“Duke qenë se e kemi zgjidhur matematikisht gjithçka, motivimi i skuadrës ka qenë kryesori. Më 31 maj shumë futbollistëve titullarë u mbarojnë kontratat me Vllazninë, ndaj me Erzenin kemi menduar që të aktivizojmë lojtarët me më pak minuta. Sigurisht ata elementë që i shërbejnë të ardhmes së kësaj skuadre. Jam këtu me shumë pasion dhe objektivin e arritëm, ndërsa e ardhmja deri në këto momente nuk ka asnjë piketë. Dihet që Vllaznia menaxhohet nga bashkia”, shprehet Canaj.

Për ndeshjen finale me Bylisin, Canaj deklaron: “Çdo trajner ka nostalgji për skuadrat që ka drejtuar. Si profesionist do dëshiroja që Vllaznia të fitojë finalen, që do jetë vendimtare jo vetëm për Kupën, por edhe për përfitimin monetar. Gjendja në aspektin financiar tashmë dihet dhe ato të ardhura do ishin një plus për klubin”.

AGRON KAJA

Për SportEkspres.com, tekniku i Vllaznisë, Agim Canaj, e pret me emocion këtë përballje të veçantë në karrierën e tij si trajner. “Më vjen shumë keq që këto dy emra të mëdhenj, dy ikona në futbollin shqiptar, ndeshen sot si inferiorë, jashtë elitës, ku kanë fituar shumë tituj e trofe. Natyrisht që unë kam emocione për këtë përballje me Dinamon, por duke qenë se historikisht të dyja këto skuadra kanë prodhuar lojë, kështu e mendoj edhe të dielën”.

“Unë kam idenë e disa ndryshimeve në formacion për ndeshjen me Dinamon, pasi kemi disa të dëmtuar. Por duke qenë se ne matematikisht e siguruam ngjitjen në Kategorinë Superiore, po mendojmë për finalen e Kategorisë së Parë, që edhe këtë herë në stolin e Vllaznisë, do të ndeshemi me Bylisin, skuadër që unë e kam drejtuar në karrierën time si trajner”.

AGRON KAJA

Canaj, për SportEkspres.com flet për këtë periudhë që është në krye të Vllaznisë. “Gjeta një skuadër të plotësuar dhe të përgatitur mirë nga kolegu im Hasan Lika. Gjatë këtyre tre javëve në drejtimin e Vllaznisë kam parë edhe problematika, që kanë nevojë për përmirësim”, u shpreh fillimisht trajneri vlonjate, i cili më tej flet edhe në lidhje me aktivizimin e të rinjve në ndeshjet në vazhdim.

“Do të aktivizohen në këto ndeshje të mbetura edhe futbollistë të rinj, por këtu dua të jem i sinqertë. Do të luajnë ata që e meritojnë fanellën e Vllaznisë në fushën e lojës. Nuk do të ketë hapësira për futbollistë që Vllaznisë s’i bëjnë punë për të ardhmen e saj”, shtoi trajneri.

Më tej ai ka komentuar edhe formulën e Kategorisë së Parë. “Kjo është një formulë që evidenton skuadrat e shumë futbollistë, duke i dhënë përparësi masivitetit. Gjithsesi nuk ka cilësi. Kryesisht faza e tretë nuk është shumë efikase, edhe pse evidenton ndonjë element që mund të shikohet edhe nga skuadrat e Superiores”, u shpreh trajneri i Vllaznisë.

E ardhmja te shkodranët është një temë e rëndësishme dhe Canaj shprehet kështu për vazhdimësinë në stolin e kuqebluve: “Kam një marrëveshje xhentëlmenësh. Në vazhdimësi do të shikohet edhe ky hap. Do ju thoja se kam marrëveshje edhe për të ardhmen te Vllaznia”.

AGRON KAJA

Në prezencën e tyre, tekniku ka motivuar skuadrën me premtimin se problematikat do t’u zgjidhen. Ndërkaq, vlonjati nuk ka harruar të tregonte për udhëtimin në Angli, duke theksuar se asnjëherë nuk ka deklaruar dorëheqjen nga Vllaznia.

“Unë gjatë këtyre ditëve kam munguar me leje nga drejtuesit e klubit për të qenë pranë vajzës time në Angli. Sa i takon asaj zhurme të krijuar, mund të konfirmoj se asnjëherë nuk e kam menduar dorehëqjen nga Vllaznia”, ka qenë kjo deklarata e parë e Canajt para skuadrës.

