Madrilenët e nisën mjaft vrullshëm takimin dhe në minutën e 14-të ishte Luka Modriç, i cili shënoi një gol të bukur për të dërguar të tijtë në avantazh.  Pavarësisht rasteve nga të dyja ekipet, fraksioni i parë i takimit u mbyll me avantazhin minimal të “Los Blancos”.

Në pjesën e dytë ekipi i Solarit e shtoi akoma më shumë presionin dhe shënoi tre herë të tjera. Fillimisht ishte mesfushori i talentuar, Markos Lorente, i cili shënoi golin e dytë, ndërsa në minutën e 79-të ishte Sergio Ramos, i cili shënoi me kokë në zhvillimet e një goditje nga këndi. Në fundin e takimit, në të 85-tën kishte vend dhe për një gol të japonezit Shiotani, i cili shënoi golin e nderit për Al Ain. Më pas, në minutat shtesë arabët shënuan një autogol me Nader për të mbyllur gjithçka në 4-1.

Heroi i Al Ain ishte Khalid Eisa, i cili priti një penallti gjatë kohës së rregullt dhe një gjatë goditjeve të penalltive në fund. Gardiani ka rrëfyer një sekret në prononcimin për “AS”, duke shpjeguar se pse Al Ain janë të saktë në goditjen nga pika e penalltive.

Ai po e pret me padurim finalen e madhe kundër Real Madrid (nesër ora 17:30), nuk e njeh aspak fjalën frikë si dhe tregon dy portierët më të mirë sipas mendimit të tij.

SEKRETI DHE BASTET – “Të gjithë lojtarët duan të luajnë në Europë dhe unë nuk jam përjashtim. Më pëlqen të sfidoj miqtë dhe shokët e skuadrës. Çdo ditë vendosim një iPhone si premio për fituesin e goditjeve të penalltive që bëjmë në stërvitje. Unë kam fituar rreth 80% të sfidave ku kam marrë pjesë dhe e kam shtëpinë plot me iPhone. Diçka e tillë na ka ndihmuar të përmirësojmë rendimentin tonë të goditjes së penalltive.”

REALI – “Në fillim të ndeshjes do të kemi të njëjta mundësi për fitore, 50 me 50, pavarësisht pozicionit tonë në renditjen botërore. Futbolli i shpërblen ata që vendosin zemrën në fushë dhe nuk e njohin fjalën e pamundur.”

IDHUJT – “Ka dy portier që mund të bëjnë diferencën në çdo skuadër: IKer Kasijas dhe Xhixhi Bufon. Mendoj se reflekset e bëjnë një portier më të mirë se të tjerët dhe Iker ka qenë gjithmonë më i miri. Një tjetër karakteristikë e rëndësishme është aftësia për të udhëhequr skuadrën dhe karikimi i shokëve të skuadrës. Në këtë aspekt më i miri ka qenë dhe është Xhixhi Bufon.”

Sfida nisi me mjaft ritëm, ku brenda 16 minutave u shënuan plot tre gola. Fillimisht ishin vendasit e Al Ain, të cilët kaluan në avantazh pas vetëm 3 minutash, me golin e shënuar nga Markus Berg, pas një goditje nga këndi. Reagimi i River Plejt ishte i menjëhershëm, ku kolumbiani Borre shënoi dy herë brenda pesë minutave, për të kthyer gjithçka.

Në minutën e 11-të fillimisht sulmuesi kolumbian baraspeshoi gjithçka, ndërsa në minutën e 16-të shënoi golin e dytë personal, pasi u tregua i saktë përballë portierit të Al Ain. Pjesa e parë u mbyll me avantazhin e argjentinasve, teksa në minutat e fundit vendasve iu anullua një gol, pas vëzhgimit në sistemin VAR.

Fraksioni i dytë, nisi po ashtu si i pari, me ritëm dhe me gol. Në minutën e 51-të ishte Rodrigo Kaio, braziliani i Al Ain që barazoi shifrat, pas një goli mjaft të bukur, ku shpalosi të gjitha aftësitë e tija individuale. River Plejt u hodh në sulm përsëri në kërkim të fitores dhe rastin më të mirë e kishte në minutën e 69-të, por Martinez gaboi nga pika e bardhë e penalltisë.

Kështu ekipet e përfunduan sfidën në barazim dhe tashmë ishte radha e kohës shtesë. 15 minutat e para, përfunduan ashtu siç nisën, ku të dyja skuadrat u treguan të kujdesshme për të mos pësuar. Gjithashtu dhe fraksioni i dytë nuk nxorri fitues, kështu që ekipet iu drejtuan “ruletës ruse” të 11-metërshave, për të vendosur finalisten e parë të Botërorit të Klubeve.

