Alesio Abibi

Avelino do përforcime, hedh sytë nga… Tirana

Sport Ekspres — Mon, 05 Aug 2019 07:51:42 +0000

Tirana ka bërë disa afrime këtë verë dhe ajo që ka rënë në sy është fakti që nën urdhrat e trajnerit Ardian Mema janë katër portierë. Dyshes Ilion Lika-Alesio Abibi i janë shtuar edhe Edvan Bakaj e Pano Qirko. Gjithsesi pritet të ketë të reja.

Abibi po shikon mundësinë e largimit dhe për të ka interesim nga jashtë vendit. Ottopagine.it shkruan se klubi italian i Avelinos, që garon në Serie C, po e shikon si mundësi portierin e Tiranës.

Shtatlarti ka edhe një vit kontratë, por duke parë faktin që te Tirana janë aktualisht katër portierë, Abibi mund edhe të lihet i lirë. Gjithsesi më parë duhet që Avelino të bindet që Abibi është i duhuri për ta.

Abibi: Mos më llogarisni, asnjë klub shqiptar si Tirana! Ka shumë spekulime

Sport Ekspres — Mon, 08 Jul 2019 11:54:46 +0000

Alesio Abibi, portieri i Tiranës, u përfol se do të kalonte te Kastrioti në Kategorinë e Parë. Duke e quajtur një lajm të fundit të merkatos, një kalim i tillë do ishte përforcim shumë serioz për skuadrën krutane, që zbriti në Kategorinë e Parë dhe synon rikthimin në elitë.

Gjithsesi Abibi për SportEkspres.com deklaron se nga Tirana largohet vetëm për një skuadër jashtë Shqipërisë. “E kam lexuar këtë lajm dhe e quaj spekulim. E pranoj që disa ekipe të Superiores, si edhe Kastrioti, më kanë kontaktuar. Por vetëm kaq.

Është normale në merkato, por unë u kam thënë se kam kontratë edhe një vit me Tiranën, ndaj do ta respektoj. Nuk kam deklaruar se do largohem nga Tirana, sepse një sezon bardheblu vlen sa tre sezone në çdo skuadër tjetër në Kategorinë Superiore”, deklaron Abibi.

Ndërkohë gardiani i Tiranës deklaron se është në bisedime me një skuadër jashtë Shqipërisë dhe nga Tirana vetëm kështu mund të largohet. “Unë jam në bisedime me një skuadër jashtë Shqipërisë dhe vetëm po të dakordësohem me ta do lëviz nga Tirana. Këtu në Shqipëri nuk shkoj në asnjë skuadër tjetër. Jam i fokusuar te Tirana, asnjë skuadër tjetër këtu mos të më llogarisë në plane të merkatos”, përfundon Abibi.

AGRON KAJA

Abibi: I lumtur që erdha në familje, ju tregoj problemin në Shqipëri

Sport Ekspres — Thu, 10 Jan 2019 21:15:34 +0000

Alesio Abibi u shndërrua brenda pak kohësh në numrin një të portës së Tiranës, duke shfaqur një formë mjaft të mirë. Ditën e sotme, 22-vjeçari ka folur për “RTSH Sport”, ku ka treguar për kalimin e tij nga Spanja në Shqipëri si dhe konkurrencën që ka me Ilion Likën, nga i cili thotë se ka mësuar shumë.

“Në Spanjë isha i lirë. Erdha në Shqipëri për një ekip pretendent, pa përmendur emra, por nuk u arrit akordi, për shkak të metodikës së klubeve shqiptare, që nuk i besojnë një portieri të ri. Ishte një ftesë që nuk mund ta refuzoja, pasi gjithë familja ime ka qenë të Tirana.

Është një ndjesi tjetër kur të thërret një ekip i tillë dhe që është i familjes. Konkurrenca me Likën më ka bërë mirë, pasi të rrit. Ilioni ka qenë gjithmonë në krahun tim. Më ka ndihmuar shumë, unë prita momentin tim dhe po mundohem të jap maksimumin.

Portier te Tirana ka shumë njerëz që e ëndërrojnë të luajnë, nuk është e thjeshtë, pasi është ekip i madh dhe ka presion. Plus që situata nuk ka qenë ndër më të mira dhe ka vështirësi. Por kur shkon në fushë, ka njerëz që luajnë para 100 mijë vetave dhe nuk kanë presion. Unë po ambientohem me kampionatin dhe me kalimin e kohës, po mundohem të jem sa më i qetë dhe të jap më të mirën”,- përfundoi 22-vjeçari.