Ndërkohë që nuk ka mbetur pa u prekur  edhe problematika e kërcënimit ndaj tij, duke e zbutur në pakënaqësi. “Ka patur pakënaqësi të ndonjë lojtari për aktivizimin, por unë nuk mund t’i zgjidh të gjitha këto probleme në 10 ditë. Mund ta quani kërcënim, presion apo si të doni, por unë them se është pakënaqësi e ndonjërit prej futbollistëve për minutat e pakta të aktivizimit. Situatat tek Vllaznia ju i njihni mirë, kanë qenë të tilla edhe më përpara, por unë nuk jam prej atyre trajnerëve që me tërheq kush kollaj nga mënga e xhaketës. Tashmë  jemi të fokusuar tek ndeshja e radhës me Erzenin, për ta kaluar me sukses edhe atë”.

Nisur nga ngjarjet e tri ditëve më parë, kur vetë Canaj është kërcënuar nga persona të cilët i kanë bërë presione për lojtarët që duhet të aktivizonte te Vllaznia, ky duket një largim me “lezet’ i vlonjatit. Njëherësh tregon për situatën e nderë që është në Shkodër.

U duk se këtë sezon Vllaznia nuk do të kishte probleme të tilla. Ekipi edhe në fushë i ka dominuar kundërshtarët, por gjithsesi problematikat e së shkuarës nuk kanë munguar dhe drejtuesit duhet që njëherë e mirë t’i japin një zgjidhje. Privatizimi është rrugëdalja e vetme.

AGRON KAJA

Klubi shkodran ka reaguar ditën e sotme dhe konfirmon se Agim Canaj do të vijojë të drejtojë skuadrën, ndërkohë që shqyrtohet akoma ajo që ka ndodhur në stërvitjen e kuqebluve. Deri më tani nuk ka asnjë vendim, apo detaje të tjera.

QËNDRIMI I VLLAZNIZË – Klubi i Futbollit “Vllaznia”, në përgjigje të interesit publik dhe të mediave sqaron sa më poshtë vijon: “Pasi jemi njohur me shqetësimin e ngritur nga stafi teknik ditët e fundit për veprime anti-sportive në ekipin e parë, po e shqyrtojmë me përgjegjësinë e duhur dhe në interesin më të lartë të klubit dhe tifozëve dhe në momentin kur të ketë një vendimmarrje, si gjithmonë, do t’i bëhet e njohur mediave dhe opinionit publik. Po ashtu, sqarojmë se stafi i Klubit të Futbollit “Vllaznia” vazhdon i pandryshuar punën e tij të përditshme për të finalizuar objektivin e ringritjes në Superligë”.

Shkak i këtij anulimi ka qenë presioni i një dite më parë që kanë patur trajneri Agim Canaj dhe Administratori Suad Lici, nga persona jashtë skuadrës. Situata të tilla kanë qenë prezente te trajnerët e Vllaznisë, kur kujtojmë Ernest Gjokën në sezonin e kaluar.

Nga kjo mbledhje, mësohet se tekniku Canaj ka dhënë dorëheqjen nga drejtimi i Vllaznisë, të cilën e mori vetëm një javë më parë. Në këto kushte presioni, ai e ka patur të pamundur vazhdimin e punës në stolin e skuadrës shkodrane, duke e lënë të “ftohtë” këtë stol që kërcënohet vit pas viti. Nga ana e klubi ti është kërkuar të vazhdohet.

Kujtojmë se ditë më parë ka qenë Kryebashkiakja e Shkodrës ajo që i ka kërkuar Kryeministrit Rama, të merren masa nga Policia e Shtetit për parandalimin e rasteve të dhunës e vrasjeve në këtë qytet. Tashmë është radha e “Policia që duam” për ta zbardhur këtë rast, i cili tregon situatën e pa stabilizuar që Shkodra po përjeton prej disa vitesh.

“Jam ndjerë shumë afër me skuadrën, kjo edhe për faktin se 5-6 lojtarë aktualë i kam patur në skuadër edhe kur e kam drejtuar Vllazninë vite më parë. Është normale të kesh emocione të tjera në Kategorinë e Parë dhe ishin ndryshe nga eksperienca e parë”, thotë fillimisht Canaj.

