Partizani niset drejt Ohrit. Mbrojtësi boshnjak s’kalon klasën. Shqiptari Kaçorri mbetet jashtë. Kroati pranë zyrtarizimit
Skuadra e Partizanit do të nisë ditën e sotme fazën përgatitore në qytetin e Ohrit, në Maqedoni. Ekipi i drejtuar nga trajneri Sulejman Starova ka përpiluar listën e futbollistëve që do të jenë nën urdhrat e tij për një fazë 2 javore në shtetin fqinj. Në skuadër do të jenë 20 lojtarë, plus 3 portierë. Numri një i stolit të kuq nuk ka shumë risi në listën e tij, pasi tashmë emrat dihen dhe janë lënë jashtë vetëm emrat e konfirmuar si të larguar tashmë. Mesfushorët Marko Cetkoviç, Ylber Ramadani dhe sulmuesit Agustin Torasa dhe Kaleb Ekuban.
Çelebiç dhe Kaçorri – Mbrojtësi i majtë i afruar në radhët e të kuqve për një periudhë prove disa ditore nuk e ka kaluar atë dhe zyrtarisht nuk është më pjesë e Partizanit. Ai nuk është stërvitur as ditën e djeshme me klubin. Stafi teknik ka vendosur që Çelebiç nuk e kalon provën dhe nuk do të jetë nën vëzhgim. Të njëjtin fat do të ketë edhe sulmuesi tjetër shqiptar Luis Kaçorri. As ai nuk ka bindur me përformancën e tij dhe CV-ja jo e pasur kanë ndikuar që të mos kalojë klasën.
UGRINA – Sulmuesi kroat i afruar nga RNK Spliti duket se ka bindur më shumë se të gjithë stafin teknik. Mungesa e alternativa në sulm, por edhe fakti se flitet për një lojtar të kompletuar në aspektin fizik bën që Sandro Ugrina të jetë një hap larg firmës me të kuqtë. 25-vjeçari do të udhëtojë me skuadrën në Maqedoni dhe do të jetë nën urdhrat e trajnerit Starova.
LISTA – Nuk ka surpriza në listën e përgatitur nga klubi, pasi edhe organika nuk është aq e pasur dhe nuk ka mundësi manovrimi. 3 portierët dihen, po ashtu edhe pjesa tjetër e lojtarëve ajo që ka mbyllur sezonin e kaluar duke përfshirë edhe Kotobellin, Prognin dhe Ugrinën.
Lista e plotë
Portierë
- Alban Hoxha
- Dashamir Xhika
- Mario Dajsinani
Mbrojtës
- Arbnor Fejzullahi
- Gëzim Krasniqi
- Sodiq Atanda
- Kristi Marku
- Esin Hakaj
- Blerim Kotobelli
- Renato Kalari
- Labinot Ibrahimi
Mesfushorë
- Idriz Batha
- Lorenc Trashi
- Emiljano Vila
- Gresild Lika
- Jurgen Bardhi
- Mentor Mazrekaj
- Lauren Ismailaj
Sulmues
- Xhevahir Sukaj
- Realdo Fili
- Sandro Ugrina
- Gerard Progni
- Ardit Jaupaj