të fituar. Tri pikët na e bëjnë më të lehtë rrugëtimin tonë në grupin e skuadrave për mbijetesë”.

Pas javës së 17-të të Kategorisë së Parë, në Grupin A Shënkolli renditet në vendin e 8-të me 20 pikë. Veleçiku pozicionohet në vendin e 6-të me 22 pikë të grumbulluara.

AGRON KAJA

Pesë ndeshje në krye të Shënkollit, Alket Kruja: Na kanë penalizuar dënimet

Sport Ekspres — Sun, 30 Dec 2018 10:24:41 +0000

Pas javës së 9-të në Kategorinë e Parë, skuadra e Shënkollit ndryshoi trajnerin, ku vendin e Alert Alcanit e zuri Alket Kruja, një zevendësim ky që deri në javën e 14-të e mbajti skuadrën në vendin e 7-të në renditjen e Grupit A. Sipas teknikut aktual të Shënkollit, Alket Krujës, mundësitë ishin për më shumë, dhe për Sportekspres.com ai deklaroi se dënimet e shumta të lojtarëve titullarë, njëherësh edhe ai i fushës, kanë qenë mangësitë kryesore për këtë situatë.

“Në mbylljen e gjysmës së parë të këtij sezoni, Shënkolli nuk erdhi në pritshmëritë e duhura. Sepse vetëm në ndeshjen me Erzenin skuadra shfaqi dobësi, ndërsa në takimet e tjera ka luajtur mirë. Por asnjëherë skuadra jonë nuk është mbledhur me gjithë futbollistët bashkë, sepse ka patur dënime të një pas njëshme, e këtu veçoj portierin Danaj”, kështu deklaroi trajneri i Shënkollit, Alket Kruja.

Ndërsa për pjesën tjetër të këtij sezoni, tekniku Kruja deklaron se Shënkolli do të bëjë merkato me lojtarë cilësorë, sepse synimi final është ngjitja në pesë vendet e para në tabelën e renditjes së Grupit A. “Ne kemi shumë lojtarë të rinj që vijnë nga akademitë e futbollit në Lezhë, por për të patur më shumë siguri në synimin tonë, do të bëjmë 3-4 përforcime gjatë muajit janar, me lojtarë cilësorë. Dy nigerianët që nuk u federuan në dy fazat e para do të jenë të gatshëm: mbrojtësi Idris dhe mesfushori Vitor, dhe në fundin e kampionatit ne synojmë ngjitjen në renditje në pesë skuadrat e para”.