Momenti më i bukur dhe largimi nga Lacio, Nesta: Ja si qëndron e vërteta!

Sport Ekspres — Thu, 27 Sep 2018 10:21:55 +0000

Alesandro Nesta i është rikthyer dhe njëherë momentit kur u largua nga Lacio e tij për t’u transferuar te kuqezinjtë e Milanit, me të cilët fitoi gjithçka. Një ndër mbrojtësit më të mirë dhe elegantë të historisë së futbollit tregon momentin më të mirë me bardhekaltrit, të cilët ishin një nga skuadrat më të forta në botë në vitet 2000. Lacio fitoi titullin atë vit, që përkonte dhe me 100-vjetorin e themelimit të klubit kryeqytetas, ndërsa në vitin 2002, klubi shiti Nestën dhe Krespon, respektivisht te Milan dhe Inter.

“Jam rritur te Lacio, kam luajtur që 8 vjeç me ato ngjyra, kam kaluar te të gjitha ekipet e moshave dhe arrita në ekipin e parë, duke u bërë kapiten në moshë shumë të re. Kjo ishte një arritje shumë e madhe për mua, ndërsa kujtimi më i mirë është fitimi i titullit.”

“Në atë periudhë nuk doja të largohesha nga Lacio dhe një vit më parë kisha refuzuar skuadra të rëndësishme, por e kuptova që duhet të largohesha. Klubi kishte shumë borxhe, skuadra nuk merrte rrogat prej 6-7 muajsh. Mund të thonë që jam tradhtar, por gjërat rrodhën në këtë mënyrë.”

“Lacio e sotme është një realitet i rëndësishëm, është një klub i shëndetshëm dhe i organizuar shumë mirë. Presidenti Lotito ka bërë një punë të mirë, edhe pse kontestohet herë pas here. Ai ia ka dalë të krijojë një skuadër konkurruese dhe arrin të shesë çdo vit ndonjë lojtar të madh”, përfundon për “DAZN”trajneri i Peruxhias, Alesandro Nesta.

Nesta: Me Maldinin te Milani do mësojnë si të sillen

Sport Ekspres — Fri, 10 Aug 2018 14:37:43 +0000

Alesandro Nesta është gati për të nisur sezonin e ri. Mbas një karriere fantastike si futbollist, njëri nga mbrojtësit më të mirë italianë dhe jo vetëm, ka nisur një tjetër karrierë, atë të trajnerit. Në fundin e sezonit të kaluar, 42-vjeçari pranoi ofertën e Peruxhias, klub që militon në Serinë B. Ish-mbrojtësi i Milanit është i motivuar për sezonin e ri, flet për dyshen Romanjoli-Kaldara dhe komenton afrimin e Maldinit. Rikthimi i tij është jetik për klubin, të cilin nuk e njeh askush më mirë se Paolo.

Peruxhia – “Mbas disa viteve jashtë, dëshiroja rikthimin në Itali. Peruxhia më dhuroi këtë mundësi të shkëlqyer dhe pranova direkt. Jam në vendin e duhur për mua, në një klub me histori dhe në një vend të rëndësishëm për t’u rritur. Ekipi ka pësuar ndryshime të shumta dhe po presim përforcime. Kam patur pak lojtarë në dispozicion gjatë fazës përgatitore, por kemi punuar mirë dhe dëshirojmë të jemi konkurrues. Punë e madhe na pret, sepse presim lojtarë të tjerë në ekip.”

Kaldara – “Kaldara sjell rini dhe freski fizike. Ai dhe Romanjoli janë dy futbollistë interesantë. Së bashku formojnë një dyshe të kompletuar dhe shpresoj që të jenë dhe dyshja e qendrës së kombëtares. I njoh, janë djem seriozë dhe shpresoj të bëjnë mirë. Milan duhet të rikthehet në Champions që të rrisë dhe këta lojtarë. Ndeshjet në stadiume të mëdha i rrisin lojtarët.”

Maldini – “Më në fund u rikthye Maldini. Diçka e tillë duhet të ndodhte patjetër, madje është rikthyer vonë. Paolo e di se çfarë do të thotë të jesh pjesë e Milanit dhe ai mund të rikrijojë mentalitetin e duhur. Më parë, sapo kaloje kangjellat e Milanelos, e dije mirë se si duhet të silleshe, ndërsa tani nuk ekziston një gjë e tillë. Rikthimi i Maldinit është i rëndësishëm edhe për këtë fakt.”