Albpetroli

Demiraj: FSHF shpiku formulë të çuditshme, jemi në ajër!

Sport Ekspres — Wed, 12 Jun 2019 12:22:24 +0000

Albpetroli ende po e përjeton keq dështimin për t’u ngjitur në Kategorinë e Parë. Vendi i tretë në kampionat nuk vlejti, pasi FSHF vendosi që vendin e lënë bosh nga Kamza ta zinte njëra prej skuadrave humbëse që luajtën në “play-off”.

Trajneri Elidon Demiraj ende mbetet i habitur për formulën që zgjodhi FSHF-ja. Tekniku fierak, për SportEkspres.com ka deklaruar: “U shpik një formulë e çuditshme nga FSHF-ja dhe u hoqi një mundësi vendeve të treta të luanin në Play-off për Kategorinë e Parë. Kjo situatë sikur na e zhbëri gjithë rrugën tonë.

Tashmë duhet të mendojmë se çfarë do të ndryshojmë që në sezonin tjetër të mos renditemi përsëri në vendin e 3-të. Skuadra është me pushime, ndërkohë që jemi në pritje të rifillimit të përgatitje”. Demiraj flet edhe në lidhje me riorganizimin për sezonin e ardhshëm.

“Në këto momente nuk mund të bëhet fjalë për merkato, edhe pse skuadra e ka të domosdoshme. Albpetroli është nën administrimin e Bashkisë së Patosit dhe kjo situatë politike nuk është e favorshme për futbollin. Jemi si në ajër. Vetëm zgjidhja politike i jep drejtim vazhdimësisë së Albpetrolit”, u shpreh Demiraj.

AGRON KAJA

Prifti paralajmëron Shkumbinin: Vetëm për fitore!

Sport Ekspres — Thu, 09 May 2019 20:33:55 +0000

Albpetroli pret Shkumbinin këtë javë në Patos dhe skuadra e drejtuar nga Elidon Demiraj kërkon maksimumin e pikëve për të ruajtur vendin e tretë në klasifikim. Para këtij takimi është mesfushori Romeo Prifti ai që flet për ndeshjen me peqinasit.

“Kemi barazuar me Shkumbinin fazën e parë, madje nga minuta e 30-të luajtëm me 10 futbollistë. Këtë javë do të jetë ndryshe, sepse synimi ynë është vetëm për fitore. Në këtë sfidë ne luajmë shanset tona për vendin e tretë në grup”, është shprehur për SportEkspres.com Prifti.

Më tej ai flet për rrugëtimin e Albpetrolit: “E nisëm këtë sezon me pretendimin që të ishim kryesues në Grupin B, por skuadra nuk i tregoi plotësisht vlerat e saj. Kryesisht kjo ndodhi në disa ndeshje të fazës së parë. Gjithsesi, pas fitores me Shkumbinin, ne luajmë në Delvinë dhe do të jetë mbyllur gjithçka për synimin tonë, që kemi besim se do ta arrijmë”.

AGRON KAJA

Demiraj: Albpetroli ka nivelin e pretendentëve, shpresojmë deri në fund

Sport Ekspres — Mon, 25 Mar 2019 15:41:07 +0000

Albpetroli i Patosit fitoi në transfertë kundër Gramozit në Ersekë, një ndeshje ku rivaliteti ishte prezent gjatë gjithë takimit. Patosarakët e zgjidhën fitoren në minutën e 88-të të kësaj sfide dhe trajneri i skuadrës patosarake, Elidon Demiraj, deklaron për SportEkspres.com se ky është sinjali i rikthimit të skuadrës në synimet e fillimit të sezonit.

“Në Ersekë ishte një ndeshje e luftuar dhe ne e kërkuam fitoren deri në fundin e saj. Rreth minutës së 40-të u dëmtua një lojtar i Gramozit (Mydini), të cilit ne si ekip i urojmë të rikthehet sa më shpejt në fushë”, shprehet fillimisht Demiraj, i cili në të shkuarën ka qenë edhe në krye të Apolonisë.

