Aliti gati të transferohet, Fangaj do të “kopjojë” Uzunin

Sport Ekspres — Sun, 13 Jan 2019 14:42:08 +0000

Fidan Aliti është një nga lojtarët kryesorë të Skënderbeut dhe për të a interesim edhe nga jashtë vendit, kryesisht është folur për oferta nga Suedia. Gjithsesi mbrojtësi qendror vijon përgatitjet me korçarët.

Pas miqësore me Bylisin, ai ka folur në Supersport fillimisht për gjendjen në skuadër: “Stërvitjet po kalojnë mirë. Kemi punuar intensivisht, çka është e nevojshme në këtë moment. Na vjen keq për dëmtimet. Uroj që Bregu të kthehet sa më shpejt. Ky është futbolli. Besoj se ata që do e zëvendësojnë do bëjnë maksimumin. Edhe ata kanë cilësitë e tyre.

Më pas Aliti foli edhe për të ardhmen e tij: “Mund të them se jam në kontratë dhe jam i përqendruar këtu. Çdo lojtar ëndërron të luajë jashtë. Edhe për mua është momenti i duhur. Ngjasoj pak me suedezët, por nuk është kjo arsyeja për të ikur atje”.

FANGAJ – Mbrojtësi i djathtë i kurbinasve është kthyer në një nga lojtarët kyç. Shkodrani gjithsesi thekson se duhet të vazhdojë të rritet akoma në lojë. “Duhet të punoj si tani dhe të rris përformcanën time. Ekipi ka shkuar mirë. Besoj se do i arrijmë objektivat në fund të sezonit”, deklaron Fangaj.

Më tej ai shton: “Si çdo vit, kemi krijuar një traditë të shkojmë në Europë ose përmes kampionatit, ose përmes Kupës”. Si çdo i ri do të donte të transferohej jashtë vendit, por edhe të vishte fanellën e kombëtares. Më parë është ftuar nga Shpresat. “Do doje të ndiqje hapat e Uzunit? Pse jo, është ëndrra e çdo futbollisti të luajë me kombëtaren dhe të transferohet jashtë vendit”.

Shkëlqimi i Fangajt, shpërthen Hasani: Zoti i mëshiroftë të padrejtët!

Sport Ekspres — Sun, 16 Dec 2018 10:08:39 +0000

Abdurrahman Fangaj është një nga të rinjtë e shumtë te Laçi. Shkodrani i mbrojtjes këtë sezon ka arritur të shënojë dy gola në kampionat dhe i fundit ishte kundër Tiranës. Një realizim mjaft i bukur, që ka marrë vëmendjen e Alban Hasanit, drejtorit të akademisë së Vllaznisë.

“Fangaj, Zoti i mëshiroftë ato që të bënë padrejtësi”, shkruan ish-qendërmbrojtësi i Vllaznisë, por edhe i Laçit. Hasani e ka shprehur shpesh zhgënjimin për faktin se Vllaznia pat lënë të lirë Fangajn dhe Silvio Zogajn, ky i fundit i rikthyer në Shkodër këtë verë.

SportEkspres.com ka kontaktuar me vetë Hasanin, i cili ka shtuar: “Më vjen keq shumë sepse kam këmbëngulur jashtë mase se si ka mundësi që lojtarë si Fangaj e Zogaj, të dy lojtarë të akademisë Vllaznia e kampion Shqipërie me U17 e me U19, gjithashtu lojtarë të ekipit kombëtar të moshave, të lihen të lirë”.

“Duhet të kemi durim, se nuk mund të pretendohet që në moshën 18-vjeçare të jenë talente të nisim e të themi direkt se nuk bëjnë. Largimi i Fangajt më ka prekur shumë, pasi ka qenë lojtari më shembull i akademisë Vllaznia. Njeri model, që rrallë mund të gjendet sot”.

VLADIMIR PRENGA