Trajneri aktual i kombëtares së femrave për 17-vjeçare, është i bindur se Shqipëria nuk do të mundet, ndërkohë që sheh optimizëm në kampin kuqezi. “I kam ndjekur përgatitjet e kombëtares këto ditë dhe përpos atyre çka flasin e shkruajnë mediat në Shqipëri, shoh optimizëm e përkushtim”, thotë fillimisht për SportEkspres.com Kola.

LOJTARËT E GRUMBULLUAR – Më tej ai flet edhe në lidhje me lojtarët e grumbulluar: “Këta janë futbollistët që ne kemi, nuk ka më si më parë që merrnim kosovarë nga e gjithë Europa. Besoj se trajneri Panuçi e ka patur kohën e mundësinë që t’i shikonte të gjithë futbollistët e grumbulluar, ndaj mendoj se për momentin këto ishin mundësitë”.

Ish-sulmuesi ngulmon, duke thënë se këto janë alternativat për kombëtaren tonë: “Në futbollin shqiptar kaq janë mundësitë, të mos rendim pas fjalëve se është edhe X apo Y lojtar që nuk është thirrur. Le të hedhim një vështrim në Kampionatin tonë dhe në Europë, e pastaj të flasim se alternativat e tjera janë më të mira se këto të Panuçit”.

STRAKOSHA – Agustin Kola ka komentuar edhe lënien jashtë të portierit të Lacios: “Thomasi është portier i mirë dhe ka një të ardhme të shkëlqyer, por për këtë rast unë po i referohem babait të tij, Fotos, i cili ka dhënë një deklaratë mjeshtërisht të kulturuar. Në futboll ka një shprehje: Të gjithë të ulin hundën, të jenë korrektë”.

TURQIA DHE KUALIFIKUESET – “Duke qenë se të gjithë futbollistët e grumbulluar janë në aktivitet, mendoj se gjendja e tyre do të jetë e mirë. Mirë do të ishte që të luhej një ndeshje miqësore me kundërshtar të nivelit të Turqisë, apo edhe më lart, por tashmë koha nuk pret. Unë besoj shumë te rezultati pozitiv dhe e them me bindje se Turqia nuk na mund dot në Shkodër. Këtë e mbështes në shumë arsye, por mbi të gjitha në forcën që ka skuadra jonë në startin e çdo eventi ndërkombëtar, sidomos kur luan këtu në Shqipëri. Fitoni edhe për ne”, shprehet Kola, i cili në fund flet edhe për shanset e kualifikimit në Euro 2022.

“Të shpresojmë në kualifikimin tonë, por kjo do të duket pas 3 apo 4 ndeshjeve të para. Në këtë grup eliminator dhe me përbërjen aktuale që ka kombëtarja jonë, mendoj se objektivat duhen parë ndeshje pas ndeshje. Një kualifikim i mundshëm do ishte supersukses, por duhet të jemi me këmbë në tokë”, përfundoi Kola.

AGRON KAJA

Kola, për FSHF TV ka deklaruar: “Kam luajtur për ekipin Kombëtar. Përpara se të filloja sportin kam pasur ëndërr të luaj për Shqipërinë, por gjëja më e bukur për mua është drejtimi dhe stërvitja e lojtareve të ekipit Kombëtar të femrave. Kënaqësia është shumë e madhe, këtu flitet për përfaqësimin e Kombit dhe është një përgjegjësi shumë herë më e madhe se drejtimi në nivel klubesh. Unë jam marrë për shumë vite me futbollin e moshave, e kam ndjekur futbollin e femrave dhe dalloj se që në moshat e vogla ka filluar një masivizim.

Shikoj një dëshirë më të madhe sot te femrat sesa te meshkujt. Po t’i ndjekësh në stërvitje kanë më shumë grintë, janë shumë të dëgjueshme dhe janë më korrekte karshi punës që bëjmë ne trajnerët. Nga seleksionimet e para që kemi zhvilluar, edhe në këtë grumbullim që jemi tani, shikoj goca që kanë dëshirë, ka element me perspektivë, është një ekip i mirë. Është një skuadër me 15 dhe 17-vjeçare dhe duhet të pranoj se më kanë çuditur shumë. Të shikosh vajza të vogla që luajnë me 1 e 2 takime është diçka shumë pozitive. Besoj se me këtë skuadër do të arrijmë diçka të mirë”.