“Më shumë shqetësuese për mua ishte mungesa e tifozerisë, që Vllaznia tradicionalisht e ka patur në nivele të larta”, theksoi trajneri i Vllaznisë, i cili më tej u ndal te ndeshja e fituar me Besëlidhjen. Rezultati të bën të mendosh që ishte një takim i dominuar totalisht nga Vllaznia, por realisht ka qenë ndryshe. Lezhjanët edhe mund të kishin shënuar të parët.

“Në 45 minutat e para, që përfunduan në barazimin 0-0, nuk ishim shumë të qartë në lojën tonë. Kjo bëri që edhe të na mungonte goli. Në pjesën e dytë, me disa lëvizje të vogla taktike, ndryshuam gjithçka dhe shënuam 4 gola”, përfundon Canaj. Vllaznia këtë javë do të jetë pushim, por do ta shfrytëzojë fundjavën duke u përballur në një test me ekipin e dytë.

AGRON KAJA

Duke qenë në një pozicion ndryshe nga herët e tjera që ka drejtuar Vllazninë, Canaj këtë ua ka komunikuar edhe futbollistëve në takimin e parë me skuadrën. “Për mua ky është një moment ndryshe nga herët e tjera kur kam qenë te Vllaznia, por tani na duhet që ta çojmë më përpara punën që është bërë nën drejtimin e kolegut tim Hasan Lika. E vlerësoj dhe e respektoj në maksimum kontributin e tij, por detyra jonë është që ta çojmë edhe më përpara kontributin e tij. Vllaznia është emër i madh dhe duhet ta çojmë aty ku i takon”.

Ndërsa për projektin e tij te Vllaznia, Agim Canaj deklaron se marrëveshja është deri në fundin e këtij sezoni. “Do ta shpresoja një projekt afatgjatë me Vllazninë, por marrëveshja ime aktuale është për deri në mbyllje të këtij sezoni. Më pas do ta shohim edhe mundësinë për vazhdimin e bashkëpunimit për sezonin tjetër”, tha Agim Canaj.

AGRON KAJA

NJOFTIMI I KLUBIT SHKODRAN – “KF Vllaznia bën të ditur se në vendin e Hasan Likës, emëron në postin e trajnerit të ekipit të parë të Vllaznisë, z.Agim Canaj. Eksperienca e tij e madhe në futbollin shqiptar, fakti që e njeh mjaft mirë Vllazninë dhe futbollin shkodran ngaqë e ka drejtuar edhe më përpara atë dhe po ashtu edhe dëshira e shprehur për t’u rikthyer sërish në krye të ekipit tonë, janë konsideruar elementë shumë të favorshëm për ta emëruar z.Canaj në këtë detyrë duke besuar se ai dhe skuadra do ta çojnë deri në fund punën e nisur nga trajneri i mëparshëm, për arritjen e objektivit që ajo ka.

KF Vllaznia bën të ditur se marrëveshja me Agim Canajn do të jetë fillimisht deri në fund të këtij sezoni, por më pas, bashkëpunimi mund të vazhdojë edhe për sezonin e ardhshëm. KF Vllaznia i uron mirëseardhjen z.Canaj duke shpresuar që së bashku të bëjmë gjëra të mirë për skuadrën dhe klubin tonë”, shkruhet në komunikatën e klubit kuqeblu.

Në intervistën e dhënë për SportEkspres.com, skemën aktuale të Kategorisë së Parë ai e quan të dështuar. Në “lupën” e tij kalon edhe Dinamo, ish-skuadra e tij si lojtar dhe trajner. Canaj duket optimist për të ardhmen e bluve, që edhe sezonin e ardhshëm do të jenë të detyruar të garojnë në të Parën.

INTERVISTOI: AGRON KAJA

Si një ish-lojtar dhe trajner i Dinamos, e keni të lehtë të flisni për këtë skuadër që sot garon në Kategorinë e Parë?
– Është një realitet që duhet pranuar, pasi sot Dinamo po kalon një periudhë shumë të errët në historinë e saj. Duke qenë pjesë e Dinamos në një periudhë të artë me shumë tituj e trofe të fituar, jam shumë optimist se gjendja do të ndryshojë për mirë.

