“Janë përsëritur po të njëjtat gabime si para dy vitesh. Shpresoja se do ndryshonte diçka nga eksperienca që patëm atëherë, por me sa duket në bazë të rezultateve është po e njëjta gjë. Unë besoj se profesor Mema ka bërë punë të mirë nga ana stërvitore me ekipin, sepse e njoh që kur kemi qenë tek ekipi i Skënderbeut bashkë”, thotë Taku në një intervistë të dhënë në Klan Plus në emisionin “Sport Plus”

Më tej ai shton: “Problemi te Tirana është se ka ndërhyrje nga individë të ndryshëm brenda klubit. Një minus shumë i madh është edhe situata me tifozët, që vazhdon të jete e acaruar. Mungesa e mbështetjes ndikon tek ekipi. Mendoj se tifozët janë pjesa kryesore e ekipit”. A ka zgjidhje? Sigurisht që po.

“Zgjidhja më e mirë sipas meje është bashkimi i shumë donatorëve te Tirana. Halili ka dhënë dhe po jep financat e familjes së tij për Tiranen dhe për këtë duhet ta falënderojnë. Mendoj se ka ardhur momenti që të afrohen sa më shumë donatorë që i duan të mirën Tiranës”, shtoi Taku.

PARTIZANI –  Edhe pse larg, mesfushori e ka ndjekur kampionatin tonë. Partizani mori një titull të merituar, por ka diçka që Takut nuk i ka pëlqyer: “Kategorinë Superiore e kam ndjekur pothuajse rregullisht. E uroj Partizanin për titullin kampion edhe pse nuk më pëlqeu fare që e vulosi në derbi, por e kanë merituar këtë sezon. Mendoj që para dy vitesh kanë pasur ekip shumë herë më të mirë, por në atë kohë ka qenë konkurrenca më e lartë. Këtë vit ata kanë ditur të menaxhojnë në mënyrën më të mirë grupin dhe i kanë marrë ekipit më të mirën. Mendoj që si profesor Skënder Gega si trajner, ashtu dhe Olsi Rama si drejtor teknik, meritojnë titullin trajneri dhe drejtori i vitit”.

SKUADRA E TJERA – “Për ekipet e tjera mendoj që Skënderbeu e nisi mirë, por gjatë rrugës vuajti shumë mungesën e eksperiencës. Në momentin që humbën 1 apo 2 ndeshje e kishin të vështirë të dilnin nga situata. Teuta e nisi mire fazën e parë, por nuk e di çfarë ndodhi në fazën e dytë dhe lanë shumë pikë. Gjithsesi, në qoftë se Teuta arrin Kupat e Europës, atëherë quhet sezon i suksesshëm.

Flamurtarit mendoj se duhet t’i jepet një medalje e veçantë për sakrificën e bërë gjithë këto muaj pa u paguar. Rezultatet kanë qenë shumë të mira. Meritën kryesore e ka profesor Ilir Daja, i cili për mendimin tim është një nga trajnerët më të mirë në Shqipëri. Ai ka ditur ta mbajë ekipin të bashkuar dhe gati për të fituar ndeshjet.

Kukësi mendoj se ka vuajtur shumë ndryshimet që u bënë me trajnerët dhe lojtarët, por me pjesëmarrjen në Kupat e Europës mendoj se mund ta quajë një sezon të shpëtuar. Laçi është aty si çdo vit, i fortë dhe gati për Kupat e Europës. Kastrioti ka bërë shumë mirë fazën e dytë dhe i ka dhënë emocion kampionatit. Në përgjithësi ka qenë një kampionat i mirë nga mënyra si është zhvilluar”përfundon Taku.

Për afrimin e mesfushorit, ka folur dhe trajneri i skuadrës, Xhim MekGines, i cili tha: “Jemi me fat që kemi gjetur një lojtar si Taku. Tek ai shohim një futbollist që mund të luajë në shumë role dhe që do t’i shërbejë shumë skuadrës. Di të luajë në qendër dhe në krahët e sulmit, ku unë mendoj se do të jetë më i rrezikshëm dhe do të shënojë më shumë gola”.

Taku në Shqipëri ka mbajtur të veshur fanellën e Tiranës dhe Skënderbeut, duke qenë një nga lojtarët më të mirë në Superiore. Sezonin e shkuar, 29-vjeçari ishte pjesë e Tampa Bej në kategorinë e dytë amerikane (USL) dhe duke e njohur mirë këtë kampionat, pritet të shkëlqeje edhe te skuadra e Sharlot.

