Në fund të vitit të shkuar, konkretisht më 19 dhjetor, Mançester Junajtid vuri në krye të pankinës së saj, Ole Gunar Solskjaer, duke shkarkuar Zhose Murinjon.
Sezoni i “djajve të kuq” deri në dhjetor, ishte gati i gjithi për t’u harruar, pasi ndodheshin më shumë se 10 pikë larg vendit të katërt që të çon në Champions sezonin e ardhshëm. Ardhja e Solskjaer ka shndërruar krejtësisht ekipin e Junajtid, teksa tashmë e shohin veten vetëm 2 pikë më pak se Çelsi i vendit të katërt.
Solskjaer e drejton ekipin prej 10 takimesh, ku ka marrë 9 fitore dhe një barazim. Krahasuar me Zhose Murinjon, tekniku norvegjez është në dominancë të plotë, për sa i përket statistikave. Këtë sezon, me Murinjon në stol, Junajtid numëron një përqindje fitoresh prej 41.2%. Përqindja e Solskjaer është më shumë se dyfishi i asaj të luzitanit.
Ish-futbollisti i Junajtid, ka një përqindje fitoresh prej 87.5%. Pikët mesatare për ndeshje janë 2.75 për Solskjaer, krahasuar me vetëm 1.5 pikë të Murinjos. 1.7 ishte mesatarja e golave të shënuar në kohën e Murinjos, ndërsa tani Junajtid shënon 2.5 gola mesatarisht. Ndryshimi është i qartë, nuk ka nevojë për shumë koment…