INTERVISTOI: AGRON KAJA

Si i përshkruani rezultatet e javës së 28-të të Superiores?
-Deri diku, mendoj se të gjitha rezultatet ishin të pritshme. Përjashtoj fitoren e Flamurtarit me Teutën, që më shumë shikohej për një barazim. Partizani pritej që të fitonte, nuk mund të bënte hap fals si në Kupë. Ndërsa Kastriotin e prisja me atë grintë.

Ku mendonit se mund të kishte ndonjë rezultat ndryshe në këtë javë?
-Në ndeshjen Laçi-Kukësi nuk pritej fitorja e kuksianëve, sepse Laçi vinte pas një fitore të thellë ndaj Teutës e në stol ka një trajner ekspert. Edhe këtu më shumë pritej një barazim, ndërsa rezultatet e tjera ishin gati të lexueshme.

Me këtë fitore të pastër ndaj Skënderbeut, e prek Partizani titullin kampion me njërën dorë?
-Unë mendoj se me këtë fitore Partizani e ka arritur titullin kampion, por vetëm me njërën dorë. Janë edhe 8 ndeshje me 24 pikë dhe gjithçka është në lojë. Por, java e 29-të i jep një frymëmarrje Partizanit, pasi e ka pushim dhe ka mundësi të rikuperojë të dëmtuarit.

Si e shikoni luftën në fundin e renditjes mes Luftëtarit, Tiranës e Kastriotit?
– Të tria këto skuadra janë të rrezikuara për të zbritur në Kategorinë e Parë. Luftëtarin e Kastriotin i shoh më shumë aktivë dhe me grintë në lojën e tyre, ndërsa Tirana duket sikur e ka të siguruar mbijetesën. Por rrezikun mendoj se e ka shumë pranë.

Java e 29-të luhet e gjitha të dielën, cilën do ta veçoni si kryendeshje?
-Të gjitha janë ndeshje të forta, sepse jemi në një fazë ku të gjitha skuadrat kërkojnë të arrijnë synimet e tyre. Mendoj se Kukësi fiton ndaj Flamurtarit, e po kështu Luftëtari ndaj Laçit. Skënderbeu-Kastrioti dhe Teuta-Tirana i mendoj për barazim. Nuk do ketë shumë lëvizje në renditje.

Nisja e pjesës së dytë të sezonit me ndeshjet e Kupës së Shqipërisë, për ish-mbrojtësin e djathtë kuqezi, ky është një start i ri që do të flasë pozitivisht për skuadrat. “Do të ketë ndikim pozitiv për skuadrat. Është një mundësi që të aktivizohen lojtarët e rinj, ata lojtarë që kanë pak minuta nga dy fazat e para, por edhe ata futbollistë që mund të afrohen në merkato”, theksoi në deklarimin e tij Afrim Tole.

INTERVISTOI: AGRON KAJA

Në krahasim me sezonin e kaluar, ku mendoni se ka ndryshuar Kategoria Superiore në 18 javët e këtij sezoni?
-Mendoj se më evident është rivaliteti i ekipeve që nuk ishin menduar në këto situata kryesimi. Këtu më shumë kam parasysh Teutën e Durrësit. Njëherësh, ndryshim është edhe fakti se ky kryesim i Partizanit më shumë po tregon se është viti i tij, ndryshe nga sezonet e kaluara.

Si e përshkruani situatën e Kategorisë Superiore, duke ju referuar vetëm renditjes në 18 javë?
-Renditja mendoj se është e saktë dhe skuadrat ndodhen në vendet që i kanë merituar, e këtu e kam fjalën për të dy anët e tabelës. Nëse vazhdohet kështu, Kukësi dhe Teuta do të jenë rivalë me Partizanin për kreun, ndërsa në fundin e renditjes më të rrezikuar shikoj Kastriotin.

Në dy fazat e para kishte elementë të dhunës nga tifozët dhe shumë ndëshkime për ta, si kanë ndikuar këto në lojën e skuadrave?
-Një ndeshje luhet për tifozët dhe ky është një nga drejtimet e misionit të futbollit. Por menaxhimi i tyre ka qenë shumë i dobët, kryesisht nga klubet ku ka patur problematika me ta. Në vazhdimësi duhet të merren masa paraprake, që të mos ketë dënime kolektive të tifozerisë.

Si ka ndikuar performanca e arbitrave në ecurinë e garës së Superiores në 18 javët e luajtura?
-Në 90 ndeshjet që janë luajtur, mund të them se kemi patur 90 arbitrime të ndryshme. Ka gjykime të mira e normale, por ka patur edhe gabime, për të cilët duhet parë më shumë se sa me justifikimin se janë “njerëzore”. Arbitrat duhet të kenë më shumë stabilitet në gjykimet e tyre.

Në këtë periudhë pa aktivitet zyrtar, si mendoni se duhet të veprojnë drejtuesit e trajnerët me skuadrat?
-Kjo është një kohë e limituar, që të kushtëzon një program shumë të detajuar. Çdo ekip ka nevojë për merkato, por nuk duhet të shohim dështime si në sezonet e kaluara. Vetë ata dhe koha në futboll kërkojnë merkato me lojtarë cilësorë, jo me “qoka” që ngrohin stolin.

Gjysma e dytë e këtij sezoni nis me Kupën e Shqipërisë, si e mendoni këtë ndryshim kalendari?
-Nisja e gjysmës së dytë të sezonit me ndeshjet e Kupës së Shqipërisë, besoj se do të ketë ndikim pozitiv për skuadrat. Është një mundësi që të aktivizohen lojtarët e rinj, ata lojtarë që kanë pak minuta nga dy fazat e para, por edhe ata futbollistë që mund të afrohen në merkaton e janarit.

Si e parashikoni ecurinë në garës në gjysmën e dytë të këtij sezoni?
-Do të jetë një garë shumë e vështirë për të gjitha skuadrat e Superiores. Historikisht, rivaliteti ka qenë evident te të gjitha skuadrat, kryesisht në krye dhe në fundin e renditjes. Ndërsa për mesin e tabelës do të thoja se aty ka patur skuadra që kanë dalë jashtë arritjes së objektivave të tyre.