LOJTARET – “Futbollin e kam filluar që në moshën 11 vjeçare dhe ka qenë një eksperiencë shumë e mirë. Për mua është një kënaqësi që jam në Kombëtaren e 17-vjeçareve, e kam ëndërruar të jem këtu dhe po e shijoj këtë eksperiencë. Ëndrra ime? Dua të bëhem një futbolliste e shkëlqyer dhe të jem një sulmuese e madhe, siç është Kristiano Ronaldo në futbollin e meshkujve”, shprehet Denada Avullija, e cila luan për Vllazninë.

Antigona Hyska, vetëm 15 vjeçe, shprehet: “Unë jam Antigoni Hyska, portiere e Apolonisë. Jam 15 vjeçe dhe futbollin e kam filluar që në moshën 12-vjeçare. Unë kam luajtur 4 ndeshje më parë me Kombëtaren përpara këtij grumbullimi për turneun në Maltë. Emocionet janë të mëdha dhe shpresojmë që t’ia dalim me sukses këtë radhë. Ëndrra ime është të vazhdoj të bëj hapa përpara për të pasur një karrierë të mirë dhe dua të bëhem trajnere portieresh për moshat e vogla”.

Agustin Kola është një nga Legjendat e futbollit shqiptar, e në veçanti për Tiranën. Në karrierën e tij rreth 20-vjeçare në futbollin e elitës, Kola ka treguar grintë e nivel, duke lënë emër të madh.  Duke dalë nga “fidanishtja” e Shkëndijës së Tiranës, Agustin Kola më pas ka luajtur me 17 Nëntorin në 14 sezone, me Shkëndijën e Egaleos në Greqi, si dhe në 22 prezenca me Kombëtaren. Më pas ka qenë trajner te Shkumbini, Tirana, Kamza në Superiore, por ka drejtuar edhe të rinjtë e Tiranës dhe Mamurrasin në Kategorinë e Parë.

INTERVISTOI: AGRON KAJA

Agustin Kola do të jetë trajner i Kombëtares së femrave U17, sa i vërtetë është ky lajm?
-Po, është e vërtetë. Ka disa ditë që Presidenti i FSHF-së dhe drejtues të tjerë të saj më kanë afruar drejtimin e skuadrës sonë Kombëtare të femrave deri në 17 vjeç. Unë e quaj vlerësim e respekt dhe do të bëj maksimumin tim për të përgatitur një grup që ti shërbejë së ardhmes.

Pse pikërisht në futbollin e femrave, jeni “divorcuar” nga meshkujt?
-Unë nuk divorcohem asnjëherë me futbollin, pa nënvleftësuar nëse është te meshkujt apo te femrat. Këtu e mendoj veten më të lirshëm e të qetë në punë, sepse edhe vetë mosha e vajzave është e çiltër, në kuptimin e përkushtimit të tyre në fushën e lojës.

Çfarë do synoni në krye të kësaj kombëtareje në vazhdimësi?
-Së pari do më duhet që të bëj një përzgjedhje sa më cilësore, me vajza që e duan lojën e futbollit dhe i përkushtohen atij. Gradualisht do shikoj edhe rezultatet, ndërkohë që pasi të njihem me skuadrën mundet që të jap edhe një mendim më të plotë për situatën aktuale.

Cila është veprimtaria e radhës që ju mundëson edhe njohjen më të drejpërdrejtë me skuadrën?
-Në fillimin e muajit mars do të luajmë me Maltën, por më parë besoj se do të kem një grumbullim ku do të shoh përbërjen aktuale. Gjatë javës së ardhshme do të kem edhe një prezantim me drejtuesit e FSHF-së dhe aty do të përcaktojmë emrat që do të kem në dispozicion.

Po me futbollin e Kategorisë Superiore dhe me Tiranën, e vazhdoni ndjekshmërinë?
-Në fakt, nisur nga angazhimet që kam patur nuk e kam ndjekur shumë Kategorinë Superiore. Gjithsesi nuk kam patur interes shumë për ta ndjekur, pasi më duket sa ka hyrë në mes politika dhe ma ka bërë të vështirë të jem pranë këtij futbolli.

Gjithsesi, si e shikoni barazimin e djeshëm të Tiranës me Teutën?
-Një rezultat të mirë, sepse Teuta është një nga skuadrat më të mira të Kategorisë Superiore. Ka një skuadër solide dhe me lojtarë shumë cilësorë, ndaj barazimi për Tiranën është rezultat normal. Tiranës i duhet vazhdimësi me ndeshje të tilla si me Teutën.