Rracizmi është një prej shfaqjeve më të shëmtuara në futboll, me episode që fatkeqësisht regjistrohen në çdo moment. Madje, edhe në Angli, aty ku luhet niveli më i lartë i futbollit në botë dhe ku gjithçka presupozohet të jetë një shembull për të gjithë.
Gjatë derbit të Londrës, të luajtur në “Emirates Stadium” ndërmjet Arsenalit dhe Totenhemit, një tifoz i ekipit mik, hodhi lëkurën e bananes përpara sulmuesit të “topçinjve”, Pier Emerik Aubamejang. Episodi ndodhi në momentin kur lojtari po festonte golin e parë, nga dy të shënuar në portën e “Spurs”.
Hedhja e bananes ishte një akt i qartë racizmi. Një episod, i cili me të drejtë nuk u tolerua. Pas evidentimit të personit përgjegjës, ai menjëherë u arrestua nga policia londineze dhe tashmë do të përballet me akuzat.