Xhija: Tirana kërkon titullin kampion!

0

 

“Vitin e kaluar kemi luajtur pesë ndeshje finale me Studentin dhe kemi qenë pranë trofeut. Sivjet jemi po të njëjtën dhe me më shumë eksperiencë e forcë luajmë për të arritur atje ku kemi qëllimin final”

Gjergj Vyshka

Eldo Xhija, organizatori i Tiranës, prej pesë vjetësh prodhon gjithçka që duhet për skuadrën e bardhebluve. Nga duart e tij dalin të gjitha topat që më pas kthehen në pikë nga Ferhati, Rama, Pepa e Kula, Ndoni, Xhabrahimi, apo e gjithë pjesa tjetër e armatës bardheblu, që sot drejtohet nga Ilo Koja. Tirana është në prag të Play-off dhe sot do të jetë përballë Vllaznisë në “Qazim Dervishi”. Për hir të së vërtetës jo vetëm në Tiranë, por dhe në Shkodër, për kampionat, apo dhe për Kupën e Shqipërisë, kuqeblutë e Artan Kalasë kanë fituar me set final. Duket se tashmë është ora e bardhebluve për të vendosur diktatin, sepse siç pranon dhe Xhija në intervistën e tij për “Sport Ekspres” është koha që Tirana të arrijë tek titulli kampion. I ka mbyllur tre fazat e para në vendin e tretë, sepse bardheblutë kanë vlerësuar më tepër pretendentët për titull, por kanë nënvlerësuar atëherë kur nuk duhej. E një fakt i tillë vjen dhe nga dy humbjet me Teutën e vendit të pestë, 3-2. Megjithatë Xhija beson, ndaj e thotë: Sivjet jemi për titull kampion, sepse vitin e kaluar kemi shkuar deri në ndeshjen e pestë finale dhe nuk arritëm

  • Ka përfunduar faza e tretë e kampionatit dhe ju jeni në vendin e tretë. A mund të ishte kjo Tiranë në renditje më lart?
  • Sigurisht që po. Na ka kushtuar shumë pika që kemi lënë me Teutën, sepse të tjerët, apo quajtur ndryshe skuadrat pretendente, ne i kemi mundur. Sikur të kishim marrë ndeshjen me Teutën ne do të ishim në vendin e parë sot.
  • Është interesante, jeni mundur dy herë nga Teuta. Janë kthyer durrsakët në një “mace e zezë” për ju?
  • Është thjesht nënvlerësim. Dhe në një farë mënyre kjo na ka penalizuar gjatë gjithë sezonit. Kemi luajtur në mënyrë fantastike, madje dhe duke i mbivlerësuar skuadra si Studenti dhe Vllaznia, e më pas me të voglat kemi qenë sikur të mos ishim pretendentë.
  • … mirëpo ju jeni mundur edhe nga Farka Volej?
  • Vetëkënaqësi. Janë skuadra të të njëjtit nivel, janë shumë afër me njëra-tjetrën. Edhe të shtunën nëse nuk do të kishim marrë qoftë dhe një pikë me Farka Volejin mund ta kishim humbur dhe vendin e tretë. Por ndodh dhe kështu,
  • Në gjysmëfinalen e Play-off përballë Vllaznisë…
  • Me to kemi katër humbje, një pjesë e të cilave janë me set final. Shpresoj që tashmë gjërat të ndryshojnë. Ne kemi luajtur me ta edhe në Kupën e Shqipërisë në Shkodër, në një aktivitet ku ishin tre skuadra të kryeqytetit përballë Vllaznisë. Dhe nuk e kemi kuptuar pse duhet të shkonte ai aktivitet në Shkodër, sikurse eleminatoret në Elbasan. Megjithatë ndoshta sot fati do të jetë me ne.
  • Kë do të cilësonit ndeshjen më të mirë të kësaj periudhe?
  • Absolutisht fitoren 3-0 me Studentin, atje ku jemi shfaqur me më të mirën tonë si skuadër.
  • Objektivi i Tiranës pas humbjes së Kupës së Shqipërisë?
  • Titulli kampion. Vitin e kaluar kemi qenë në finale dhe pas pesë ndeshjeve të luajtura me Studentin kemi dalë humbës. Sa do t’ia arrijmë le t’ia lëmë fushës së lojës.
  • Vllaznia, Studenti dhe Farka Volej, kë cilësoni si pretendentin më të fortë?
  • Janë të gjitha skuadra të forta dhe të barabarta që duan përqendim dhe forcë për t’i mundur.
  • Sezonin e kaluar e keni mbyllur me Arben Sakon trajner, tani Ilo Koja. Çfarë ka ndryshuar në skuadër?
  • Janë të dy trajnerë shumë të mirë e profesionist. E rëndësishme është që të eci Tirana dhe të arrijë tek trofetë.
  • Ka nisur seleksionimi i kombëtares, pse nuk jeni ju në listë?
  • Unë nuk e di se me çfarë kriteresh e në çfarë baze janë zgjedhur këto lojtarë. Sepse minimalisht që të jesh pjesë e kombëtares duhet të paktën të jesh pesë vjet titullar me një skuadër. Sa për karrierën tim unë 2007-2011 kam qenë tek Studenti. Më pas për tre muaj në sezonin 2011-2012 kam qenë tek Peja, e cila fitoi Kupën e Kosovës. Dhe që nga janari i 2012-ës e deri më tani jam pjesë e Tiranës pa lëvizur asnjë moment nga formacioni. Atëhere…?
You might also like

Leave A Reply

Your email address will not be published.

This site uses Akismet to reduce spam. Learn how your comment data is processed.