2 Korriku

Dështon transferimi në Norvegji, Mazrekaj gjen skuadër në kryeqytet

Sport Ekspres — Tue, 19 Feb 2019 17:40:40 +0000

Mentor Mazrekaj është një emër mjaft i njohur për futbollin shqiptar. Sulmuesi nga Kosova ishte një ndër lojtarët më të mirë të Partizanit të viteve të shkuara, por bashkëpunimi me të kuqtë u mbyll me lojtarin që preferoi të vijonte karrierën në Kosovë.

Muaji janar e gjeti 30-vjeçarin pa ekip, pasi ndërpreu kontratën me Ferizajn. Sulmuesi tentoi të transferohej gjatë kësaj merkatoje në Norvegji te Sandjeford, ekip ky që militon në divizonin e dytë për nga rëndësia në vendin nordik. Megjithatë vonesat në përgatitjen e dokumentacionit për lejen e qëndrimit ka bërë që ky opsion të mos finalizohet.

Në një prononcim për sajtin “Indeksonline.com”, Mazrekaj bëri të ditur se do të luajë me një skuadër të qytetit të Prishtinës, 2 Korrikun, ekip që militon në divizionin e dytë të futbollit kosovar. Kontrata e futbollistit me klubin prishtinas zgjat deri në fund të sezonit aktual.

Kualifikim dramatik për Dritën, edhe Feronikeli e Trepça ’89 në raundin tjetër

Sport Ekspres — Wed, 28 Nov 2018 14:16:19 +0000

Janë mbyllur 3 nga katër ndeshjet e Kupës së Kosovës, në raundin e dytë të këtij kompeticionin. Trepça 89’ ka arritur që të mundë në shtëpi skuadrën e Llapit. Fillimisht ishte Diuara që shënoi vetëm pas 18 minutash lojë, ndërsa për të vulosur kualifikimin mendoi Jashari që dyfishoi pak sekonda para fundit të ndeshjes.

Trepça është mundur në shtëpi nga skuadra e Feronikelit, që dominoi gjatë gjithë lojës. Lladrovci ishte autori i golit të parë. Ish-lojtari i Kukësit goditi saktë me kokë, duke shënuar golin e avantazhit. 5 minuta para fundit të pjesës së parë ishte një tjetër lojtar që ka luajtur në Superligën Shqiptare që gjeti rrugën e rrjetës. Ish-lojtari i Partizanit, Astrit Fazliu, dyfishoi rezultatin. Në të 81-ën ishte Lladrovci që në tentativë për të pastruar zonën e çoi topin në fundin rrjetës së tij, me ndeshjen që u bë mjaft emocionuese në minuta e mbetura.

Drita nuk mundi që në 90 minuta të arrinte të fitonte ndaj ekipit Vitia, duke barazuar në shifrat 1-1. As minuta shtesë nuk prodhuan një fitues dhe ishin 11-metërshat ata që përcaktuan skuadrën që do të kalonte më tej. Skuadra nga Gjilani u tregua më e saktë nga pika e bardhë e penalltisë, duke triumfuar me shifrat 1-3.

Ndeshja mes 2 Korrikut dhe Minatorit nuk u zhvillua pasi ekipi nga Prishtina është i angazhuar në “Kupën Pavarësia” e organizuar nga FSHF me rastin e fetave të nëntorit.

DIGITALB KUPA E KOSOVËS

Trepça ’89 – Llapi 2-0
Shënues: Diuara 18’ Jashari 90+6’

Trepça – Feronikeli 1-2
Shënues: Lladrovci 22’, Fazliu 40’/ Lladrovci 81’ (autogol)

Vitia 1-1 Drita (1-3 me penallti)
Shënues: Fazlija 78’

Minatori – 2 Korriku (e shtyrë)

REZULTATET E NDESHJEVE TË LUAJTURA DJE
Lugu i Baranit – Liria 0-11
Vllaznia P – Besa 1-2
Ferizaj – Vllazëria Zh. 6-2
Fushë Kosova – Onix 3-2
KEK-u – Flamurtari 0-1
Bashkimi – Vëllaznimi 0-4
Sharri – Gjilani 2-2 (2-6 pas shtesave)
Istogu – Ramiz Sadiku 3-1
Drenasi – Ballkani 0-1
Dukagjini – Arbëria 3-1
Kika – Vushtria 2-0
Drenica – Prishtina 0-0 (pas penalltive 4-5)

