Albertini: Donaruma gaboi rëndë, por jo vetëm ai

Sport Ekspres — Tue, 23 Oct 2018 08:56:37 +0000

Demetrio Albertini, ish-mesfushori i Milanit, nuk ka ngurruar të flasë pas derbit që kuqezinjtë humbën kundër Interit. Goli i pësuar është komentuar më së shumti, pasi dalja e Donarumës u konsiderua e gabuar.

Por në fakt nuk ka qenë vetëm faji i portierit te goli: “Është e kotë të justifikohemi, Donaruma gaboi rëndë te goli. Ai kishte humbur pozicionin dhe nuk arriti të rikthehet në vendin e tij. Po nuk gaboi vetëm ai. Edhe mbrojtësi që markonte Ikardin u tregua shumë i butë me të”.

Loja e kuqezinjve la për të dëshiruar, pasi Higuain u izolua nga zikaltrit dhe nuk pati mbështetjen e shokëve të tij të skuadrës. Në këtë mënyrë për të fituar as që bëhej fjalë. Albertini analizon edhe atë që ndodhi me lojën.

“Mendoj se Milani nuk arriti të luajë dhe çoi shumë pak topa drejt Higuainit, i cili mbeti i izoluar në gjysmëfushën e Interit dhe e pati të vështirë të hynte në lojë”, u shpreh ish-mesfushori i kuqezinjve.

Albertini: Milani dhe Montela, llogaritë duhen bërë në fund

Sport Ekspres — Wed, 04 Oct 2017 10:26:26 +0000

Demetrio Albertini, një ndër ikonat e futbollit italian në vitet ’90, ka folur për Corriere della Sera, duke u ndalur te jeta e tij pas futbollit dhe te projektet e tij të reja, por ndërkohë ka folur edhe për Milanin, natyrisht, duke qenë se ngjyrat kuqezi kanë qenë dhe mbeten pjesë e rëndësishme e jetës së tij.

“Milani ka nevojë për durim dhe pak kohë. Edhe në sezonin 1998-99 vinim nga dy sezone shumë të dobëta. Erdhi Zakeroni, nisëm një rrugëtim të ri, luanim me 3 mbrojtës dhe u nisëm me synimin e vetëm që të ktheheshim në Champions League, por pak nga pak u përmirësuam. E fituam kampionatin me një sprint final të jashtëzakonshëm, 7 fitore rresht në fund, sepse nuk u kënaqm me pak, nuk ecëm me idenë “është viti i rindërtimit, nuk ka rëndësi nëse humbasim”. Kishim mentalitet fitues, ai që duhet t’i japë Montela skuadrës”, thotë Albertini.

Në lidhje me kritikat për Montelën, ish-mesfushori i famshëm thotë: Duhet vlerësuar puna e tij, jo thjesht rezultatet. Merkatoja e Milanit? Për të arritur sukses nevojitet merkato e mirë, por nuk mjafton kaq. Interi, për shembull, tani po merr shumë lëvdata, por ka fituar disa ndeshje në minutat e fundit, sepse përndryshe tani nuk do flisnim kështu. Është ende herët për të gjykuar mbi merkaton dhe shpenzimet e Milanit, skuadra është ende kantier i hapur dhe Montela po provon gjëra të reja në çdo ndeshje. Bonuçi? Po paguan ndryshimin: sezonin e shkuar kishte siguri në lojën e skuadrës ku ishte, tani duhet t’i krijojë ai. Shiriti i kapitenit nuk është i parakohshëm, sepse klubi dëshironte t’ia jepte një lojtari që merr përgjegjësi mbi vete, pastaj Bonuçi është titullar,kusht i rëndësishëm për të marrë shiritin”.

Gjithsesi, Albertini kërkon vetëm diçka nga Milani, ashtu si tifozët: “Për të avancuar qetësisht, duhen fitore, pikë. Nuk ka nevojë për justifikime, Milani është klub i madh dhe nuk duhet të ndalet në objektivat e vet, llogaritë bëhen në fund. Nëse vijnë humbje, duhen administruar sa më mirë”.