“Fillimi ishte pak i vështirë, pasi duhet të kuptohesh edhe pse e flas gjuhën mirë. Duhen kuptuar termat e trajningut, për çfarë specifikisht ata flasin. Ndeshjet e para nuk luajta, pasi kisha disa kohë pushim. Kemi bërë lojëra të mirë”.

RIKTHIMI NË SHQIPËRI – Taku dëshiron të luajë sa më shumë në Amerikë dhe nuk e fsheh diçka të tillë: “Nuk mund të them se e kam mbyllur derën me futbollin shqiptar. Dua ta vazhdoja atje ku jam tani, në Amerikë. Ndoshta te Tampa Bej, ose në ndonjë ekip tjetër. Bardheblutë? Tirana është shtëpia ime, jam rritur dhe njohur si lojtar. I jam borxhli, edhe sa i takon tifozëve. Nuk mund të them asgjë më shumë”.

NDRYSHIMET – “Problemi më i madh janë lëvizjet që bëhen. Ka rrugëtime të gjata që bëhen me avion, ndryshe nga se ndodh në Europë. Ky është një nga ndryshimet. Cilësia është e njëjtë, pavarësisht stileve të ndryshme të lojës”, shton Taku, kur pyetet mbi ndryshimet e futbollit në SHBA dhe Europë.

DERBI – Përballjet Tirana-Partizani janë të veçanta dhe Taku flet edhe për faktorin që po ndikon në rezultatet negative të bardhebluve në derbi. “Sa i përket derbit, është formuar një psikologji e tillë. Nuk di si ta shpjegoj. Edhe kur isha unë, luanim mirë dhe nuk e di çfarë nuk funksiononte. Tirana luajti mirë ndeshjen e fundit, shënoi dhe nuk e di çfarë ndodhi. U përsërit historia e ndeshjeve të fundit. Do vijë koha që Tirana të fitojë dhe të bëjë në mirë në derbi”.

LARGIMI NGA SKËNDERBEU – “Në Korçë kalova një periudhë shumë të mirë. Ishte eksperiencë fantastike, si në kampionat dhe në Europë. Luajtëm ndeshje të vështirë, në një nivel shumë të lartë. Ishim ritëm tjetër nga skuadrat e tjera të kampionatit. Kishim diferencë të madhe që në dhjetor, ndikoi edhe Europa League. Me klubin kisha rënë dakord që do vonohesha dhe pranuan. I kam lajmëruar për çdo gjë. Kur isha gati të kthehesha, ndodhi situata me UEFA-n. Ata nuk dinin si do shkonin punët dhe kjo ka qenë pak a shumë situata. Isha gati të kthehesha, por me thanë se nuk e di çfarë do bëhej dhe e pranova. Nuk u mbyll çdo gjë 100% mirë, por në njëfarë mënyre ishte me mirëkuptim”.

PANUÇI – “FSHF bëri mirë që e mbajti Panuçin. Një nga arsyet është se ai ka kohë aty dhe e njoh grupin. E dyta mund të ishte edhe financiare. Nëse vinte një trajner tjetër, do humbej 1 vit e gjysmë punë. Duka ka bërë mirë, Sa i takon aktivizimit tim, do punoj fort e do jem i gatshëm. Çdokush është gati sado larg të jetë”.

Taku tregon edhe detaje të tjera: “Luaj në USL në Florida, jam i kënaqur me ekipin dhe klimën atje. Kemi bërë kampionat të mirë. Atje jam aktivizuar si mesfushor i djathtë. Luaja me skemën 3-5-2, çka do të thotë se luaj si mesfushor dhe si mbrojtës”.

Superiorja ndryshon me USL, ndërkohë që Taku thekson se atje luhet më hapur. “Liria është e madhe në fushë, ke hapësira dhe mund ta shijosh më shumë lojën. Në Shqipëri ka më shumë taktikë, ekipet luajnë mbyllur. Kushtet sigurisht janë më të mira”.

Në fund dy fjalë për Tiranën, skuadër për të cilën ai ka ndjenja të forta. Gjithsesi rikthimi aty, apo në Shqipëri, do duhet kohë të ndodhë. “Rikthimi te Tirana? Nga aty kam dalë dhe bëj tifo për atë klub. Rikthimit në Shqipëri asnjëherë nuk i thuhet jo, por jam i përqendruar te karriera ime në Amerikë. Shpresoj të qëndroj atje sa më gjatë”, ka përfunduar Taku.