Shiriti i kapitenit dhe mosgrumbullimi, Auzilio: Ikardi, nuk ka lidhje rinovimi

Klubi i Interit mori vendimin që t’i hiqte shiritin e kapitenit Mauro Ikardit një ditë më parë. Çështja mori përmasa akoma më të mëdha, teksa argjentinasi vendosi të mos i bashkohej ekipit për transfertën ndaj Rapidit të Vienës në Europa League.

Lidhur me këtë çështje ka folur së fundmi, drejtori i ekipit zikaltër, Pier Auzilio. Ky i fundit ka shpjeguar vendimin e klubit, si dhe ka deklaruar se heqja e shiritit nuk ka të bëjë me negociatat e rinovimit të kontratës së 25-vjeçarit.

“Mund të them vetëm që në seancën e fundit stërvitore ai ishte në listë, ndërsa më pas mori vendimin që të mos ishte pjesë e ekipit. Nuk është se u shkaktua nga ndonjë gjë në veçanti. Gjithçka ndodhi shpejt dhe na duhej të fluturonim drejt Vienës për sfidën.

Problemi qëndronte te roli i tij si kapiten, sjellja e tij dhe qëndrimi që kishte me lojtarët përreth tij. Vendimi për heqjen e shiritit nuk kishte të bënte me bisedimet për rinovimin e kontratës dhe nuk do të lejojmë që kjo çështje të kthehet në problem. Negociatat për rinovimin dhe ajo se çfarë jep Ikardi në fushë janë dy gjëra krejtësisht të ndryshme.”

Leave a Reply

Your email address will not be published. Required fields are marked *