Pasi siguroi zonën Play-off, Dinamo duket se më shumë rëndësi po i jep elementëve të rinj?
-Është e natyrshme, që me këtë formulë të veprohet kështu. Sikurse Dinamo, edhe pjesa më e madhe e skuadrave të tjera nuk kanë asnjë motiv në fazën e tretë. Te Dinamo tradicionalisht ka patur elementë të rinj dhe besoj se këta sot do të jenë garanci për ngjitjen në Superiore.

Mediatikisht është mësuar se Dinamo do të shitet dhe këtë verë të ketë të tjerë pronarë, është kjo një erë e re për këtë klub?
-Unë sot po e dëgjoj këtë lajm, por edhe nëse ndodh, ata që do ta blejnë duhet që ta nxjerrin Dinamon nga ky “tunel errësire”. Shpresoj shumë për një ndryshim dhe unë më shumë nisem nga paraqitja e saj këtë sezon të Kategorisë së Parë.

Kategoria e Parë rinis më 30 mars, me ndeshjet e javës së 21-të. Cilat janë sfidat më delikate?
-Në lojë janë vetëm ekstremet e të dyja grupeve, sepse shumë skuadra kanë dalë nga objektivat. Një fitore e Vllaznisë me Besëlidhjen e çon më të sigurt në Superiore, ndërsa Bylisi e Besa vetëm në përballjen mes tyre do të tregojnë cila prej tyre do të ngjitet në elitë.

Nisur nga rezultatet e arritura në dy javët e para të fazës së tretë, mos është një formulë që duhet ndryshuar?
-Unë e përmenda më sipër formulën e Kategorisë së Parë, që  sot duket e dështuar. Asgjë të mirë nuk i ka dhënë futbollit të kësaj kategorie, ku luajnë skuadra me traditë si Vllaznia, Dinamo, Besa, Apolonia, Tomori, Besëlidhja, Burreli e Pogradeci.

Për SportEkspres.com, Canaj e veçon fitoren e Partizanit ndaj Skënderbeut, e në veçanti trajnerin Gega për përshtatjen që u ka bërë futbollistëve në fushë, ndërsa për dy rezultatet e thella: Luftëtari-Kastrioti 1-5 dhe Tirana-Kamza 4-1, isht-tekniku thekson se ka disa faktorë që ndikojnë negativisht.

INTERVISTOI: AGRON KAJA

Në pesë ndeshjet e javës së 19-të, çfarë u pa ndryshe nga 18 ndeshjet e luajtura në dy fazat e para?
-Mendoj se në ndeshjet e javës së 19-të nuk pamë ndonjë ndryshim të madh në raport me 90 ndeshjet që janë luajtur në dy fazat e para. Nisur nga rezultatet, por edhe nga loja në tërësi, duket një garë shumë e luftuar dhe skuadrat po tregojnë se nuk kanë shumë diferenca mes tyre.

Cilën ndeshje e veçoni si më të mirën e kësaj jave, jo vetëm nga rezultati?
-Natyrisht atë që u luajt në Korçë, Skënderbeu-Partizani 0-1. Sepse në këtë ndeshje ishin prezente në fushën e lojës të gjithë elementët e një sfide mes skuadrave të mëdha. Kjo ishte një fitore ndaj kampiones në fuqi, si dhe për faktin se Skënderbeu vinte pas disa humbjeve resht.

Fitorja e Partizanit në Korçë, e konsolidon më shumë kreun nga “Demat e kuq”?
-Partizani tregoi se di të menaxhojë ndeshje të vështirësisë së lartë dhe me këtë fitore e rikuperioi shumë anën psikologjike. Dua të veçoj këtu inteligjencën teknike të trajnerit Skënder Gega, i cili ka ditur ti përshtatë vlerat e futbollistëve në fushën e lojës. Ky është detaj pozitiv për Partizanin.

Dy skuadrat e vendeve të fundit, Kamza e Luftëtari janë “dendur” në gola, priteshin këto rezultate?
-Te Tirana e prisja fitoren ndaj Kamzës, por jo me atë rezultat të thellë, dhe këtu mendoj se ndikoi dalja nga loja me karton të kuq i një futbollisti të Kamzës, dhe gabimet e saj në mbrojtje. Te Luftëtari ka disa faktorë që ndikojnë negativisht, duket një ekip pa moral dhe pa forcë.

