Reali thyen edhe një tabu, nuk ndalet as Siti

0

Dortmundi i ishte bërë makth vitet e fundit Realit të Madridit, që kurr nuk kishte fituar në shtëpinë e klubit gjerman. E theu tabunë sot, me një sukses bindës 3-1, në ditën e një supergoli nga Geret Bejl, para se të ndizej Kristiano Ronaldo, me dy gola në minutat 49 e 79. Mes dy golave të portugezit, një gol shprese nga Obamejang, por shumë pak për të ndalur një Real të kthyer madhështor, me Modriç e Kros fenomenalë në mesin e fushës.

Në ndeshjen e tjera të ditës në Champions, fitore bindëse për Mançester Sitin e Pep Guardiolës, që kaloi 2-0 një test delikat kundër Shahtar Doneck, skuadër solide, që rezistoi mirë në pjesën e parë, ku Siti nuk shkëlqeu, ndërsa në pjesën e dt anglezët ndërruan marsh dhe një super De Brujne i dha drejtim ndeshjes sapo nisi pjesa e dytë. Aguero pati luksin të gabonte një penallti, para se në minutat shtesë Stërling të mbyllte gjithçka.

Spektakolar Herri Kejn në Qipro, me sulmuesin e kombëtares angleze që shënoi 3 golat e suksesit 3-0 ndaj APOEL-it. Një gol në pjesën e parë, dy në të dytën dhe Kejn ka shënuar tregolëshin e gjashtë të vitit 2017.

Shkëlqen edhe Napoli, fitues 3-1 ndaj Fejenordit, me 3 “tenorët” Insinje, Mertens e Kajehon që shënuan, ndërsa Fejenordi shpërdoroi një penallti kur ndeshja ishte 2-0, para se të shënonte golin e nderit në shtesë.

Befasi në Francë, ku Monako është ndalur dhe ka mbetur pa shënuar, duke u mundur 3-0 nga Porto, me sulmuesin Abubakar spektakolar, autor i dy golave të parë. Ndërkaq, Beshiktashi mposhti 2-0 Lajpcigun debutues, me gola nga Babel e Taliska që në pjesën e parë. Shkëlqen Sevilja, fituese 3-0 ndaj Mariborit modest, me Ben Jeder që çon topin në shtëpi, sepse shënoi gjithë golat e ndeshjes. Në fund, zhgënjen Liverpuli, i ndalur te barazimi 1-1 në Moskë nga Spartaku. Kutinjo barazoi në pjesën e parë, pas golit të Fernandos, por ky Liverpul nuk premton ndonjë gjë të madhe, duke parë si po luan.

SHPËRNDAJE

PËRGJIGJU

Please enter your comment!
Please enter your name here