Nga goditjet e 11-metërshave lojtarët u treguan pothuajse të gjithë të saktë dhe penalltia që vendosi gjithçka, ishte ajo e fundit. Pikërisht në goditjen e fundit, në serinë e pestë të gjuajtjeve ishte Enzo Perez, i cili gaboi duke u neutralizuar nga portieri Eisa Kalid, i cili u shndërrua në hero.

Përballë kampionëve të Europës do të vendoset Kashima Antlers. Një ekip, që njihet nga Reali i Madridit, pasi dy vite më parë, finalen e Botërorit të Klubeve e diskutuan pikërisht me ekipin japonez. Kampionët e Azisë, kaluan në çerekfinale meksikanët e Guadalahara Çivas, të cilët vinin nën petkun e kampiones së Amerikës Qendrore.

Sfida përfundoi me shifrat 3-2 në favor të japonezëve, të cilët e nisën sfidën në disavantazh, pasi vetëm pas tre minutash lojë ishte Zaldivar, ai që çoi në avantazh ekipin meksikan. Pjesa e parë u mbyll me shifrat 0-1 në favor të ekipit të Çivas, ndërsa në fraksionin e dytë japonezët duket se ishin më të motivuar.

Vetëm katër minuta pas fillimit të 45 minutave të dyta, ishte Nagaki, i cili vuri baraspeshën. Serxhinjo kompletoi përmbysjen në minutën e 69-të, pasi u tregua i saktë nga pika e bardhë. Në minutën e 84-të 19-vjeçari Abe, shënoi një gol mjaft të bukur duke hipotekuar kualifikimin për Kashimën.

Në minutën e 94-të Pulido shënoi për ekipin meksikan, por goli i tij nuk vlejti më shumë se për statistika, pasi Kashima siguroi biletën për të shkuar në gjysëmfinale, ku e pret Reali i Madridit.

Ndërkohë, në ndeshjen tjetër, midis Esperance de Tunis dhe Al Ain, vendasit e drejtuar nga Mamiç, shkatërruan afrikanët, me rezultatin 0-3 dhe kalojnë më tej, ku do të ndeshen me River Plejt. Një ndeshje, që mori drejtim që në çerek orëshin e parë.

Në minutën e 2-të, fillimisht ishte Mohamed Ahmad, i cili shënoi, ndërsa në minutën e 16-të El Shahat, “vrau” takimin, duke dërguar në avantazh të dyfishtë Al Ain. Në pjesën e dytë, Mohamed hipotekoi gjithçka në minutën e 60-të, duke shënuar golin e tretë për vendasit.

Kështu, aventura e kampionëve të Afrikës, Esperance de Tunis, mbyllet këtu, ndërsa kampionët e ligës së Emirateve të Bashkuara, kalojnë më tej, ku tashmë i pret gjysmëfinalja ndaj kampiones së Amerikës së Jugut, River Plejt.

Plot gjashtë gola të shënuara në kohën e rregullt, në një përballje të çmendur. Al Ain, që është dhe ekipi pritës i kompeticionit, njëkohësisht dhe kampion i Emirateve të Bashkuara Arabe priste Team Ëellington, nga Zelanda e Re, kampionen e Oqeanisë. Neo-Zelandezët i surprizuan jo pak kundërshtarët e tyre, të cilët vinin si favoritë, duke i shënuar plot tre gola brenda 44 minutave.

Pikërisht, në minutën e 11-të ishte Barsia, i cili i dha avantazhin Team Ëellington, ndërsa vetëm katër minuta më vonë ishte Klepam, i cili shënoi golin e dytë. Al Ain e shtoi presionin, por në minutën e 44-të Iliç i dha një tjetër goditje, duke trefishuar shifrat. I menjëhershëm ishte reagimi i vendasve, të cilët u zgjuan, duke ngushtuar në 1-3 brenda pak sekondave, me anë të Shiotanit.

Fraksioni i dytë nisi i vrullshëm për Al Ain, ku në minutën e 49-të Dumbia, shënoi golin e dytë për ekipin e Mamiç, për ta çuar ndeshjen në shifrat 2-3. Përpjekjet e Al Ain vijuan dhe rastet ishin të shumta, ku disa minuta përpara fundit goditën dhe shtyllën me anë të Kaios. Gjithsesi, u desh futja në lojë e Markus Berg, i cili u hodh në fushë në minutën e 78-të dhe vetëm pas shtatë minutash në lojë shënoi golin e barazimit, duke çuar peshë tifozët e pranishëm.

Koha e rregullt u mbyll në barazim 3-3, në një sfidë spektakolare dhe skuadrat iu drejtuan kohës shtesë. 30 minutat e shtesës iahin përsëri të barabarta dhe nuk arritën të prodhonin fitues. Për këtë arsye, ekipet iu drejtuan serisë së 11-metërshave për të marrë vesh skuadrën që do të kalonte më tej. Al Ain u tregua më e saktë në dhe mori një kualifikim mjaft të rëndësishëm dhe tashmë do të vihet përballë kampiones së Afrikës, Esperance de Tunis.