Kupa Pavarësia, në Korçë feston Struga e Nijas Lenës

Sport Ekspres — Wed, 28 Nov 2018 13:20:12 +0000

Si çdo vit, për festat ë nëntorit, FSHF organizon “Kupën Pavarësia”, ku marrin pjesë 4 ekipe. Skënderbeu, 2 Korriku i Prishtinës, Otrant i Ulqinit dhe Strga nga Maqedonia diskutuan ditën e sotme në Korçë këtë trofe simbolik.

Ka qenë skuadra e Strugës që ka arritur që ta fitojë për të dytin edicion radhazi këtë trofe. Skuadra shqiptare, që luan në ligën e dytë maqedonase ka triumfuar minimalisht në finale me skuadrën e Otrantit nga Ulqini. Finalja u vendos nga një gol në minutën e 8-të të takimit, nga sulmuesi Altin Lloga.

Në gjysmëfinale, skuadra e Strugës mundi Skënderbeun me rezultatin minimal 1-0 me golin e Agon Hajredinit, ndërsa në gjysmëfinalen e dytë ishte Otranti që kaloi në finale vetëm falë 11-metërshave kundër 2 Korrikut.

Mesfushori Nijas Lena (U shpall lojtari i Turneut) dhe Gjergji Muzaka

Kupa Pavarësia, hidhet shorti për gjysmëfinalet

Sport Ekspres — Tue, 27 Nov 2018 20:29:45 +0000

Është bërë traditë që çdo vit, më datën 28 nëntor në vendin tonë të organizohet Kupa Pavarësia. Do të jetë qyteti i Korçës që do të mirëpresë katër skuadra, që do të garojnë për trofeun simbolik.

Pjesëmarrës në këtë garë do të jetë Skënderbeu, 2 Korriku nga Prishtina, Struga nga Maqedonia dhe Otranto nga Mali i Zi. Një organizmin i FSHF-së për festat e nëntorit. Si zakonisht drejtuesit bashkohen një natë para në qytetin ku organizohet ky kompeticion, për të mësuar dhe shortin.

Skënderbeu do të ndeshet me Strugën, ndërsa Otranto do të përballet me 2 korrikun. Kujtojmë që një ndeshje zgjat 45 minuta dhe skuadrat fituese ndeshen në një finale që zgjat po 45 minuta. Ndeshjet do të nisin në orën 11:00 dhe hyrja do të jetë e lirë.

Kupa Pavarësia 2018, mësohen skuadrat pjesëmarrëse

Sport Ekspres — Mon, 19 Nov 2018 12:48:19 +0000

Siç është bërë traditë e përvitshme, FSHF organizon çdo vit Kupën Pavarësia për festat e nëntorit, me skuadra nga Shqipëria, Kosova, Maqedonia dhe Mali i Zi. Edhe këtë vit nuk kishte si të ndodhte ndryshe, teksa FSHF ka publikuar agjendën e këtij eventi.

Ndeshjet do të luhet në Korçë, më datën 27 nëntor dhe përfaqësues nga vendi ynë do të jetë Skënderbeu vendas, ndërsa nga Kosova, 2 Korriku i Prishtinës. Otranto vjen si gjithnjë nga Mali i Zi, ndërsa nga Maqedonia do të zbarkojë Struga.

NJOFTIMI I FSHF-së
“Kupa ‘Pavarësia 2018’, do të zhvillohet në qytetin e Korçës. Federata Shqiptare e Futbollit, organizatorja e këtij turneu mbarëkombëtar, për të dytin vit radhazi ka zgjedhur qytetin verilindor për të zhvilluar këtë aktivitet. Pjesëmarrës do të jenë katër skuadra: Otrant e Ulqinit, Struga nga Maqedonia, 2 Korriku nga Prishtina dhe Skënderbeu i Korçës. Shorti i gjysmëfinaleve do te hidhet me date 27 nëntor. Ndeshjet do të luhen me datë 28 nëntor në aneksin dhe stadiumin ‘Skënderbeu’. Aktiviteti fillon në orën 11.00”.