Sirena qipriote për Sherrin, një klauzolë e largon nga Vllaznia

Sport Ekspres — Mon, 17 Jun 2019 14:10:18 +0000

Alen Sherri mund ta vijojë karrierën jashtë vendit dhe për të ka interesim konkret. A2 CNN raporton se për portierin e Vllaznisë ka shfaqur interes Apolloni i Limasolit në Qipro. Jo vetëm kaq, por për “gardianin” ata janë të gatshëm të paguajnë edhe klauzolën që e lë të lirë.

Plot 50 mijë euro duhen paguar për Sherrin, i cili sezonin e fundit me Vllazninë është aktivizuar si titullar. Plot 21 ndeshje në Kategorinë e parë vjet, ndërkohë që në Superiore dy vite më parë iu besua porta në 26 përballje.

Sherri ka mbrojtur edhe portën e Shqipërisë U21 në një ndeshje me Sllovakinë, ndërkohë që dëshira e tij është e madhe për të luajtur jashtë vendit. Parametrat e tij janë mjaft të mira dhe mbetet për t’u parë nëse do të konkretizohet me sukses marrëveshja me Apollon Limasol.

Sherri: Situata te Vllaznia e paqartë, ofertat ia kam treguar klubit!

Sport Ekspres — Tue, 04 Jun 2019 10:36:22 +0000

Ekipi i Vllaznisë u ringjit në Kategorinë Superiore, pas një sezoni të suksesshëm në Kategorinë e Parë. Protagonist te skuadra shkodrane ka qenë edhe portieri Alen Sherri, i cili përpos suksesit që u arrit, për SportEkspres.com deklaron se situata në ekip është e paqartë. Këtu Sherri veçon edhe faktin se Vllaznia është nën administrimin e Bashkisë së Shkodrës dhe zgjedhjet e 30 qershorit po e mbajnë peng skuadrën.

SITUATA TE VLLAZNIA – “Vllaznia administrohet nga Bashkia e Shkodrës, e duke qenë se më 30 qershor janë zgjedhjet lokale, situata për vazhdimësinë është e paqartë. Unë kam edhe një vit kontratë me Vllazninë dhe kam dëshirë ta respektoj atë. Kështu më bëhet më mirë, por deri më tani askush nuk ka lëvizur për të na thënë se si do të vazhdojmë në këto kushte zgjedhore”.

OFERTAT – “Për etikë nuk po ju tregoj ekipet që janë interesuar për mua, dhe këtë nuk e bëj për presion ndaj askujt. Por një ekip në Kategorinë Superiore dhe një ekip i huaj më kanë bërë oferta, të cilat unë ia kam përcjellë klubit. Dua të qëndroj në Shkodër”.

AGRON KAJA