Plani i Mustedanagiç: Talentet i zbuloj nga… kampionati shqiptar!

Xhemal Mustedanagiç është një nga ata që i ka shpëtuar ndryshimeve të shumta te kombëtaret e moshave. FSHF nuk i ka vënë në dyshim aftësitë e boshnjakut, i cili në të shkuarën ka qenë edhe zëvendëstrajneri i kombëtares krah Josip Kuzhe, i ndarë nga jeta.

Aktualisht drejton Shqipërinë U17, ndërkohë që është përzgjedhur edhe si drejtor teknik i kombëtareve, pozicion që e ka mbajtur më parë Paolo Tramexani.

“Dëshira ime është që të ndihmoj sa më shumë trajnerët me dijet dhe eksperiencën time. Objektivi kryesor i punës do të jetë zhvillimi sa më i shpejtë i lojtarëve për t’i përgatitur për kombëtaren A. Gjithçka do të nisë nga puna me kampionatin vendas dhe me lojtarët me origjinë nga Shqipëria. Në këtë mënyrë do të kemi më shumë futbollistë shqiptarë që të na përfaqësojnë në kombëtare”, është shprehur Mustendanagiç në një prononcim të dhënë për “Top Channel”.

“Do të fillojmë bisedimet me trajnerët për të krijuar një modul loje që të luajë ekipi kombëtar A dhe më pas të gjithë të luajnë me të njëjtën skemë. Minimalisht nga U15 deri tek U21 duhet të ketë një model loje”, shton boshnjaku, i cili tregon edhe planin e tij.

“Do të krijojmë një databazë për të identifikuar elementët shqiptarë kudo që janë e më pas të punojmë me ta, në mënyrë që të mos na humbasë asnjëri rrugës. Do të komunikojmë me klubet që të stërvitin sa më mirë dhe të punojnë sa më shumë me lojtarët vendas që të jenë pjesë e ekipit kombëtar.

Besoj që e ardhmja do të jetë më e mirë, kjo duke patur parasysh që çdo ditë e më tepër po vijnë trajnerë të rinj e të përgatitur më mirë, me më shumë informacione. Do të përpiqemi të bëjmë një miksim moshash në ekipet kombëtare.

Pavarësisht se ndonjëri do të jetë në moshë më të vogël, mund të luajë me ekipin e një kategorie moshe më sipër, për të promovuar sa më shpejt talente që të arrijnë në ekipin A. Shqipëria ka brumë, por duhet të rritet përgjegjësia dhe puna në të gjitha nivelet, mbi të gjitha mënyra se si punohet”, përfundon Mustendanagiç.

Leave a Reply

Your email address will not be published. Required fields are marked *