Me humbjet që pësuan Skënderbeu e Luftëtari, mund të themi se ka patur tolerime?
-Unë nuk i besoj si të tilla këto humbje, sepse në futboll po shohim rezultatet shumë më të çuditshme dhe nuk ka aludime. Këtu në Shqipëri është ndryshe, kur ka rezultate të tilla si në Gjirokastër e në Tiranë, menjëherë kalohet në ekstrem. Duhen prova, jo aludime mediatike.

Java e 20-të është e shtrirë në tri ditë, sa shërben një kalendar i tillë?
-Në Kategorinë Superiore kështu është vepruar në kalendar. Kjo shtrirje në tri ditë ka disa arsye, dhe të parën mendoj se është e drejta televizive, e cila bën mirë për shikueshmërinë. Një garë më e mirë do të ishte që ndeshjet të luheshin në dy ditë, sepse jemi në fazën e tretë.

Cilën nga ndeshjet e kësaj jave e veçoni si më të fortën, apo edhe më interesanten?
-Në tërësi, kalendari i javës së 20-të ka ndeshje interesante, por me e fortë do të jetë ajo mes Tiranës e Teutës. Bardheblutë vijnë pas fitores me Kamzën dhe kanë moral të lartë, durrsakët vijnë pas barazimit me Flamurtarin dhe do kërkojnë pikë. Të tjerat janë normale për javën.

Duke preferuar modulin klasik 4-4-2, Canaj veçon si portierin më të mirë shkodranin Armir Grima. “Unë e veçoj Grimën për karakterin e tij në fushë, jetonte në çdo situatë me skuadrën dhe i jepte kurajo e shpresë në çdo sfidë”.

Ndërkohë që për Canajn mbrojtja nga e djathta nisme një futbollist kroat, Dario Bodrusiç, me të cilin ai ka punuar te Dinamo. Ndërkohë në qendër ai vendos Goran Graniç dhe Arian Pishën.  Në të majtë Suad Licin kompleton prapavijën. Një mengjërash tipik, i cili si te Vllaznia, ashtu edhe te Tirana, tregoi nivel në lojën e tij. Për këtë katërshe, Agim Canaj shprehet: “Në këndvështrimin tim teknik, unë të katër këta futbollistë i veçoj si mbrojtësit më të mirë që kanë luajtur në futbollin shqiptar, në skuadrat ku unë kam drejtuar”.

Qendrën e mesfushës dhe krahët e këtij formacioni, Canaj ua beson lojtarëve që kanë lënë gjurmë në futbollin dinamovit në periudhën 2000-2010. Redi Jupi dhe Paulin Dhëmbi janë dy mesfushorët e qendrës, ndërsa në të djathtë serbi Goran Vinçetiç dhe në të majtë të mesfushës vendos Ilir Qorrin, një nga protagonistët e Dinamos në atë periudhë. “Të gjithë këta mesfushorë kanë qenë elegantë, me vizion dhe organizatorë të mirëfilltë në shërbim të skuadrës”.

Në repartin e sulmit nuk mungon kroati Pero Pejiç, i cili ka lënë gjurmë në futbollin shqiptar duke qenë protagonist në çdo ndeshje. Në krah të tij Cana vendos shkodranin Vioresin Sinani, i cili është edhe shënuesi me më shumë gola të shënuar në elitën e futbollit shqiptar. “Të dy këta sulmues janë të njohur për kualitetin në repartin e avancuar. Në periudha të veçanta janë bërë protagonistë në futbollin shqiptar. Të dy sulmues race”.

KARRIERA – Agim Canaj e ka zhvilluar karrierën e tij si futbollist në trekëndëshin Vlorë-Tiranë-Rumani, por hapat e parë në futboll i ka hedhur te Shkëndija e Tiranës në sezonin 1980-1982. I lindur në Vlorë, më 14 korrik 1962, Canaj është një nga trajnerët më shëtitës në Superiore, ndërsa mbetet në histori edhe si tekniku i Gramozit të Ersekës që luajti miqësoren me Realin e Madridit më 20 janar 2010 në stadiumin kombëtar “Qemal Stafa”.

