Marash Kumbulla është padyshim një yll i ri që po ndrin në qiellin e Serie A. Vetëm një sezon aty mjaftoi për të që të tregonte gjithë aftësitë dhe potencialin e tij. Me mbrojtësin shqiptar në prapavijë Verona ka qenë më e sigurt në fushën e lojës, ndërsa shifra e golave të pësuar flet qartë edhe për meritat që Kumbulla gëzon.
Talenti kuqezi është kthyer në figurën kryesore të klubit Italian, ndërsa së fundi ka vendosur t’u shuajë kureshten tifozëve të vetë. Nëpërmjet një interviste në “Instagram”, Marash Kumbulla ka rrëfyer shumë mbi veten e tij, duke nisur që nga goli i parë, fitorja me Juven, zgjedhja e Shqipërisë dhe dëshira për të qenë kapiten i saj e deri te e shkuara si një djalë që mblidhte topat te Verona.
Karantina
“Unë po e kaloj këtë periudhë me familjen time: gjatë ditëve të mia luaj me PlayStation me vëllanë tim, shikoj filma dhe seriale televizive dhe padyshim që stërvitem me programin që trajneri ynë atletik na dërgon çdo ditë”
Një produkt i akademisë
“Unë fillova të luaja në Cavalcaselle, pastaj në moshën nëntë vjeç u transferova në Hellas, ku bëra të gjitha ndeshjet për të rinjtë, prej të cilave kam edhe kujtime të bukura, të lidhura gjithashtu, për shembull, kur isha djalë që mblidhte topat. Veshja e fanellës së qytetit tim është një emocion i shkëlqyeshëm”.
Grupi
“Në bazë të rezultateve tona të shkëlqyera sigurisht që është grupi i bukur që është krijuar. Ka shumë lojtarë të rinj por edhe lojtarë më me përvojë që na ndihmojnë shumë. Ata të rinj të cilët u përshtatën menjëherë na dhanë edhe më tepër”.
Shokët e ekipit
“Kam një marrëdhënie të shkëlqyeshme me të gjithë shokët e mi dhe të gjithë më japin këshilla. Ai me të cilin rri më së shumti është Rrahmani, gjithashtu për një pyetje gjuhësore. Sapo ai mbërriti unë e ndihmova sepse ai nuk fliste italisht, edhe nëse i duheshin vetëm dy muaj për ta mësuar atë. Ai është një djalë shumë i zgjuar dhe shakaxhi, ne shpesh e shohim njëri-tjetrin edhe jashtë fushës”.
Titullar
“Gjatë tërheqjes së fundit kam punuar shumë dhe jam munduar të tregoj cilësitë e mia. Këto kanë qenë muaj shumë të lodhshëm, por rezultatet janë parë dhe mendoj se jam përmirësuar shumë si fizikisht ashtu edhe mendërisht. Për fat të mirë trajneri më dha besim dhe për këtë arsye arrita të kem mundësinë të matem në Serie A dhe kështu të realizoja ëndrrën time. Kur e kuptova që mund të isha një lojtar i rëndësishëm për këtë ekip? Në ndeshjen e parë në Serinë A. Unë i kuptova ata që ndoshta do të arrij të tregoj aftësinë time”.
Goli i parë
“Pas rrjetës në Sampdoria, për të cilin duhet të falënderoj gjithashtu Veloso për krosimin e shkëlqyer, me të vërtetë kam marrë shumë mesazhe nga shumë njerëz. Më duhet të them që “futbollistët e fantazisë” gjithashtu më shkruajnë shumë, dhe ata gjithashtu më inkurajojnë të jap më të mirën time”.
Nata më e bukur
“Goli kundër Sampdoria ishte vetëm gjëja e dytë më e mirë që më ndodhi këtë vit, sepse në radhë të parë vendosa fitoren kundër Juventusit. Ishte mbrëmja perfekte, ishte ditëlindja ime, ne luajtëm një lojë të shkëlqyeshme dhe mundëm ekipin më të fortë në Itali dhe në të cilin luan lojtari që më ka vënë në vështirësi këtë vit. Po flas për Paulo Dybala, një lojtar me të vërtetë i paparashikueshëm. Unë nuk isha në gjendje të flija atë natë”.
Danzi
“Kam luajtur për shumë vite me Andrea Danzi, dhe me të vërtetë më vjen keq për dëmtimin e tij sepse nuk e lejoi atë të tregojë të gjitha cilësitë. Shpresoj që ai të mund të kthehet në fushë sa më shpejt të jetë e mundur për të filluar t’u tregojë të gjithëve se çfarë është i aftë”.
Idhujt
“Ka shumë mbrojtës tepër të fortë përreth, por nëse do të më duhej të tregoja më të mirët do të thoja Van Dijk, Chiellini dhe Sergio Ramos”.
Babi tifozi i parë
“Babai im më ka ndjekur gjithmonë kudo, si në ditët e fëmijërisë, ashtu edhe në ekipin kombëtar. ai gjithmonë më ka ndjekur dhe unë e falënderoj, sepse ai transmetoi dashurinë time për këtë sport dhe më lejoi të bëhem futbollist ”.
Shqipëria
“Zgjodha Shqipërinë për një çështje zemre: Unë kam lindur në Peschiera, por brenda ndihem pak më shumë shqiptar, edhe nëse preferoj ushqimin italian! Pearà(gatim tradicional veronez)? Unë kurrë nuk kam ngrënë atë. Kapiteni i Kombëtares? Shpresoj të arrij në atë pikë, do të ishte një ëndërr e bërë realitet”.
Një përshëndetje për tifozët
“Dua të përshëndes të gjithë tifozët e Veronës që gjatë këtij sezoni na kanë ndjekur me entuziazëm dhe duke na transmetuar ngarkesën e tyre të madhe për ne. Shpresoj t’ju shoh përsëri së shpejti në Bentegodi”, ka thënë Marash Kumbulla./Halit Delibashi-Sport Ekspres/