Inter po fillon të ketë vazhdimësi këtë fillim sezoni në rezultatet e saj mes Serisë A dhe Champions. Zikaltërit numërojnë plot 6 fitore radhazi mes dy kompeticioneve. Fitorja e fundit e arritur ishte përballë Spal fundjavën që lamë pas teksa njeriu i ndeshjes ishte padyshim Mauro Ikardi, i cili shënoi dy herë.
Sulmuesi argjentinas është përfolur kohët e fundit për një rinovim tjetër me Interin, pasi zikaltërit duan të ndryshojnë klauzolën e kapitenit të tyre, e cila është 110 milionë euro momentalisht, por menaxherja dhe njëkohësisht bashkëshortja e tij, Vanda Nara ka frenuar vrullin e drejtuesve zikaltër me deklaratën e fundit të dhënë për mediat.
“Ikardi ka dhe tre vite të tjera në kontratë, kështu që nuk ka pse të diskutohet pjesa e rinovimit. Unë dhe Ikardi jemi shumë të lumtur dhe shumë të qetë, jeni ju të cilët keni ankth, përderisa më bëni pyetje për rinovimin”, ka thënë Vanda Nara.