“Kjo ndeshje mbetet një nga kulmet e mia si trajner, madje kujtoj se nuk u luajt deri në fund, pasi  u ndërpre energjia elektrike në stadium për gati 50 minuta”, kështu e kujton Canaj këtë përballje. Si trajner Agim Canaj nuk ka shumë trofe të fituara, përveçse 1 Kupë të Shqipërisë, pa harruar edhe tre sezone si nënkampion me skuadrat që ka drejtuar.

Eksperienca e Canaj në pankinë ka nisur te Dinamo në sezonin 2002-2003 dhe fundit ishte ajo me Bylisin e Ballshit në Kategorinë Superiore. Në futbollin shqiptar ai ka drejtuar ekipe si Shkumbini, Besa, Skënderbeu, Flamurtari, Vllaznia, Gramozi e Bylis. Aktualisht mbetet në prijte të një oferte, ndërkohë që Canaj kontribuon me komentet dhe analizat e tij në median sportive shqiptare, së fundmi në rubrikën “Sport News Plus” në televizionin News24.

IDEUAN DHE PËRGATITËN: Vladimir Prenga, Agron Kaja

FSHF ka dhënë tre çmime me titullin “Nderi i futbollit shqiptar” , teksa fillimisht ka qenë ish-portieri i Partizanit Përlat Musta që ka marrë këtë çmim. Pas tij është  ngjitur në podium dhe ish-mesfushori i Kombëtares Edvin Murati, i cili është nderuar me të njëjtën çmim.

Po ashtu është nderuar dhe ish-sulmuesi Qamil Teliti, i cili është ndarë nga jeta. Djali i tij ka qenë sot prezent në këtë mbrëmje për të marrë këtë çmim për babin i tij, i cili ka dhënë kontributin e tij në futbollin shqiptar, por dhe për skuadrën përfaqësuese në vitet 1946-1952.

më pas po tre figura të sportit janë nderuar me çmimin “Legjenda e futbollit shqiptar”, teksa fillimisht këtë cacim e ka marrë Genc Tomori, ndërsa pas tij edhe Osman Mema ashtu si dhe Agim Canaj.

.

ÇMIMET

“Nderi i futbollit shqiptar” Perlat Musta
“Nderi i futbollit shqiptar” Edvin Murati
“Nderi i futbollit shqiptar” Qamil Teliti (pas vdekjes)

“Legjenda e futbollit shqiptar” Genc Tomori
“Legjenda e futbollit shqiptar” Osman Mema
“Legjenda e futbollit shqiptar” Agim Canaj

Dinamo 18 herë Kampione dhe Vllaznia 9 herë, me 27 titujt që kanë fituar, në këtë sfidë e nisin nga zero, në inferiore. Sepse të dyja “lëngojnë” në kategori inferiore dhe kalendari të dielën në mesditë i ka vendosur në provë, se cila prej tyre është më shumë e “përmalluar” të shkojë në elitë.  Në ndeshjen e fazës së parë në Shkodër, Vllaznia fitoi 2-0 me dopietën e Tafilit, dhe në 11 javë ka grumbulluar 28 pikë. Dinamo ka 7 pikë më pak dhe renditet në vendin e 3-të, dhe e 12-ta i ka thirrur të dyja në këtë test, që për shkodranët ka më shumë aromë Superioreje.

Por, ish-trajneri i të dyja këtyre skuadrave vite më parë, Agim Canaj, sot ka një tjetër këndvështrim, duke mos e nënvleftësuar historinë. “Në fakt, janë dy skuadra të mëdha në elitën tonë, që fatkeqësisht janë në kategori inferiore, për shumë arsye. Ndodhin të tilla çudira, por që në këtë hapësirë shkodranët janë më të pasur në historinë e tyre, ndërsa Dinamo ka më shumë tituj kampionë të fituar”, kështu theksoi për Sportekspres.com Agim Canaj, ish-trajner i Dinamos e Vllaznisë.

Për ndeshjen e ditës së diel si favorite veçon skuadrën shkodrane. “Unë e kam parë edhe ndeshjen e fazës së parë mes tyre ku Vllaznia fitoi me meritë 2-0. Atëhere Dinamo ishte në konsolidim e sipër, ndërsa sot ka një frymë të re dhe një ambient optimist. Kjo situatë e bën edhe më të vështirë sfidën, njëherësh edhe parashikimin tim, ndaj them se cilido që të jetë rezultati, të dyja janë të denja që të ngjitën në Superiore”.