akhisarspor

Në Turqi fillojnë spastrimet, Cikalleshi rrezikon prej rregullores

Sport Ekspres — Wed, 22 May 2019 15:43:20 +0000

Sokol Cikalleshi mund të mos jetë pjesë e skuadrës së Akhisarsporit për vitin e ardhshëm. Klubi ku aktivizohet sulmuesi kavajas nuk mundi të qëndronte në Superligën e Turqisë duke u renditur në vendin e fundit të tabelës.

Rënia në divizionin e dytë ka sjellë një mori problemesh për drejtuesit e ekipit turk, që tani i duhet të reduktojnë ndjeshëm numrin e lojtarëve të huaj. Në ndryshim nga Supeliga turke, liga e parë ka një limit për lojtarët e tuaj: Jo më shumë se gjashtë lojtarë të regjistruar për skuadër.

Akhisarspor ka 14 lojtarë të huaj, pra minimumi tetë prej tyre duhet të largohen. Kontrata e Cikalleshit zgjat edhe për dy sezone, por paga e lartë e sulmuesit dhe interesi nga ekipe të tjera mund të shtyjnë drejtuesit që ta lëshojnë 28-vjeçarin.

Gallatasaraj tërbohet në fund, Cikalleshit i shuhet ëndrra

Sport Ekspres — Wed, 15 May 2019 20:06:44 +0000

Finalja e Kupës së Turqisë mes Akhisarsporit dhe Gallatasarajt ishte spektakolare. Sulmuesi kuqezi, Sokol Cikalleshi, u aktivizua vetëm në minutat e fundit, në një ndeshje që ishte shumë e luftuar. Skuadra e Akhisarspori arriti të kalojë e para në avantazh, me Manu që kaloi në epërsi ekipin e tij në minutën e 56’.

Dukej se ekipi i Cikalleshit do të bënte surprizën e madhe, por Gallatasaraj u zgjua në 10 minutat e fundit dhe shënoi tre herë. Fillimisht, Gumus do të shënonte me penallti në minutën e 80’, ndërsa golat nga Feguli (88’) dhe Diagne (90+4’) vulosin dhe rezultatin e kësaj finaleje. Gallatasaj fiton kështu Kupën e Turqisë, por Akhisarspori i Cikalleshit ishte shumë pranë.

Kupa e Turqisë, finale

Akhisarspor – Gallatasaraj 1-3
Manu 56’ / Gumus 80’, Feguli 88’, Diagne 90+4’

Transferimi dhe debutimi me gol, Cikalleshi ka vetëm një pishman

Sport Ekspres — Sun, 20 Jan 2019 09:52:13 +0000

Sokol Cikalleshi debutoi me gol në rikthimin e tij me skuadrën e Akhisarsporit. Sulmuesi firmosi një kontratë për dy vite e gjysme me klubin e Superligës turke, ku shpreson të lërë pas eksperiencën e keqe që kaloi gjatë huazimit 3-mujor te Gëztepe, që u shoqërua me aktivizime të pakta. Në një intervistë për “Supersport”, futbollisti kavajas foli mbi golin ndaj Beshiktashit dhe synimet për të ardhmen.

“Dhashë maksimumin tim sa u futa në fushën e lojës. Jam shumë i lumtur që shënova, por më vjen shumë keq që ekipi humbi. Në të shkuarën pata një eksperiencë shumë të mirë në gjashtë muaj që kam luajtur për Akhisarsporin. Kjo ishte dhe arsyeja përse presidenti i klubit vendosi të sakrifikonte për të më sjellë mua këtu”.

“Dua që t’ua shpërblej drejtuesve besimin e dhënë duke shënuar sa më shumë. Një ndër arsyet që vendosa të vija këtu ishte për të pasur më shumë minuta. Shpresoj që me paraqitjet me Akhisarsporin të më ndihmojnë edhe për kombëtaren”, tha Cikalleshi.

VIDEO | Debutim ëndrrash, Cikalleshi gjen rrjetën me skuadrën e re

Sport Ekspres — Fri, 18 Jan 2019 19:17:57 +0000

Sulmuesi kuqezi, Sokol Cikalleshi është bërë protagonist në takimin e sotëm mes skuadrës së tij, Akhisarspor dhe gjigantëve të Beshiktash. Edhe pse nuk e nisi ndeshjen titullar, Cikalleshit i mjaftoi vetëm pjesa e dytë për të gjetur golin.

Bomberi u aktivizua në minutën e 46’ përballë gjigantit Beshiktash dhe bëri një ndeshje shumë të mirë. Fillimisht, 28-vjeçari gjeti rrjetën që në momentin kur u fut në lojë , por iu anulua për pozicion të parregullt.

Megjithatë, sulmuesi nuk u dorëzua dhe arriti të gjejë rrjetën sërish. Kësaj radhe, goli ishte i rregullt dhe në minutën e 81’, Cikalleshi shënoi golin e vetëm për skuadrën e Akhisarspor.

Turqi, Super Lig

Akhisarspor – Beshiktash 1-3
Cikalleshi 81’ / Tokoz 23’, Gonul 48’, Larin 76’

81′ – Goli i Cikalleshit

63′ – Goli i anuluar