“Epërsia jonë tregoi se kemi ende nivelin e një pretendenti në grup, edhe pse dy kryesuesit ndodhen 10 pikë para. Ne do luajmë deri në fund të kampionatit, pasi matematikisht janë edhe 24 pikë në lojë dhe kjo na lejon të shpresojmë”, përfundoi trajneri i Albpetrolit, Elidon Demiraj.

AGRON KAJA

Fitoni miqësoren e penalltive, Demiraj: Prisja më shumë, nuk jam i kënaqur

Sport Ekspres — Thu, 31 Jan 2019 13:55:32 +0000

Dje, skuadra e Patosit që luan në Grupin B të Kategorisë së Dytë, ka luajtur një tjetër ndeshje miqësore, dhe këtë herë ka patur përballë Selenicën që luan në një kategori më poshtë. Një fitore e pastër 2-0 për patosarakët, por e veçanta është se të dy golat u shënuan nga pika e bardhë e penalltisë me autorë Hatia në minutën e 14-të dhe Balla në minutën e 62-të.

Këtë fakt, trajneri Elidon Demiraj i Albpetrolit e shpreh me pakënaqësi teknike të tij, edhe pse në këtë miqësore ka provuar tre futbollistë të rinj. “Në miqësoren me Selenicën aktivizova tre lojtarë të rinj që i mendoj për vazhdimësinë. Por nuk kam mbetur i pakënaqur, sepse prisja më shumë dëshirë e impenjim në lojë, si në fazën mbrojtëse, ashtu edhe në sulm”.

Deri më 17 shkurt që rinis kampionati i Kategorisë së Dytë, Demiraj thekson se ka kohë për të provuar edhe të tjerë të rinj, ndërsa Albpetroli renditet në vendin 4-t në Grupin B, 7 pikë pas Shkumbinit të vendit të parë.

AGRON KAJA

Demiraj tregon dhunën në Peqin: Zoti na ruajt!

Sport Ekspres — Mon, 10 Dec 2018 13:36:40 +0000

Në Kategorinë e Dytë, javë pas jave është bërë si e modës që, dhuna, përleshjet në fushë dhe goditjet ndaj arbitrave, të jenë “menuja” e skuadrave që nga këta elementë kërkojnë të gjejnë rezultatin. Përveç sfidës Delvina-Skrapari, ku futbollistët ngatërruan sportin e boksit me futbollin dhe u përfshinë në sherr masiv në mesin e fushës, edhe në Peqin nuk mungoi dhuna ndaj lojtarëve nga Patosi.

Në deklaratën për SportEkspres.com, trajneri i Albpetrolit, Elidon Demiraj, tregon se në fundin e ndeshjes Shkumbini-Albpetrol 0-0, tifozët peqinas kanë zbritur në fushë dhe kanë dhunuar lojtarët patosarakë. “Pas ndeshjes, kolegu im i Shkumbinit krijoi një polemikë pa vend me një futbollist të Albpetrolit. Në këtë moment, shumë tifozë zbritën nga shkallët dhe hynë në fushë, duke na dhunuar në bankinën tonë”.

Sipas Demirajt, dy janë shkaqet e asaj ndodhie në Peqin. “Së pari ishte trajneri Bano që inicoi një debat të paqenë, e së dyti: nga ai debat u prodhua dhuna e tifozëve. Zoti na ruajt! Një lojtar yni vetëm 17 vjeç, rrezikon shumë dëmtimin e syrit. Siguria nuk reagoi fare në këtë rast, e këtu nuk bëhet fjalë për futboll”, përfundoi tekniku fierak i Albpetrolit.

Demiraj: Ishte një bandë, jo skuadër! Nuk bëhej fjalë për futboll!

