Aldo Teqja

E kishin piketuar me kohë, Partizani blindon edhe portën

Sport Ekspres — Thu, 04 Jul 2019 18:16:55 +0000

Partizani ka përforcuar repartin e portës duke siguruar shërbimet e Aldo Teqes. “Gardiani” është prezantuar ditën e sotme në ambientet e klubit të kuq. Interesi i Partizanit për ish-portierin e Skënderbeut ka qenë i hershëm (LEXO KËTU) me kontaktet që filluan para përfundimit të sezonit të kaluar.

24-vjeçari është një produkt i akademisë së Dinamos, ndërsa në tri sezonet e mëparshme ka qenë pjesë e Skënderbeut. Në “CV”-në e portierit janë dhe tri vite në Qipro ku luajtii në dy ekipe. Kontrata e Teqes me kampionët e Superligës është e vlefshme për një sezon.

Konkurrenca te Skënderbeu dhe kriza e Tiranës, flet Dajsinani

Sport Ekspres — Tue, 30 Apr 2019 18:50:09 +0000

Portieri kavajas Mario Dajsinani ka marrë prej disa kohësh “çelësat” e portës te Skënderbeu. Në një intervistë për “RTSH SPORT”, gardiani flet mbi konkurrencën me kolegun Aldo Teqja dhe përballjen e së shtunës kundër Tiranës në “Selman Stërmasi”.

KONKURRENCA ME TEQEN – “Të them të drejtën konkurrenca të bën mirë, pasi të përmirëson. Raporti im është shumë i mirë. Njësoj siç ishte përpara kur isha në stol dhe ai në formacion”

PËRBALLJA ME TIRANËN – “Shpresojmë që dalim me tri pikët në atë takim. Besim kemi, pasi dhe Tirana nuk po kalon një moment të mirë”.

Ekskluzive: Partizani nis merkaton, zbulohet objektivi i parë

Sport Ekspres — Thu, 11 Apr 2019 14:24:25 +0000

Orges Shehi ishte i bindur për cilësitë e tij dhe vjet e deklaronte me të madhe se korçarët e kanë portierin. Zëra të shumtë lidhnin Gentian Selmanin për një kalim te Skënderbeu, por durrsaku votëbesoi portierin Aldo Teqja. Dhe në fakt “gardiani” e shleu besimin e Shehit, i cili në fillim të sezonit u gradua trajner te bardhekuqtë.

Teqja luajti në të gjitha ndeshjet e pjesës së parë të sezonit, ndërkohë që gjithçka ndryshoi pas përballjes me Kastriotin në kampionat. Nga ai takim është preferuar Dajsinani, por kjo nuk e ka penalizuar 23-vjeçarin. Për të së fundmi ka pasur interesim, madje të Partizanit kryesues të kampionatit.

Sigurisht në kampin e kuq janë të kujdesshëm dhe nuk kanë kontaktuar drejtpërdrejt me lojtarin. Burime të SportEkspres.com bëjnë me dije se ata e kanë përçuar interesimin e tyre dhe në verë mund të vijë edhe e zeza mbi të bardhë. Skënderbeu ndërkohë nuk e pengon dot, pasi Teqes i përfundon kontrata në fund të kampionatit.

Duke parë që në Korçë nuk po luan, edhe qëndrimi nuk është se ka shumë kuptim. Nga ana tjetër Partizani sheh te Teqja pasardhësin e Alban Hoxhës. Kapiteni ka pasur shpesh probleme fizike këtë sezon, ndërkohë që i është dashur të sakrifikojë. Dashamir Xhika duket se nuk ngroh më dhe kështu në kampin e kuq mendojnë për të tashmen dhe të ardhmen.

Nëse shikohet tregu, nuk është se ka shumë alternativa. Tjetra, që është edhe më e rëndësishme, Teqja e ka dëshmuar se mund të bëjë mirë. Sfidat e luajtura në kampionat me korçarët kanë treguar vlerat e tij. Trajneri Skënder Gega nga ana tjetër e njeh portierin mirë, pasi ka punuar me të në të shkuarën te Shqipëria U21. Në verë mund të punojnë sërish së bashku.

VLADIMIR PRENGA

Gjysma e formacionit e blerë, zbuloni sa ka shpenzuar Skënderbeu

Sport Ekspres — Sat, 13 Oct 2018 09:33:06 +0000

Skënderbeu është një nga klubet që gjatë këtyre viteve shpesh është “studiuar” si rast më vete. Korçarët kanë arritur të dalin shtatë herë kampion në tetë sezonet e fundit, kanë shitur lojtarë dhe kanë arritur të përfitojnë deri në 1 milion euro.

Por veçse kanë shitur, korçarët edhe kanë bërë lëvizje në hyrje. Ata kanë blerë nga brenda dhe jashtë vendit. Më së shumti në klubet shqiptare dhe janë disa futbollistët që kanë veshur fanellën bardhëkuqe pasi është paguar për kartonin e tyre.

Në Skënderbeun e këtij viti bien në sy pesë lojtarë për të cilët janë paguar në total 270 mijë euro. Portieri Aldo Teqja la Qipron dhe iu bashkua Kukësit verën e shkuar, por nuk qëndroi te verilindorët. Skënderbeu pagoi për të 15 mijë euro dhe e transferoi.

Treshja e sulmit është e gjitha e blerë. Blerim Krasniqi janarin e shkuar u ble nga bardhekuqtë. 15 mijë euro të paguara nga Apolonia. Kishte edhe gjashtë muaj kontratë, por për të interesoheshin disa klube dhe Skënderbeu nuk ngurroi të paguante.

Gripshi gjithashtu u mor te Teuta për shumën e 60 mijë eurove. Për anësorin durrsakët kanë ende një pjesë të kartonit. Dejvi Bregu është ai për të cilin është shpenzuar më tepër. Që vjet në janar u paguan 150 mijë euro te Luftëtari për kartonin e tij.

Veç këtyre lojtarëve, është paguar edhe për kartonin e Benejam Demte. I kthyer në një “mollë sherri”, pasi u stërvit fillimisht me Kukësin, etiopiani firmosi për Skënderbeun. Më parë ai ka qenë pjesë e CBE SA, ndërkohë që burime të “SportEkspres.com” bëjnë me dije se korçarët për kartonin e tij kanë paguar rreth 30 mijë euro.

VLADIMIR PRENGA