Sport Ekspres — Wed, 28 Nov 2018 21:31:08 +0000

Në fundjavën e shkuar, skuadra patosarake u ndesh me Këlcyrën vendase, në kuadrin e javës së 10-të të Kategorisë së Dytë. Këlcyra fitoi me rezultatin minimal 1-0, por sipas trajnerit të Albpetrolit, Elidon Demiraj, atje nuk bëhej fjalë për futboll.

“Në Këlcyrë nuk u luajt futboll. Atje ishte një bandë jo skuadër, që nuk kishte lidhje me futbollin e luajtur, dhe një arbitër i paaftë për ta frenuar atë skandal. Nuk ka ndryshuar asgjë në futbollin tonë, luajmë si 20 vite më parë”, ishte kjo deklarata e Demirajt, i cili këtë ndeshje kërkon që skuadra ta ketë harruar, por si një kujtim që nuk duhet përsëritur.

“Skuadra duhet të shikojë përpara, nuk do të jemi me mendjen te Këlcyra. Me të le të merret FSHF-ja, që e ka futur në garë. Ne po përgatitemi për ndeshjen e radhës me Naftëtarin. Nuk do jetë ndeshje e lehtë, por synimi ynë i vetëm është fitorja”, përfundoi Demiraj fjalën e tij për “SportEkspres.com”. Albpetroli renditet në vendin e 4-t në Grupin B të Kategorisë së Dytë, 7 pikë më pak nga Maliqi kryesues.

Tomori përmbys Albpetrolin, paqe mes Luftëtarit dhe Bylisit

Sport Ekspres — Sat, 13 Oct 2018 14:26:02 +0000

Tomori ka fituar me përmbysje miqësoren me Albpetrolin. Beratasit triumfuan me rezultatin e ngushtë 2-1, ndërkohë që pjesa e parë e takimit nuk prodhoi gola. Miqtë nga Patosi ishin ata që shënuan të parët.

Muhameti shënoi në portën e Tomorit, që më pas u zgjua. Katër minuta më pas beratasit fituan një penallti dhe ekzekutimin e saj e mori mbrojtësit Mujkiç. Boshnjaku u tregua i saktë nga pika e bardhë dhe barazoi shifrat.

Tomori kërkoi edhe golin e fitores dhe e gjeti në minutën e 81-të. Ishte anësori Drabo ai i cili gjeti rrugën e rrjetës dhe përmbysi avantazhin e Albpetrolit. Kështu, me rezultatin 2-1 beratasin fituan dhe tanimë mendojnë për ndeshjen e kampionatit.

Në Gjirokastër ndërkohë u luajt një miqësore mes Luftëtarit vendas dhe Bylisit. Ky takim nuk pati fitues, pasi u mbyll me rezultatin 1-1. Të parët shënuan ballshiotët me anë të sulmuesit Kofi, por bluzinjtë ia dolën të barazojnë me Rapon.

Luftëtari-Bylis 1-1
Shënues: Rapo / Kofi 37’

Tomori-Albpetroli 2-1
Shënues: Mujkiç 70’ (pen.), Drabo 81’ / Muhameti 66’

Albetroli gjen trajner, ka drejtuar edhe në elitë

Sport Ekspres — Mon, 06 Aug 2018 12:21:17 +0000

Marjol Miho u largua me përfundimin e kampionatit nga Albpetroli dhe oferta e bërë nga Apolonia e bindi atë të marrë drejtimin e fierakëve. Në këto kushte në Patos po mendonin gjatë kuaj periudhe për një trajner të ri.

Tashmë e kanë gjetur atë dhe ai është Elidon Demiraj, i cili më parë ka drejtuar skuadrën e Apolonisë, madje edhe në Superiore. Albetroli ka konfirmuar marrëveshjen me trajnerin e ri dhe pritet që të ketë edhe zhvillime të tjera.

Brenda pak ditëve do të ketë afrime cilësore te patosarakët, të cilët do kërkojnë që sivjet të rikthehen në Kategorinë e Parë. Vjet nuk ia dolën dot, pasi u renditën në vendin e tretë. Ishin Elbasani dhe Oriku klubet që u ngjitën një kategori më lart.